Dzekarya 14 - Deduamiti

Kebungo hama gareng ua mebesande

¹ Kic fima henggec Kebuac nasotoa hade naso imohai ngabafocngina yeneng hama hiedzongina wangecngunudacma botucnginau yenennammagec emekeng emeha ambesandae.

² Ni, bangeha bangeha Yerusalaim taontoau hama dzikac kpegecdeac heitaiyunubesandua. Heitaiyunuba yeni hama taongngina oronggema mema amangina manau emma iwaingina sicsauc mema ngacfocngina kaiserofaka ayemmema memanganeyunubesandae. Nga Yerusalaimgac mingina areng noboha meyunuma kemma bangec monnu faiyunubesandae. Nga areng noboha yeni wayunugec amabangecnginaungoc kecbesandae.

³ Ifi fingecmanu Kebungo yacma warac dzikac kpekefec ifi isoc kpema ngic habuya habuya yenigoc ewekpekpe ambesande.

⁴ Anu Oliwatiki imoc Yerusalaimgac hoangaubigeng wegenac wenac ere ereaubigennu tacde. Naso imohai Kebungo hania ihaibigeng tirima nambesande. Nammanu Oliwatikitoango tohoma yohockang ambesandape. Anu botucngirau uranggema keema tumiatoa amma nobohango wenac ere ereaubigennu kembesande nga nobohango wenac keme kemeaubigennu kembesande. Keemaec tiki nobohango fotockema notfubigeng kembesande nga nobohango fotockema sautfubigeng kembesande.

⁵ Tikitoana uranggema kemeude imocac tumiatoaya kengkecma Adzara bangecfu wisickebesande. Ngeni yehudangictau Udziaac nasou usoctoa meu woragec ifi isoc ihai worabesandae. Woragec Kebu Anutuna ye kpetiac arengforagoc hasikebesandae.

⁶ Anu naso imohai wenackiwa nomanema kuha kpac ambesande.

⁷ Nga naso imoc naso siriha mong yombong ambesande. Nocac wenac nga tofocnac yereac kperagingira imoc siriha mocgungoc anude. Amma ama marai anu kperagia ye engngoc febesande. Naso imocac hania Kebungo negende.

⁸ Naso ihai Yerusalaim imohacnac doku sike sikeango erema tohoma nobohango wenac ere ereaubigeng dzohontoau kemebesande nga noboha wenac keme kemeaubigeng kondunnu kemebesande. Amma doku imocngo wenacnasou nga nomangnasou erema kemma febesande.

⁹ Anu Kebu yengenaoc bangeha bangehaac ngictau amma kecbesande. Naso imohai Kebu mocgungosac kecbesande amma ye mocgu kpara Kebunoc.

¹⁰ Amma Yerusalaim taong imoc nortbigengau Gewa taonnunac kengkecma Rimmon taonnu wisickebesande bangec imocngo tumiatoa fingecma febesande amma bumau tatahaungoc tacbesande. Amma imocac kpetea yofi febesande. Wenac ere ereaubigeng Benyaminggac hocodaac nagutoaunac kengkecma warac warac nagu ferecgema tuturunggaac naguu wenac keme kemeaubigennu kemma wisickebesande amma notfubigeng imoc Hananecelac amaherecfunac kengkecma sautfubigeng ngictauac waing tidzoc tidzohoac teng memea ihai wisickebesande.

¹¹ Anu imohai ngicngac yeni komoc kpema ruaegoc kecbesandae. Ammanu heihembarac monggoc mi ambesandae.

¹² Anu ngiha ngiha Yerusalaim imohai dzikac kpegecdeac hagecde yeni Kebungo ebic yofi yemmebesande. Yeni gbori nammagecngoc fusingina hoaebesande amma kicngina tatahaungoc tacma hoaebesande nga nedzarangngina fefeaungoc fema hoaebesande.

¹³ Naso imohai Kebungo mekapa kpeyunuu dabiema yenaocngoc mendangemema ewekpekpe angemebesandae.

¹⁴ Yehuda yeni ifingoc Yerusalaim imohai dzikac kpegecde. Anu Yehuda bangecgoc bangec wegenac fekende imoc yeneac gol nga silwa amma wamba ebirangoc wangecyunuma kpedzucnegec embesande.

¹⁵ Amma ngic yenearu ebic fingerude ebic siriha imocngoc becosic, muledonggi kamele, donggi nga yamberec dzikacac kporucamabangecfu kecgec yenearu ifingoc fingecbesande.

Habuya habuya yeneng Kebu afehebesandae

¹⁶ Amma bangeha bangeha yeni wasaingicfocngina Yerusalaim taontoau dzikac kpegecdeac sueyunugec, yeni nga wasaingicfocngina dzikacfu tosea komoc kpema kecbesandae yeni yenahafoc sasawango kifasoc ngictau, kurumenggac wasaiareng habuya habuya yeneac Kebu ye fafoc heimima ngonducnemima eweheimigecdeac Yerusalaim taontoau enggecde. Emma bedzo bedzoac tatac nasoac hombang yeni imoc negensima hombanga tacbesandae.

¹⁷ Nga bangec monggac habu yeni ngictau, kurumenggac wasaiareng habuya habuya yeneac Kebu ye fafoc heimima ngonducnemima eweheimigecdeac Yerusalaim mi enggecdeu yeneac bangecfu kia mong mi kpebesande.

¹⁸ Amma Aigita habu yeni imohai emma sing imoc mi modacgecdeu yenearu kia mong mi kpehembesande. Kebungo bangeha bangehaac ngic Yerusalaim taontoau emma bedzo bedzoac tatac nasoac hombang imocac sing mi modacgecdeu, yenearu ebictoa fingerudeac deec, ebic imocngo Aigita habu yeneac witiu embesande.

¹⁹ Amma Aigita habu nga bangeha bangehaac ngic yeni bedzo bedzoac tatac nasoac hombang imocac sing mi modacgecdeu yenearu kopocsicac memeting imocnoc fingecyemmebesande.

²⁰ Naso imohai becosic yeneac ubau wesic faifaia ihai kibi yofi oho ohoya febesande, “Kebuac kpetiacareng.” Ammanu Kebuac womonnu kudzi nganoc tackende imocngo aratau enang tackende imoc isocngoc ambesande.

²¹ Ammanu Yerusalaim taontoau nga Yehuda bangecfu enang kudzi tackende imoc dzuacma, kurumenggac wasaiareng habuya habuya yeneac Kebu yeac amma kpetiac dedea. Ammanu ngicngac sasawa sesegerec faigecdeac sikebesandae yeni enang kudzi imohacnac goa mema sesegerecngina ihainoc ohobesandae. Ifi anggec, kurumenggac wasaiareng habuya habuya yeneac Kebu yeac womonnu, ngicngac kenacanareng yeneac nemu afeheyunuandae yeni ihai monggoc mi tacbesandae.