Dzekarya 8 - Deduamiti

Kebungo Yerusalaim monggoc kenehebesande

¹ Anu kurumenggac wasaiareng habuya habuya yeneac Kebu yeac yoacngo Dzekarya yearu yofi hau negenec,

² “Ni kurumenggac wasaiareng habuya habuya yeneac Kebu neng yofi deduae, ‘Ni Yerusalaimgac heresongona kunengngoc fenende. Ammanu damoc yeneng Yerusalaim mingina kopocsicac sinnu wangecyunuandae yeneac ine herebuna feude.

³ Imocac ni monggoc Tsionnu dzigenema Yerusalaimgac botuhau tacbesandua. Ihai tacba yeni Yerusalaimgac kpara, “Yoac foraac taong,” ifi debesandae amma kurumenggac wasaiareng habuya habuya yeneac Kebu neac tikiac kpara, “Kpetiac tiki,” ifi debesandae.

⁴ Amma monggoc Yerusalaim manau sobeng fekende ihai ngicngac kpengeng kifa homac kpoukpouya yeneng yasuu kekenghango tembuc tembuc yasunginagoc monggoc sobennu tacbesandae.

⁵ Amma amasobenga sobenga imohai nambarac yeneng sokodacma kecma ariac ambesandae.

⁶ Anu yehudahabu toseanec komoc kpema kecdae, yeneng yofi debesandae, “Faka imoc mi fingec fingecac siriha yombong.” Ifi demagec nearu ine imoc naric fingec fingecac siriha anude.

⁷ Amma ngicngacfocna bangecnginaunac miacyunuba wenac ere ereau nga keme kemeau singsararang kpema kecdae yeni ihacnac monggoc meyunuma bangecnginaungoc komoc kpeyemmebesandua.

⁸ Komoc kpeyemmeba Yerusalaim imohai kecbesandae. Kecma neac ngicngacfocna ammagec ni yeneac Anutu fora nga dindingac kecbesandua.’ ”

⁹ Kurumenggac wasaiareng habuya habuya yeneac Kebu neng yofi deduae, “Warac womong mebeso hoc heikenggec, naso ihai profete yeneng yoac degec negenggec yoac siriha imocngoc yaguc deba negendae. Ngeni seria nanggecdeac hafoangoc maringina meseriemema nanggeemebisia.

¹⁰ Amma womonggac hoc hikenggec naso imocac bageau keceregec imohai ngicngac yeni nga donggi burumakafocngina uaac fora megecdeac sengerang heima ua esa mekecgec amma sifu uanginaac fora efeanecsac fingeckefec. Amma bangec imohai kecgec yeneng ngaba anggecac amma kenghaac singngina imoc ebihagoc anec. Amma yeni yenaocngoc ngaba angemegecdeac ni neanaoc doc sineai.

¹¹ Nga ni yaguc yehudahabu toseanec komoc kpema kecdae, yeni warac ngaba ayemmeai isoc monggoc ngaba mi ayemmebesandua.

¹² Amma ngicngacfocna toseanec komoc kpema kecdae yenearu wiac sasawa yomoc fingerudeac faka yofi mebesandua, Yeni ruaegoc kecma ama uangina heihomec ambesandae. Ammagec asomenggac dzimbong titikucngo bangecnginau danggunuc meu waingnginango foragoc andacbesande nga bangecnginango ifingoc semengagoc ambesande.

¹³ O Yehuda nga Isracel yofi negenggec, ‘Ngeni kengeha kpac serima nambisia. Anu bangeha bangeha yeneac botucfu sowecac onga anggec ifi isocngoc neng ebicfunac meicngunuba komoc kpema bangeha bangeha yeneac kenec ambesandae.’ ”

¹⁴ Amma Kebungo torokpema yofi deec, “Esangabo nga bangecfocngina yeneng herebu meficgenengkecgec naso imohai memanganeyunubadeac negengareng angkefai imoc mi wakefai.

¹⁵ Ifi isocngoc yaguc Yehuda nga Yerusalaim kenecngunubadeac tikengemmeduae. Imocac mi kengecngunuu.

¹⁶ Imocac ngeni faka yofi ambisia, yoac forau edeemebisia nga yoacfu faiemegecdeu ruaeac sinnu ising ising forasac mebisia.

¹⁷ Ngeni ngicngac memanganeyunugecdeac arenggema negengareng mi ambisia. Amma yoac ikoha deserigecdeac songo mi negembisia. Faka ifia sasawa imoc ubaherenango waanduae.”

¹⁸ Ammanu kurumenggac wasaiareng habuya habuya yeneac Kebu yeac yoacngo nearu monggoc hau negenai.

¹⁹ “Yakasegekekecac naso afo kpete fo, kpete faef nga kpete sewen amma kpete ten wenac imohai yakasegekekecac nasongina angkecde imocac naso imocngoc yehudahabu ngeneac sogac sogai nasotoangina angkecbeso. Ammanu ngeni yoac fora nga ruaegoc kekec imocac songotoa negembisia.”

²⁰ Kurumenggac wasaiareng habuya habuya yeneac Kebungo yofi dede, “Naso hama kecde naso ihai taonna taongga ngicngac homacngo Yerusalaim imohai habesandae.

²¹ Ammanu taong monggac ngicngac yeneng taong monggac ngicngac yofi edeyunugecde, ‘Hagec, nenang kurumenggac wasaiareng habuya habuya yeneac Kebu yeac hoannu kemma kpacsambic ammini.’ Ni neanna ifingoc kembade.”

²² Amma bangec kuctoanginagoc nga yoacna yoacga habu homacngo kurumenggac wasaiareng habuya habuya yeneac Kebu yeac hoannu hama kpacsambic ammigecdeac Yerusalaim imohai habesandae.

²³ Kurumenggac wasaiareng habuya habuya yeneac Kebu yeng yofi dede, “Naso imohai ngic ten bangeha bangehaac yoacna yoacga yeneng yehudangic mocguaru hama ngakpia seria mendanggema yofi degecde, ‘Anutungo ngenigoc kecde imoc negening imocac wangecnununa gegoc kenni.’ ”