Danicel 9 - Deduamiti

Danicelngo ngicngacfora yeneac numuec

¹ Ahaweros medaha Dareyawes ye madayngicngac yeneac fingecsaheunac anu yeni ye kasedingic yeneac eucererenggac ngictau anudeac desimigec.

² Ngic imoc ye ngictaungina amma kifa kpete mocgu garengyunuec, imohai Danicel ni kibikpoukpounina osoma kifaac kpete mong henai imoc yofi, Kebuac yoac profete Yeremia yearu yofi haec, “Yerusalaim kpedzamegec wisickeu ye kifa sewenti hafoangoc ifi manganema feude.”

³ Ifi negemma yakasege amma toruwamba heiba kemeu hama nadzicma kicmesuna Kebu Anutuaru meremma yeac kpara kpacma kpacsambic ammima ubaherena hafoangoc ye numumiai.

⁴ Amma ni neanna nga ngicngacfocna yeneac kopocsicngina deficgema Kebu Anutunaac numuma yofi deai, “Kebu Anutu Engenatoa ge damugagoc. Nga ngicngac ge songogoc hoangguandae nga geac dederecgeyoac modacma kecandae ge yenigoc dzadzahacga menec imoc modacma kecnec amma ge wosoefac ayemmeannec.

Neni fakanina dindingac kpac

⁵ Neni ine kopocsic meficgema faka dindingac mi modacma ubahereninau faka mangana arenggema imoc amma kecma ubakpekpe amma dederecgeyoacga nga desi desiyoacga ngadeheing.

⁶ Amma enactofoc tofohofocga profete yeni geac kpacfu ngictaufocnina nga ngicenarafocnina nga mangesafocnina amma bangecninau ngicngac sasawa yoac edeyunugec neni imoc yeneac kedzac kpema mi negengyemmeing.

⁷ O Kebu, dindingac kekec imoc geac nga game kpekpengo neneac ande. Yehudangic nga Yerusalaim ama mingina nga Isracel hafoangoc wegenac kecdae nga agac yombong kecdae yeni geac yoac wama yoac modac modacngina kpac kecgecac amma kisangyununa bangeha bangeha kemma kecdae.

⁸ O Kebu, neni geac kicfu kopocsic meficgeinggac game kpekpe imoc ngictaufocnina nga ngictaufocnina yeneac medacfocngina amma bangecfocnina neneac ande.

⁹ Kebu Anutunina geng neneac ubaga manganeu kopocsicnina wanadeac numugenduae. Neni geac yoacga nga ubaga kpekefing.

¹⁰ Anu Kebu Anutunina, ge profetefocga yenearusing singyoac seria nemmena neni imoc modacma kekecninagoc annideac fainemmenec. Nga neni ine ubaudumengga negennideac kedzac mong mi kpeing.

¹¹ Isracel sasawa neni geac singyoac ferahema imoc wama monnu kening. Neni geac ubaudumenggac kedzac mi kpema kopocsic meficgeinggac amma enactofoc tofohongicga Mosengo sowecyoac deserima dedeseri kibiu ohoec, imocngo witininau hetinggegec enec.

¹² Nga yeng yoara edenunuec imoc modacma uaya mema neni nga desi desingicfocnina yoacnina desinunuu neni yoacfu fainunuec. Ifi amma neneac witininau ebic kunengtoa faiec, wiac ifia warac kurumenggac bageau mong mi memea imoc Yerusalaim imohai fingerec.

¹³ Nga Moseac singyoacfu yoac oho ohoya fede ebic imoc sasawango yombong neneac witininau enec. Anu neni ine Kebu Anutuninaac kicmesuya menomanebeso mong mi negening. Neni kopocsicfakanina wama mong mi dzigeneing amma geac faka nga yoac fora imocac kedzac faima mong mi negening.

¹⁴ Anu Kebu Anutunina ye angammemea sasawa dindingac ammanu neni yeac ubaudumenggac kedzac mong mi kpeing. Imocac amma ye neneac witiu ebicnina mehaudeac nasoac tomai kefec.

O Kebu Anutunina

¹⁵ O Kebu Anutunina, ge mariga kuhagocngo Aigitabangecfunac ngicngacfocga hesicnununec imohai kpackunengga meficgenec nga imoc yofinenggac fedengoc. Amma ngicngacfocga neni ine kopocsic meficgema ubahereninau faka mangana arenggema imoc amma kefing.

¹⁶ Neneac kopocsic nga bangecfocninaac singyoac kpekpefakanginaac amma bangecareng sasawa yerecnunuma tacyac andae yeneng Yerusalaim nga ngicngacfocga neneac negenggec wiac mangana yombong andimbe. O Kebu, ge dindingacfakaga sasawa modacmana ngabaga nga herebugango geac kpetiac tikiga Yerusalaim amatoa wama kembeso.

¹⁷ O Anutunina, ge kedzac kpema enactofoc tofohongicgaac nunumu yomoc negenna. Nga geac kpacga kpacma kpacsambic anggemma sasawa numuduae imoc negenna. Amma ge geanggaac amma kicmesugango kpetiac womongga kpedzac kpedzamea mekperagina kperagiagoc monggoc ambeso.

¹⁸ Neni kpacsambic amma nunumunina kicgau mehadimbe imoc fakanina dindingacac amma kpac. Geac wosoefactoagaac amma numugendimbe. O Anutuna, kedzac faima yoacna negenna amma kicga fima wiacnina sasawa kpedzac kpedzamea henna. Nga amatoanina geac kpacgaac wase kpacandae imoc garenggena.

¹⁹ O Anutuna, taontoaga nga ngicngacfocga neni geac kpacga mekecdimbe, imocac ge kedzac kpema kopocsicnina wanemmena. Ge naso mi ukuna, faka mema meficnununa. O Kebu, imoc geanggaac amma ifi fingecbeso.”

Gawricel monggoc henec

²⁰ Anu ni Kebu Anutunaac kicfu neanna nga ngicngacarengfocna Isracel kopocsicninaac amma numuma dedefic deai amma yeac kpetiac tikiac ebic imoc negemma numumiai.

²¹ Anu ni tofocnac sesememe nasou nunumuyoac imoc debarengngoc Gawricelngo sawaunac kucgoc bic yombong neac hoannu hama maec. Ni yenoc warac gaukpefinnu henai.

²² Ye mama negengireckebadeac nigoc yoac denegeng amma yofi deec, “Danicel, yaguc negen negengga meireckebade nga negen negentegec gembadeac haduae.

²³ Anutungo ge heresongogoc yombong hoangguma kecdeac ge hanac hanaheau nunumuga fainec, imohai gearu habadeac yoac haec. Anu ni wiac dekperagigembadeac haduae. Imocac ge kedzac faima yoacna negenna amma kpefing hennec imoc negentegecbesena.

²⁴ Yoac yofi deserigec, geac taongga kpetiac nga ngicngacarengga yeneac ebicngina imoc sonda sewenti anu wisickeude. Imohai sing feraheandae imocac faka kpac ambeso nga kopocsicngina kpae faima kopocsicac ngaba meickebesandae. Amma dindingac kekec feengkefude imoc mehabesandae nga kpefinnu onga nga profeteyoac foraya fingecbeso amma kpetiac yeneac Kpetiac yombong kerecdoku nadzicmibesandae.

²⁵ Imocac amma ge yomoc negemma negentegecna, Yerusalaim ama monggoc mengere mebesonga yoac ifi fingec fingera erema Ngictaumedac kerecdokungo nadzicmimia yeng habeso ande, naso imoc yereac botucngirau sonda sewen nga sonda 62 anude. Naso imohai ebicnginagoc kecma taonnu sing gboria megecde amma ngaba yeneac kasoac dokuac sing keme kemea momoc usugecde.

²⁶ Anu sonda 62 imoc wisickeu kerecdokungo nadzicmimia ye herecgegecde nga yeac wiac femiec imoc kpac anude. Amma ngictau monggac ngicngacareng yeneng hama taontoa nga kpetiac womong kpembarackema hesisickedacgecde. Anu dzikac fekemmanu wisic wisickea imoc dokutunggbaung haande, ifi isoc hama wiac kpedzamegecde imoc bic deserigec. Yoac imoc seria febesande.

²⁷ Anu ye sonda mocguac manau dzadzahac mong imoc ngicngacareng homac yenigoc dzegeude. Amma sonda botuhau yeng seseac yang hafoangoc dzeande nga seseac yaka faifai imoc dema meickeu kpac anude. Anu kpedzac kpedzamengic ye wiac faka mangac manganea mi angana yombonggac kpeganga witiau haude. Anu kecma wisic wisickeau memeting bic deserigec imoc yeac witiau hetinggegec ye kpetotiebesande.”