Dzekarya 6 - Deduamiti

Dzekaryango keretac neackpac yenenec

¹ Anu ni monggoc kpehengaima hemba aieng sacsac tiki yohockang taroc, yereac botucfu keretac neackpac yeneng hasarigec yenenai.

² Anu keretac waraiec imoc becosic kpauc kpauc yeneng taigec nga yeac ngadeau keretac mong haec imoc becosic dzadzu dzadzu yeneng taigec.

³ Yeac ngadeau becosic kongac kongac yeneng keretac mong taigec nga keretac wisic wisickea imoc becosic kucnginagoc kibi kibi yeneng taigec.

⁴ Anu angero nigoc yoacyoac anec ye kpesimiai, “Kunenna keretac imoc yeneac hania dena negemba.”

⁵ Ifi deba yofi edenuec, “Asu neackpac imoc yeni kurumenunac bangeha bangehaac Kebu yeac hoannunac hadae.

⁶ Becosic dzadzu dzadzu yeneng keretac mong taidae imoc yeni notfubigeng kenggecde nga becosic kongac kongac yeneng keretac mong taidae yeni wenac keme kemeaubigeng kenggecde amma becosic kibi kibi yeneng keretacngina taima sautfubigeng kenggecde.”

⁷ Anu becosic kibi kibi kucnginagoc yeneng mama bangeha bangeha sasawa bic kemma hennegeng anggecdeac ua seria yombong megec. Megec angerongo deec, “Naric kenggec.” Ifi deu yeni bangec sokodacma yerecgedacgec.

⁸ Yerecgedacgec angerongo yofi dema kpacnuec, “Negennec, becosic dzadzu dzadzu yeneng notfubigeng kendaeac onga asuna ruae meficgede.”

Gareng yohockang yereac yoac

⁹ Anu Kebungo yoac yofi edenuec,

¹⁰ “Helday, Tobiya nga Yedacya yeni Bawel bangecfunac bic dzigene hagec. Ge yagucnoc yeneac mariunac sese mema Tsefanyaac medac Yocsiya yeac amau mekembesena.

¹¹ Amma yeneng gol nga silwa mehagecde imocngo ira miackema Dzehodzadacac medac womonggarengtoa Yehosuac ye heimina kemebeso.

¹² Anu yofi edebesena, ‘Kurumenggac wasaiareng habuya habuya yeneac Kebu yeng yofi dede, “Negennec, ngic mong kpara Icfawa ye sera kpema erema yadiseri amma Kebuac womong monggoc gununggebesande.

¹³ Yennoc Kebuac womong mema eweheiheiac kibikperagi mebesande amma enara tatahau tacma gareng ua mebesande. Amma yeac hoannu womonggareng mongngo tatacfu tacma yerahafoc ruaegoc uangira mebesandape.

¹⁴ Anu ngicngac yeneng ira imoc hemma Helem, Tobiya nga Yedacya amma Tsefanyaac medac Hen yeni negensiyunukecgecdeac Kebuac womonnu faigec tacbesande.

¹⁵ Amma womong memeac ua meficngunuma megecdeac ngicngac ama hereaunac yeneng habesandae.” ’ ” Hagec ngeneng neac yofi negentegecbesandae, kurumenggac wasaiareng habuya habuya yeneac Kebu yeng ni suenuec. Amma Kebu Anutunginaac yoac dindingac modacgecdeu wiac sasawa imocac fora fingedacbesande.