Dzekarya 3 - Deduamiti

Dzekaryango womonggarengtoa Yehosuac henec

¹ Anu Kebungo kpefinnu womonggarengtoa Yehosuac edzacnuec. Ye Kebuac angeroac kicfubigeng nanec. Nammanu Satangngo Yehosuac yoacfu faiudeac marifoiaugeng nanec.

² Nammanu Kebuac angerongo Satang yofi edeec, “Satang, Kebungo demeting anggembeso. Ye Yerusalaim meisinggeecac amma Yehosuacac yoac menannec ye geac yoac imoc wama metinggubeso dede. Yehosuac ye gerecac nenea ammanu gerecfunac memea.”

³ Anu Yehosuac ye ngakpi kporuha wonongagocngo angeroac kicfu nanec.

⁴ Nanu angerongo kurumenggac areng goa Yehosuacac wegenacfu nanggec yeneac yofi deec, “Ngeni yeac ngakpi kporuha wonongagoc imoc hesimigec.” ifi dema Yehosuac yofi edeec, “Ni kopocsicga wama ngakpi gboria kibikerengagoc heigenduae.”

⁵ Anu kurumenggac areng yeneng Yehosuacac oruhau kporuc dzuac dzuarango fusegecdeac deai. Deba Kebuac angero nammanungoc yeni kporuc oruhaufusemima ngakpikporuc kibikerangagoc heimigec.

⁶ Anu Kebua angerongo Yehosuac yofi deserima edeec,

⁷ “Kurumenggac wasaiareng habuya habuya yeneac Kebu yeng yofi dede, ‘Ge neac sing modacma uayoac genggena imoc menadeu neac womonnaac gareng faiguba womonnaac manau wiac sasawa fedacde imocac gareng kecnade. Amma kurumenggac areng yoc nandae, yeneac botucfu geac kengha ifingoc feude.

⁸ Womonggareng enara Yehosuac, yoac deduae imoc negentegecbesena. Ge nga womonggareng tosofocga geac bageau kecdae ngeni wiac gombung ngade fingecbesande imocac onga isoc andae. Ni ua medacna mong sueba habesande yeac kpara Icfawa.

⁹ Henggec hoc kibikerengagocngo pirac pirahagoc noboha sewen memea imoc Yehosuac geac hoannu faiba tacde. Hoc imohai yoac mong ohobade amma wenac mocguac manaungoc bangec yomocac kopocsic meickedacbesandua. Kurumenggac wasaiareng habuya habuya yeneac Kebu yeng ifi dede.

¹⁰ Naso imoc hau ngeni tembuc tembuc tosofocngina heitaiyunugec ngenang waing uanginasoc nga fig icnginasoc imocac bageau tacnegembesandae.’ ” Imoc kurumenggac wasaiareng habuya habuya yeneac Kebu yeac yoac.