Dzekarya 12 - Deduamiti

Kebungo Yerusalaim onggongyunubesande

¹ Kebungo sawa mederema tiameec fede amma bangecac sering faiec nga ngic nenang hereu asu memengere amma faiec, yeng Isracel yeneac negemma profeteyoac yofi deu haec,

² “Ni neannaoc faka mebeso anduae, naso imohai Yerusalaim taong imoc bangec noboc noboc fekende yeneac minggonggac sokoc isoc anude. Ammanu Yerusalaim ama oronggema tidzickema Yehuda bangec hafoangoc ebicfu faibesandae.

³ Kecma naso debadeu faka meba Yerusalaim taongngo ngiha ngiha yenearu dzamandzing hoc isoc ebira yombong anu miacgecdeac ambibiema yenaocngoc memanganeemebesandae. Memanganeemema bangeha bangeha yeneng kpeturanggema ngaba sikemibesandae.

⁴ Naso imohai neng ngabafocngina yeneac becosic sasawa kengec meficgeyemmebesandua amma becosicfu kengkengngicfocngina ubangina mesufuba dabiebesandae nga wasaingic yeneac becosic sasawa kicpisic meyunudacma kicnango yehudahabu yenearubigeng fima gareng mebesandua.

⁵ Ifi ayemmeba yehudangic enarafocngina yeni ubaherenginau yofi negensigecde, ‘Kurumenggac wasaiareng habuya habuya yeneac Kebu yeng Anutunina kecdeac amma Yerusalaim mingina neni kucninagoc andimbe.’

⁶ Kecma naso debadeu faka meba Yehuda enara yeni gerec dzedzeango gerecguruac manau borangtiande isoc me ahakifango wit dedecac manau borangtide ifi isoc ambesandae. Amma kanaubigeng nga foiubigeng ngic habuya habuya noboc noboc kecdae, yeni memanganeyunudacbesandae. Memanganeyunudacma Yerusalaim mingina yeni Yerusalaim imohainoc monggoc kecbesandae.” Kebungo ifi dede.

⁷ Dawidac kisic nga Yerusalaim mingina yeneac kpac kunengngo yehudangicngac amau kecdae yeneac kpac kuneng mi feraheudeac Kebungo yehudangicngac amau kecdae, hanahema yeni komoc kpeyemmebesande.

⁸ Kecma Kebungo nasoya debesande, naso ihai ye ngicngac Yerusalaim taontoau kecdae, yeni kaso kpeyunuu komoc kpebesandae. Anu yeni kucmama kecdae, naso imohai yeneng kucnginagoc Dawid isoc ambesandae amma Dawidac kisic yeni Anutu isoc anggecde. Amma Kebuac angerongo yehudangicngac waraiyemmec, ye isoc yombong amma waraiyemmebesandae.

Nembac nembarackea yeac kiacsonggongtoa fingecbesande

⁹ Kecma nasoya hasikebesande, imohai neng bangeha bangeha yeneng Yerusalaim imohai hama Yerusalaim ngaba ammiandae, yeni memanganeyunudacbesandua.

¹⁰ Anu neng Dawidac kisic nga Yerusalaimgac ngicngac yenearu danggunuc nga nunumuac asu kpakeyemmebesandua. Anu nembaracnugec, ngic imoc yeni kicnginango nembesandae. Nemma nenggac manggac mong yereac morocmedacngira homeu yeac kiacsonggong angkecdape ifi isoc neac ambesandae. Me nenggac manggac yereng waracmedacngira mong homeu kiacubahodung angkecdape ifi isoc neac kiacubahodungtoa ambesandae.

¹¹ Naso imohai Yerusalaim taontoau kiacsonggongtoa fingerude imoc Megiddo tumiau Hadad-Rimmon bangecfu fingerec imocacsoc fingecbesande.

¹² Anu bangec imohai kiacsonggongtoa fingecbesande imoc siriha yofi fingecbesande, yeni arengnginasoc tembuc tembuc tacma kiacsonggongtoa ambesandae. Dawidac kisic yeni tembucngina ammagec enengfocngina yeni tembucngina nga Natanggac kisic yeni tembucngina ammagec enengfocngina yeni tembucnginangoc kiacsonggongtoa ambesandae.

¹³ Amma Lewiac kisic yeni ifingoc tembucngina ammagec enengfocngina yeni tembucnginangoc anggecde. Amma Simeciac kisic yeni tembucnginangoc anggecde nga enengfocngina yeni ifingoc tembucngina ambesandae.

¹⁴ Ifi ammagec kisiha kisiha yeni ifingoc tembuc tembuc tacma kiacsonggongtoa ambesandae nga enengfocngina yeni ifingoc tembucngoc tacma kiacsonggongtoa imoc ambesandae.