Dzekarya 5 - Deduamiti

Dzekaryango kibi kpoukpouya sawau henec

¹ Anu kpehengaima kicna fiba enu kibi kpoukpouya mong sawau fingecma hau henai.

² Hembare angerongo kpesinenec, “Ge noc wiac hennec?” deu deai, “Kibi kpoukpouyango fingecma hau henduae. Imocac hereaya nain mita amma wegenaha mita neackpac nga noboha.”

³ Ifi deba yofi edenuec, “Sowecyoac kibi yomocac manau oho ohoya fede, sowecyoac imoc bangeha bangeha kendarudeacnoc dede. Kibi nobohau yoac yofi fede, ‘Seng hamangec angkecdae, yeni Kebungo bangec yomohacnac meicyunuma ukuyunuu kendacgecde.’ Amma kibi imocac nobohau yoac yofi fede, ‘Ikocyoacngina yoacfu meseriandae, yeni ifingoc Kebungo bangec yomohacnac meicyunuma ukuyunuu kendacgecde.’ ”

⁴ Kurumenggac wasaiareng habuya habuya yeneac Kebuyeng yofi dede, “Ni sowecyoacna bic sueba imocngo hamangec areng nga neac kpac kpacma ikocyoac deandae yeneac amau emma fema ic nga hoc momoc hedzamedarude.”

Dzekaryango ngac sakac manau taru henec

⁵ Anu angero nigoc yoacyoac anec ye monggoc fingecnemma yofi deec, “Ge monggoc kpehengaima wiac goa fingecde imoc henna.”

⁶ Ifi deu fima hemma kpesimiai, “Imoc noc wiac.” deba yofi edenuec, “Imoc sakac mong fingecde.” Ifi dema torokpeec, “Sakac imoc Yehuda bangectoaac kopocsic sasawa imocac onga ande.”

⁷ Ifi deu hennambare sakac aiengtapaya anggeu ngac mong sakac manau taru henai.

⁸ Hemba yofi edenuec, “Ngac imocngo manganaac onga ande.” ifi dema ngac sakac manau monggoc igockeu kemeec. Kemeu aiengtapa kucgoc heima sakac enara hedzickeec.

⁹ Anu monggoc kpehengaima fiba enu hemba ngac yohockang sawau kpegangngiragoc fingecma nearubigeng haoc. Kpegangngira imoc kpendzoac kpegang isoc. Firangngo kpegangngira fifiu yeri sakac mema sawa kebangau emma kenoc.

¹⁰ Anu angero nigoc yoacyoac anec ye kpesimiai, “Yeri sakac imoc dahai mekendape?”

¹¹ Deba yofi deec, “Sinecar bangecfu mekendape. Ihai amea megecdeac mekendape. Amea medzickemaguc sakac ihai meemma tatahau faigecde.”