Dzekarya 1 - Deduamiti

Ubamerenggac kpakpac fingerec

¹ Dareyawesngo Pares bangecac ngictau kefu kifa yohockang nga afo eit kemmanu Kebuac yoac yofi Iddo esea, Berekyaac medac profete Dzekarya yearu hau negenec:

² Kebungo bangecfocngina warac keceregec yeneac herebutoa negenec.

³ Imocac ge yehudangicngac yofi edeyununa, “Kurumenggac wasaiareng habuya habuya yeneac Kebu yeng yofi dede, ‘Ngeni dzigenema nearu hadacbisia, anu neng ifingoc dzigenema hoangngunubade.

⁴ Ngeni bangecfocngina warac keceregec yeni isoc mi ambisia.’ Warac profete kecgec yeneng yoacna dekperagiyemmema yofi degec, ‘Ngeni kopocsicac sing nga faka manganangina sasawa wadacma monggoc dzigenema hadacbisia.’ Ammanu yeneng yoacnaac kedzac mi kpema yoacna ngadehegec.

⁵ Amma ngeneac bangecfocngina yeni homedacgec nga profete yeni ifingoc homedacgec mong mi kecdae.

⁶ Anu neac nonosaeng yoacdedena imoc enacdedefocna profete yeneng degecdeac edeyunuai, nonosaeng imocngonoc faka meu bangecfocngina yeneng uba meremma yofi degec, ‘Kurumenggac wasaiareng habuya habuya yeneac Kebu ye yoara modacma fakaninaac sirihau ebiha nemmeec.’ ”

Profetengo beocsic yenenec

⁷ Dareyawesngo ngictau kefu kifa yohockang nga afo ilewen kpara sewa imocac uameme twentifo ammanu Kebuac yoacngo Iddo esea Berekyaac medac profete Dzekarya yearu yofi hau negenec.

⁸ Ni tofocnac ihai onga yofi henai, Ngic mongngo becosic sacsacac witiau tacma bangec urangau myrtle icn nangkenggec ihai hama botucnginau menininggema nanec. Nammanu yeac ngadeau becosic kpauc kpauc nga gbaung gbaung amma kongac kongac nanggec yenenai.

⁹ Yenemma yofi kpesimiai, “Kunenna, becosic imoc yeneac hania dena negemba.” Deba angero nigoc yoac deec, yeng yofi edenuec, “Imocac hania edzacguba hembesena.”

¹⁰ Ifi demanu Kebuac angero mongngo ngic tehec isoc myrtle ic botuhau nanec, yeng ni yofi edenuec, “Imoc yeni bangeha bangeha sasawa yerecgedacma amabangec hennegeng andacgecdeac Kebungo sueyunudac.

¹¹ Anu yeni bangeha bangeha yerecgedacma amabangec hennegeng andacgec,” imoc angero myrtle ic manau nanec ye yofi edegec, “Neni bangec sasawa yerecgedacma yofi hennegeng andimbe: Ngicngac sasawa yeni bacngisi nga ruaegoc kecdae.”

¹² Ifi degec Kebuac angero myrtle ic manau nanec, yeng yofi deec, “Kurumenggac wasaiareng habuya habuya yeneac Kebu geng kifa sewenti Yerusalaim nga Yehuda bangecac taong fekende yeneac herebu negenyemmenec amma kifa homac yombong ubamangangga segereyemmenec.”

¹³ Anu Kebungo angero nigoc yoacyoac anec, ye bacngisi nga mekic mekiriyoac edeec.

¹⁴ Edeu angero nigoc yoac deec, yeng ni yofi edenuec, “Ge kemma yofi dekperagiyemmena: Kurumenggac wasaiareng habuya habuya yeneac Kebu ye yofi dede, ‘Ni Yerusalaim nga Tsion amabangecnaac here negen negenna kunengngoc fede.

¹⁵ Amma bangec goa ruaegoc kecdae yeneac herebuna fede. Ni Yerusalaim herebu kapianec negengyemmebare yeneng neac herebuna torokpema ebic kuneng Yerusalaim ngicngac meficgeyemmegec.

¹⁶ Meficgeyemmegec ni Yerusalaimgac ubamangangtoa negemma monggoc dzigeneduae. Dzigeneba womonna monggoc heigborima megecde amma Yerusalaim taongtoa monggoc miacma gununggegec nanudeac yeni kpetememe witicnginagoc bangec yerecgema bangecac kpetea megecde.’ ”

¹⁷ Ifi dema yeng monggoc torokpema yofi dekperagibadeac edenuec, “Kurumenggac wasaiareng habuya habuya yeneac Kebu yeng yofi dede, ‘Taontoatoana tackende ihai hiedzongina monggoc wakema febesande. Amma Tsion bacngisina miba Yerusalaim ye neanna amabangec anudeac monggoc meisinggebesandua.’ ”

Dzekaryango baic foac onga henec

¹⁸ Anu ni kpehengaima onga mong monggoc henai imoc baic 4ac onga henai.

¹⁹ Anu angero nigoc yoacyoac anec ye baic neackpac yenenai yeneac hania edenuudeac kpesimiai. Kpesimiba yofi edenuec, “Baic neackpac imoc yenennoc Yehuda nga Isracel amma Yerusalaim kpetotieyunugec singsararang kpegec.”

²⁰ Ammanu Kebungo aiengmemengic neackpac hamanginagoc edzacnuec.

²¹ Edzacnuu yofi kpesimiai, “Yeni noc ua megecdeac hama nandae?” deba yeng yofi deec, “Baic neackpac imoc yeni ngaba, yeneng yehudahabu kpetotieyunugec sinsararang kpema kucmama amma orucngina miacma yacgecdeac ambibiegec. Imocac aiengmemengic neackpac yeneng, bangec goango yehudahabu baicngo yeneregec singsararang kpegec, yeni kengec meficgeyemmema yeneac baic imoc kpetackegecdeac hagec.”