Dzekarya 2 - Deduamiti

Amamemeac kpeteac kpefing

¹ Anu monggoc kpehengaima hemba ngic mongngo amamemeac kpeteac witic menanec.

² Anu hemma yofi kpesimiai, “Ge dahai kennade?” deba yofi deec, “Ni kemma Yerusalaim bangecac hereaya nga wegenaha dafi fede, imocac witic taima kpetea hennegeng ambade.”

³ Ifi deu angero nigoc yoacyoac anec, yeng nearubigeng wisicke hamanu angero ogeango yearubigeng kenec.

⁴ Anu angero waraima haec yeng ngade haec yeac yofi deec, “Bic nedzi kemma ngicmedac mariau kpete menande ye yofi edena, ‘Kecma Yerusalaim ye yadima ngicngacfora nga ramaburumakafora homac ambesandae imocac kaso kpekpeac hocoda memeac siriha mi ande.’

⁵ Imocac Kebungo yofi dede, ‘Ni neannaoc gerecborang isoc dzema taongnginaac oda ambesandua amma neanaoc ihai kecma fingectegecma kibikerengngina ambesandua.’ ”

Witicfunac yungecyungera

^6-7 Kebungo ngicngacfora yeneac yofi dede, “Ni sawaac firang neackpac sueyunuanduae ifi isoc ngeni kpetotiengunuba noboc noboc singsararang kpema kecdae, ngeni yacgec. Yacma Bawel bangecfunac worama Tsionnu monggoc dzigene hadacbisia.”

⁸ Kurumenggac wasaiareng habuya habuya yeneac Kebu yeng bangec damoc yeneng yehudangicngac iwaingina dzikacfu hamangec mema woragec yenearu suenuma yeneac yofi dede, “Mongngo yehudangicngac yunumeme ayemmeudeu ye neac kicgbomena kpede, ifi isoc ande.

⁹ Imocac neanaoc marina miacma ngenigoc dzikac kpebadeac amma ngicngac wanacfocngina isoc meyunukecgec yeneng ngunuma memanganengunubesandae.” Ifi anggec yofi negentegecbesandae, Kurumenggac wasaiareng habuya habuya yeneac Kebu yengenaoc ni suenuec.

¹⁰ Ye yengenaoc yofi dede, “Yerusalaim ge sogac sogaiac yegec heina. Ni botucnginau kecbadeac habesandua.”

¹¹ Naso imohai bangec homacngo kebuaru hama ngicngacforakecbesandae. Anu yeng botucnginau kecbesande. Naso imohai Kurumenggac wasaiareng habuya habuya yeneac Kebu yengenaocni suenuec imoc hentegecbesandae.

¹² Ammanu bangec kpetiac imohacnac Kebungo Yehuda bangec imoc tiu enu Yerusalaimmonggoc meisinggebesande.

¹³ Imocac bangecfu wiac sasawakekecnginagoc ngeni ning kpedacgec. Kebu ye haudeac kpetiacamayaunac mama yacma nande, imocac yeac kicfu ifi ambisia.