Dzekarya 10 - Deduamiti

Kebungo ngicngacfora yungecyunubesande

¹ Kebungo semeng hania hania ngicngac sasawa nemmeande. Nga hoeng dzadzu kpemanu firang kpema kia taiu nenannu kia kpekecde, imoc yennoc deu fingeckecde. Imocac ngeni uau komoc gboria homec homecac nasou yeng deu kia kpeudeac numumibisia.

² Nemuonga yeni ikocnginagoc nga kpefingkpekpe yeni kpefing ikoha kpeandae amma gau hemma imocac hania sege segea dekpou angkecdae amma yoac fora kpacfu demekiri ayemmeandae. Ifi ayemmegec ngicngac yeni rama isoc kpekeng kpeha amma garenga kpac isoc kecma ebicfu engkecdae.

³ Ni gareng yeneac herebu negengyemmema enarafocngina kecdae yeni turunga kpouyemmebesandua. Amma kurumenggac wasaiareng habuya habuya yeneac Kebu ni neannaoc yehudahabu arengfocna yenenggareng ayemmeba yeni dzikacac becosic seria nga kuctoanginagoc isoc ambesandae.

⁴ Yeneac fingecsaheunac goango Yehudaareng yeneac hoc wotung seria anggecde. Goango habu yeneac nanggenanggengic anggecde, goango dzikacac tebe mehagecde. Amma yehudaareng yeni bangecgareng ua mebesandae.

⁵ Amma yeni yenahafocngoc gareng uangina mebesandae. Ngic kuctoanginagoc amma dzikac kpema ngabafocngina gotennu tirusueyunuandae, yeni kuc ifia mekecbesandae. Kebungo yenigoc kecdeac amma yeni dzikacfu firang amma ngabafocngina becosicfu kengkeng game kpekpeu faiyunubesandae.

⁶ Ni yehudahabu meseriyunubade. Amma Yosefac habu ebicfunac mesiyunuma bombangecnginau monggoc dzigenegecdeac wangecyunu hama amatatacngina mengerebesandua. Ni yeneac ubahodung negenganduaeac amma ni monggoc hoangyunuma yeni mi wayunuyai imocac sirihau kecbesandae. Ni Kebu Anutungina kecduaeac nunumungina negemma turunga merengngemmebade amma merengngemmebesandua.

⁷ Anu Efrayimngic yeni wasaingic kuctoanginagoc amma kecbesandae. Ammanu waindoku nema sogaiandae ifi isoc herenginau ubangerec fingecbesande. Anu nambaracfocngina yeneng Kebungo faka meec imoc hemma sogaima Kebuac ubangerec negembesandae.

⁸ Ni ngicngacfocna kpacyunuma kpedzucyunudacbesandua. Amma komoc kpeyemmeba kpetengina warac feec, ifi isocngoc monggoc fingecbesande.

⁹ Ni megigi ayemmeba yeni nambaracfocnginagoc ngiha ngiha yeneac botucfu amabangec hereau kendacbesandae nga sifu neac mi nigecyunubesande. Ifi kecma ihacnac fingecsahefocngina yeneng monggoc dzigenebesandae.

¹⁰ Ni Aigitabangecfunac monggoc meyunuma hesicyunuba bombangecnginau dzigenema Assur bangecfunac meyunuma kpedzucyunubesandua. Amma bangecnginau faiyunuba amabangec imoc sokodacma kengkecma Gilecad nga Lewanon bangecfu ihai wisickebesande.

¹¹ Efrayimngic yeni kondungdoku ebihagoc ferecgema siritembong menomanebesandae. Ammanu dokutoa dzohonga keme kemea yombong imoc dzikebesande. Naso imohai Assurac nendefefakayaac kuha mabesande amma Aigita ngictauac ngictauyasuya imoc meickebesande.

¹² Ni neanna kpacfu kuc yemmema meseriyunuba yeni neac kpacfu sing kembesandae. Imoc Kebuac dede.