Dzekarya 9 - Deduamiti

Yehudaac ngabafora yeneac yoac

¹ Kebuac yoac yofi haec: Haderak provins manau ngicngac kecdae ngeni yoacnginagoc. Amma ngicngac Dammesek Provinsiu kecdae yoara ifingoc ngeneac witiu tacdengoc. Kebungo Isracelac habu twelf nga ngicngac bangeha bangeha momoc angammemengina imoc hengising angkecde.

² Amma Hamat bangec Dammesekgoc wegenac fede nga Tsor nga Tsidon bangecfu ngic negen negentoanginagoc kecmagec, Kebu ye sifu kiwa yenearubigeng fima hengising uaya imoc mekecdengoc.

³ Amma Tsor taong ye tawaya seria mema imocac manau silwadzoya mekpedzuc anu sendung isoc femide. Nga ye gol ifingoc kpedzucneu goteng isoc bangec sokoma femide.

⁴ Ammanu Kebungo dzofinaha imoc wangecma kondunnu ukuu kemebesande. Nga amagereha imoc gerecngo sasawa dzemusunggebesande.

⁵ Askelonngicngac yeni faka ifia hemma dzonongngina fedebesande. Nga adzangicngac yeni kengecyunuu wosotantang ambesandae. Ammanu ekrongngicngac yeni Tsor taong heiringina amma karukpetingngina imoc kpesigec dabiebesandae. Amma Adza bangec ye ngictauya kpac anude. Amma Askelon bangecngo kisi fingeru ngic mongngo imohai mi kecbesande.

⁶ Ammanu ngicngac kuriha bangec noboc nobocnac yeneng hama Asdod bangec mebesandae. Faka ifia fingeru Kebu neng Pelisti bangecac sebieeng imoc meickeba kpac andacbesande.

⁷ Amma yangfusia sawagoc imoc enacngina manaunac meickebesandua nga yaka goa modzona tiande imoc enacnginaunac mesibesandua. Ammanu ngicngac toseanec komoc kpema kecbesandae, yeni Anutuninaac areng amma yehudahabu isoc kecbesandae. Ammanu ekrongngicngac yeni yebusingicngac isoc amma neac habufocna kecbesandae.

⁸ Ni amanaac ageng tima gareng mema kecbare wasaingic yeneng ihaibigeng susung ferecge mi ambisia. Amma areng goa yeneng monggoc mi memayunubisia. Yaguc neannaoc gborikecma gareng mebadenoc.

Tsionggac ngictau habesande

⁹ O Tsionggac ngicngac ngeni sogac sogai kuneng yombong anggec. Amma Yerusalaimgac ngicngac ngeni arohoma horianggegec. Henggec, ngictaunginango ngenearu habesande. Ye dindingacngo firang amma komoc kpengunubesande. Ye donggi witiau tacdenoc. Ye donggi medahau hade nga ye fakaya memaemeemea.

¹⁰ Amma Efrayimgac dzikacac keretac nga Yerusalaimgac becosic imoc meicyunudacbesandua amma dzikacac tebegbobingina imoc tuema ukudacbesandua. Anu bangeha bangeha yenearu ruaetoa fingerudeac ngictaungina gboriango deseribesande. Anu yeac ngictau uayango kondung nobocnac kemma kondung noboc amma dokutoaunac kengkecma bangec wisic wisickeau kpesidacbesande.

Kebu Anutungo ngicngacfora komoc kpeyunubesande

¹¹ Anu ni gegoc kecma sacgoc dzadzahac anai. Dzadzahac imocac amma ngicngacfocga witicamau teng dokuya kpacfu kecgec ihacnac yungecyunuba erema komoc kpebesandae.

¹² Kebuac yoacfu heirima tomai kecdae ngeni bombangecnginau hocoda gununggununggea ihai monggoc dzigenebesandae. Yagucnoc fakana dekperagibade imoc hembisia, wiac mocgu hamangec mengemmegecfu neng wiac yohockang turunga ngemmebesandua. Ifi amma kekecngina monggoc mengerebesandua.

¹³ Ni Yehuda tebenaac gurutu isoc tiba kemebesande nga Efrayimngo tebemedaha isoc ambesande. Ni Tsionggac medacfora demeefai ayemmeba yeni wasaibeang isoc ammagec fenggeyunuba grikngic medacfocngina yunubesandae.

¹⁴ Ammanu witinginau wi sawau Kebu Anutungo fingecyemmema tebemedaha kpesaiu piratac isoc kembesande. Ammanu ye biunga fifima sautfunac firang murayowarec isoc kpefemanu imocac manau habesande.

¹⁵ Kurumenggac wasaiareng habuya habuya yeneac Kebungo agengngina tiu yeni tacbang kperec kperecgengic haningina bageau faiyunuma firang ambesandae. Firang amma minggongngic arohoandae ifi isoc arohobesandae. Amma sacngo sesememeac sokocfu wakeu kpetinggegec arata baiha nadzicmiande, ifi isoc ngabafocngina yeneac sacnginango sebinginau sokoma nadzicngemmedacbesande.

¹⁶ Naso imoc Kebu Anutunginango ngicngacfora komoc kpeyemmeudeac naso amma rama isoc yenenggareng ayemmebesande. Anu yeni ira witiau hoc buma kunengngo pirac pirac amma kperagiande, ifi isoc kperagima bangeha mekperagibesandae.

¹⁷ Anu bangec imoc bangeckereng danggunuhagoc ambesande. Amma nenesemenga amma waindokuya gbori imocngo medacfocngina amma naroangfocngina nanggeyunuu gunurebesandae.