Dzekarya 11 - Deduamiti

Kiac ubahodunggac naso

¹ Lewanon negennec, gerecngo yomondzoc icga imoc dzedarudeac naguga witina.

² Yomondzoc ic yeni usukpe anggec amma ictoatoa yeni bangecfu kpehoac fekendae. Wete ic, ge kiacubahodung ambesena. Amma katetoa kpedac kpedaraac amma Basan bangecac saruc ic ngeni kiactoreng ambisia.

³ Ngictaunginaac kibikperagia imoc memangacmanganea imocac yeni kiacubahodung andae. Yardenggac hasengtoatoa imoc kpedac kpedaraac amma laionyang yeneng taua kpema arohodae.

Ramagareng siricngira yohockang

⁴ Kebu Anutunango yofi dede, “Yeni rama isoc kpehou anganggac areng imoc bic meisingyunuyunuya kecdae ge yeneac gareng kecbesena.

⁵ Rama ifia bummema kpehou angandae yeni memetinnu mi enggecde. Nga sueandae yeneng yofi deandae, ‘Ni ifi amma dzotoanagoc anduaeac Kebu dengereni.’ Ammanu garengfocngina yeneng sifu ubahodung mong mi negengyemmedae.”

⁶ Kebungo yofi dede, “Ni bangec yomocac mingina yeneac ubamangang monggoc mi ambade. Negenggec, ni ngeneac tosofocngina nga ngictaufocngina yeneac mariu enggecdeac faingunubade, faingunuba yeneng amabangecngina memanganemagec yeneac mariunac mi mesingunubade.”

⁷ Ni rama kpehou anganggac areng ebicfu enggec, yeneac gareng anai. Amma yasu yohockang meyuruma monggac kpara danggunucac yasu nga monggac kpara uba mocgu kekec, ifi kpacyuruyai. Ifi kpacyuruma ramagareng anai.

⁸ Amma afo mocguac manau gareng harebec meicyunuai. Yeni neac modzongina tiu sisicnuma herena miacgec.

⁹ Ifi anggec, rama imoc yeni yofi edeyunuyai, “Ni ngeneac gareng monggoc mi kecbade. Homecac areng ngeni naric homegecde. Nga sufu sufuac areng ngeni naric sufugecde. Amma noboha kecgecde ngeni ngenaocngoc kpebucemegecde.”

¹⁰ Ifi dema yasuna kpara danggunuc imoc mema tueyai. Tuema bangeha bangeha yenigoc dzadzahac warac anai, dzadzahac imoc herecgeai.

¹¹ Dzadzahac imoc wenac imohaingoc herec herecgea ammanu ramaareng ebicfu enggec yeneng nemma yofi negentegecgec, imoc Kebuac yoacnoc.

¹² Anu yofi edeyunuyai, “Ngeni negenggec naric andeu uabunna nenggec. Kpac anu wagec.” Anu yeni silwa dzo tetiacsoc ifi sigeriu faima nenggec.

¹³ Ifi anggec Kebungo yofi edenuec, “Neac negenggec soha anu dzo genggec imoc mema seseac katapau faina.” Ifi deu ni silwa dzo teti imoc mema Kebuac womonnu seseac katapau faiai.

¹⁴ Anu yasuna mong kpara uba mocgu kekec, imoc ifingoc tueyai. Tueba yehudangic nga isracelngic daramuna kekecngina imoc tohoec.

¹⁵ Anu Kebungo yofi edenuec, “Ge ramagareng uaac yasu nga iwai imoc monggoc mebesena amma yofinenggac ge ramagareng kapaya imocac ongea isoc ambesena.

¹⁶ Imoc yofiac, ni bangec yomohai gareng mong midima suebade, ye rama memanganeyunugec imoc yenenggareng mi anude. Nga kpekeng kpeha amma sinsararang kpegec imoc kpachofoc mi ayemmeude. Nga kubec nga sicusugoc kecdae imoc yeni mi mengereyunuude. Amma kucnginagoc kecdae imoc mi nanggeyunuude. Ye rama kerectoayagoc meyunuma fusingina nema gbongngina mekpacgema ukubesande.”

¹⁷ Ye ramagareng uamemeacsoc kpacac amma ramafora wayunuande amma ye ebictoa yombong meficgeemeude. Ye wasaibeangngo maria herecgeu maria kuha kpac ambeso amma kiwa foiaubigeng imoc kpema kpefockeu kiwa pisickeyombonggebeso.