Esta 1 - Deduamiti

Ngactau Wasitingo Ngictauac yoac kpeec

¹ Dzeksingo Pesiaac ngictau kefec, imohai yeng bangec kpetea India bangecfunac hanahema bangec botuc goa ifingoc meme kengkecma Etiopia wisickede, imocac manau prowins 127 imoc garenggekefec, naso imohai faka yofi fingerec:

² Ngictau Dzeksingo Susaac amaherec seria, imoc garenggema ngictau tatahau tacma

³ ngictau uaya mekefu kifa harebec ammanu ngickiwa nga garengenarafocngina yenigoc nenedoku nesogaitoa anggec. Anu imohai Pesia nga Media bangec noboha noboha fekende, imocac wasaingic enara amma ngictau medacfocngina nga prowinsac ngickiwafocngina ihai hafoangoc kecgec.

⁴ Anu nesogaingo uameme 180 feec, imohai yeng finaha siriha gombunga hania hania imocac eucerereng nga kibikperagi yeac kucac bageu feec, imoc hafoangoc edzacyunudarec.

⁵ Ifi anu naso imocngo wisickemanu ngictaungo yengena amaherec seria Susa, imocac sobengngau ngic mameaunac engkecma engena wisickede, yeneac nenedoku me-mengere anu nesogai amma kecmagec sonda mocgu wisickeec.

⁶ Sobeng imoc kporuc kongackongac nga asongasong sufafac lineng nanangngagoc memea imohai gbedickegec nanec. Nanu lineng kongackongac nga borangborang mudzemudzea, wiac ifia gontaningango kambackambac kibia hereaherea imocgoc memea. Ammanu imohai heitatac gol nga silwango ongeagoc kibia haniahania imocngo sintitiau nanangagoc memea amma hoc mong usuac yadaya asomadohagoc buma kuneng imocngo tegiau faigec nanec.

⁷ Anu sokoc golngo memea, mocgu mocgungo siricngina mong mong andae, imohai ngictau yengena netohongaunac waing dokuya songea mema kpakeyemmegec.

⁸ Imoc ngictau yengena dederecgeu ngic heitaiyunuyunuya yeni kpaea kpac ngictaungo deec, imocac siricfu waing gareng yeni ngic tembuc tembuc songongina modacma waing dokuya kpakeyemmekecgec.

⁹ Anu naso imohaingoc ngactau Wasitingo ngictau Dzeksiac amau ngac yeneac nenedoku ifingoc me-mengere anec.

¹⁰ Anu sonda mocguac uameme wisic wisickeau ngictau Dzeksingo waingdoku nema sogaima uangicfora yeneng ngactauaaru kengkenggac edeyunuec. Yeneac kpacngina Mehumang, Bireta, Harebona, Bidzita, Abagita, Dzetari nga Karikasi. Ngickuneng sewen imoc yeni ngictauac bageau kecma yeac ua meandae, imoc yeni ngactauaru kenggecdeac sueyunuec.

¹¹ Yeni ngactau Wasiti iraya kibia kpacgoc imocgoc wangecma ngictauaru kenggec ngicngac nga ngickiwafocngina yeneng ngackereng siriha gombunga yombong edzacyunuu henggecdeac, negenec.

¹² Anu ngickuneng imoc yeneng kemma ngictauac yoac imoc edegec ngactau Wasitingo habesonga waec. Ifi anu ngictaungo herea yaru herebu kuneng negenec.

¹³ Negemma ngictaungo singa modacma singyoac nga desidesiac foraya dedeac negen negengngic yeni dehou ayemmeec amma ngicngac damocngo naso imohai kecgec yeneac fakanginaac hania negentegecdae, yeni ifingoc dekpesi ayemmeec.

¹⁴ Ngictaugoc wegenac kecgec ngic imoc yeneac kpacngina Karasena, Setari, Adamata, Tarasi, Meresi nga Maresena amma Memukang. Ngickiwa sewen, imoc yeni Pesia nga Media bangecfu ngictauac eucererennu enarameme amma kecgec.

¹⁵ Imocac ngictaungo ngickuneng imoc yeni yofi kpesiyemmeec. “Singyoac modacma ngactau Wasiti dafi amminide? Ye ngictau Dzeksingo ngickuneng imoc sueyunuu yearu kemmagec, yeng dederecgea imoc mi modacdac.”

¹⁶ Anu Memukangngo ngictau nga ngickiwa yeneac kicfu yoac turunga yofi merenec. “Ngactau Wasitingo ngictauarusac faka mangana mi andac kpahac, imoc ngictau Dzeksiac prowins sasawa imocac manau ngickiwa nga ngiha ngiha kecdae yenearu faka mangana ifingoc ayemmedac.

¹⁷ Anu ngictau Dzeksi yeng ngactau Wasitingo yearu kenudeac deu ngactaungo eweaac mesuu enec, imocac siduc ngac sasawa yeneng negenggecdeu, ewefocngina yeneac yoac ifingoc kpegecde.

¹⁸ Amma Pesia nga Media ihacnac ngackiwa imoc yeni ngickiwa yeneac enengfocngina yeneng ngactau Wasitiac siduc imoc negemma naso imohaingoc ngictauac ngickiwa yenearu siric imocngoc andacgecde. Anu eweheiheiya kpac nga modzotitigoc kekec, imocngo feengkefude.

¹⁹ Ifiac amma ngictau geng negena ngereeudeu, Pesia nga Media yeneac singyoac ohona imocngo seria feudeac amma mongngo dedeseri imoc naric mi kpeude. Imocac nenang imoc modacni Wasitingo ngictau Dzeksiac kicfu monggoc mi fingeckefude nga ngac mong gombunga ye ferahede, yeng ngactau tatac imoc mebeso.

²⁰ Anu dedeseri imoc bangec damocngo ngictau geac kuc bageu fede, yenearu dekperagigec kendarudeu ngac sasawa kpacnginakpac yenearunac engkecma kpacnginagoc yeneng ewefocngina eweheihei ayemmegecde.”

²¹ Ngictau nga ngickiwafocngina yeni Memukangngo dederecge anec, imocac negenggec naric anu ngictaungo yoac imoc modarec.

²² Modacma bangec garenggeecac prowins sasawau amayoacnginasoc kibi yofi ohoma faiu kendarec. Ngic sasawa yeneng amamananginaac oruha amma kecbisia.