Dzekarya 13 - Deduamiti

Profete ikoha yeni gameyunubesande

¹ Kecma nasoya hasikebesandeu Dawidac kisic nga Yerusalaimgac ngicngac yeneac amma dokukiwa gboria mong erema doku imocngo kopocsicngina nga seucfakangina imoc sasawa dzuacdacbesande.

² Kurumenggac wasaiareng habuya habuya yeneac Kebungo yofi dede, “Naso imohai neng nemuonga yeneac kpac sasawa fede, imoc meickeba kpac anu nigecyunubesande. Amma bangecnginaunac asu seuhagoc nga yeac profetefora meicyunuma kisangyunubesandua.”

³ Anu yenearunac mongngo profete ua monggoc meudeu nonggomanghora yeri yofi edeecde, “Ge Kebuac kpacfu netohoma ikocyoac denecac kekecga kpac ambeso.” Ammanu yeng profeteyoac torokpema deudeu nonggomanghora yereng soengo nendanggema nebucgebesandape.

⁴ Naso imohaingoc profete sasawango kpefing hemma profeteyoacngina dekecdae imocac gameyunubesande. Anu ikocfu profeteac ngakpi dzoeyagoc heikecgec imoc hesima wabesandae.

⁵ Amma yofi degecde, “Ni profete kpac, ni semeng uamemengic. Ni fingeraiunacngoc heikpenecua mekecduae.”

⁶ Anu mongngo yofi kpesimibesande, “Mokucgau imoc noc yofocngo fede.” ifi dema kpesimiu turunga yofinoc deude, “Ogofocna yeneac amau eweing ihai nugec.”

Ramagareng kpekpea

⁷ Kurumenggac wasaiareng habuya habuya yeneac Kebungo yofi dede, “Wasaibeang ge yacma ramagareng neac hoannu nande, ye ngaba ammima kpena. Kpena rama yeni ticpactohoma worabesandae. Woramagec ni ramamedacfora marinango mefacyunuma ngadeyunubesandua.”

Ngicngac toseanec isingyunubesande

⁸ Kebungo yofi dede, “Bangec yomocac witiau guruamasoc ngicngac kpetengina kpadzi yohockanggacsoc kecdae imoc meicyunuba kpac ambesandae. Kpadzi mocguac ngicngac yenengsac kecbesandae.

⁹ Nga ngicngac kpetengina kpadzi mocguacsoc, yeni silwa dzuacgecdeac gerecfu faigec dzeu seuha isinggeandae me gol tobanggegecdeac gerecfu faigec dzeu isinggeandae ifi isocngoc ngicngacfocna gerecfu yonohoma isingyunubesandua. Anu yeni kpacna kpacbesandae, yeni turunga merengyemmebesandua. Amma ngicngacfocna deyemmeba yeneng yofi debesandae, ‘Kebu ye anutunina.’ ” Kebu ye Anutunina.