Dzekarya 4 - Deduamiti

Dzekaryango kifa nananga nga oliwa ic yohockang yenenec

¹ Anu angero warac nigoc yoacyoac anec, yeng monggoc hama gau ebira femina midinunuandae ifi isoc midinuec.

² Midinuma kpesinenec, “Ge noc wiac henec.” deu deai, “Kifa nananga mong hafoangoc golngo memea nga imocac witiau sokohagoc memea. Sokoc ihacnac kpeng kpeng sewengngo kifa sewen yenearu enu henduae.

³ Amma oliwa ic yohockang yerenduae mongngo kifa nanangaac sokohaac foiyaugeng nande nga mongngo kanayaubigeng nande.”

⁴ Ifi dema angero nigoc yoacyoac anec ye yofi kpesimiai, “Kunenna, wiac henduae imocac hania dafi?”

⁵ Kpesimiba angero nigoc yoacyoac anec yeng yofi edenuec, “Wiac hennec imocac hania mi negentegecnec me?” Deu deai, “Ni imocac hania mi negentegecduaengoc.”

⁶ Ifi dema monggoc torokpema edenuec, “Ge Kebuac yoac yomoc Dzerubawel edena, ‘Ge ngic seseriac sinnu me ngic kucac sinnu ua mi mebesena ge neac Asunaac kucfu ua mebesena.’ ”

⁷ O, tikitoa ge engena yombong annec. Ammana sifu Dzerubawelac kicfu tohoma dzamema bangec tumia andacnade. Ammana Dzerubawelngo uaya mesima amaac hoc wisic wisickea ama bubuyau faimanu ngicngac yeni imoc hemma ohec waec ohec waec dema kpacgecde.

⁸ Anu Kebuac yoacngo monggoc torokpema nearu yofi hau negenai.

⁹ Dzerubawel ye ama yomoc meudeac hoc imoc bic heikenec amma ye ama imoc ifingoc medzickebesande. Medzickeu ngeneng yofi negentegecbesandae, Kurumenggac wasaiareng habuya habuya yeneac Kebuyengenaoc ni ngenearu suenuec.

^10a Amma ngicngac yeni hanac hanaheau womong meme ua imocac deendema anggec, yeni ngade Dzerubawelac mariu dindingac witic imoc hemma ine sogaigecde.

^10b Deba deec, “Kifa sewen yeneng Anutuac kic amma bangeha bangeha fi modacma hendacandae.”

¹¹ Ifi deu kpesimiai, “Oliwa ic yohockang kifa nanangaac foiyaugeng nga kanayaugeng nandape imocac hania dafi?”

¹² Ifi dema torokpema monggoc kpesimiai, “Oliwafawa yohockang yerearunac kerecdoku dzagec dzagecngo kpetinggema kpeng kpeng yohockang golngo memea yerearu kemedape, imocac hania dafi?”

¹³ Anu angerongo kpesinenec, “Ge imocac hania mi negentegecnec me?” ifi deu deai, “Kunenna, ni imoc mi negentegecduae.”

¹⁴ ifi deba deec, “Oliwa fawa yohockang yerinoc ngic yohockang kerecdokungo nadzicyecmeyecmea bangeha bangehaac Kebu yeac hoannu nandape.”