Dzekarya 7 - Deduamiti

Yakasegeac faka ikoha

¹ Anu ngictau Dareyawesngo kifa harebec ngictau kefec imocac afo naing kpara kislew imocac uameme neackpac ammanu profete Dzekarya yearu Kebuac yoac yofi hau negenec.

² Bet-El ngicngac yeneng Sar-Etser nga Regem-Melek ngicfocngiragoc sueyunugec. Yeni Kebungo meficyunuudeac numugecdeac kenggec.

³ Amma Kebuac womonggareng nga profete ifingoc yofi kpesiyemmegecdeac kenggec, “Yeni hama womong hembarackegecac neni kifasoc afo kpete faef imohai imoc negensima ubahodunggac yakasege amma kecereing. Ifi isocngoc monggoc naric annide me kpac?”

⁴ Ifi kpesigec kurumenggac wasaiareng habuya habuya yeneac Kebu yeac dedengo nearu yofi haec,

⁵ “Ge amabangec yomocac ngicngac amma womonggarengfocngina yofi edeyunubesena, ‘Ngeni kifa sewentiac manau afo kpete faef nga afo kpete sewen imohai kiac ubahodunggoc yakasege angkecgec, imoc fora ngeni ifi angkecgec amma neac mong mi negensikecgec.

⁶ Ngeni nenedoku neandae, naso imohai ngenanggacsac negemma neandae.

⁷ Anu warac Yerusalaim taong nga imocac taong wegenac yerecgema tackenec imoc ngicngac yeneng wakema kecgec amma dzofinactoanginagoc kecgec. Amma sautfubigeng nga wenac keme kemeaac buririhau imoc ngicngac yeneng sokodacgec, naso imohai Kebungo profete warac keceregec yeneac enacfu fau yeneng angammemengina mangana imoc deficgeyemmegec. Anu yaguc ifingoc Kebungo manganangina imoc monggoc deficgengemmede.’ ”

⁸ Anu Kebuac yoacngo Dzekarya yearu monggoc yofi hau negenec,

⁹ “Kurumenggac wasaiareng habuya habuya yeneac Kebu yeng yofi dede, ‘Ngeni demengereac sing imoc gombunga modacma ubamangang angemema wosoefacgoc kecbisia.

¹⁰ Amma hotsecbegingfocngina nga ngic kuriha amma makpekpeafocngina yeneac amatatac gombunga imoc mi wangecyunubisia. Amma ngenaocngoc memanganeemegecdeac negengareng mi angemebisia.’ ”

¹¹ Amma esangabo nga bangecfocngina yeni yoac siriha ifia imoc bic negenggec ammaguc ubaseriyombong amma yoacna ngadehema yoacna negembauac kedzacngina kpefonggegec.

¹² Kurumenggac wasaiareng habuya habuya yeneac Kebu yeng profete warac keceregec yeneac enacfu Asuya fau yeac kucfu yoara dekperagigec, yoac imoc nga dedeseriyoara imoc esangabo nga bangecfocngina yeneng yoara imoc mi negenggecdeac ubaherengina dzegegec harongang isoc seriec, imocac Kebuac herebungo witinginau enec.

¹³ Enu yofi dekperagiyemmeec, “Ngeni dedekperagi yoacna dekperagingemmeai ngeni imocac kedzac mi kpegec, ifi isocngoc ngeni kpacsambic anenggecdeu neng ifingoc ngeneac kedzac mi kpebade.

¹⁴ Amma neng, firang murayoware yereng ichasa maria kpemoronggeec noboc noboc singsararang kpeande ifi isoc fifingunuba mikic bangec mi hehena imohai singsararang kpema kendacgec. Ifi ammagec amabangecngina kisi fingecma femanu mongngo ihai kengha mi anggec. Ifi amma yeni bangec danggunuhagoc imoc memanganegec bangec imoc kisi amma eng feec.”