Danicel 8 - Deduamiti

Danicelac kpefing kpete yohockang

¹ Belsatsarngo ngictau kefec, imocac kifa kpete harebec ammanu Danicel ni onga monggoc kpefinnu fingecnenec, nga warac fingecnenecmoc imocac ngadeau anec.

² Amma ni kpefinnu hemba yofi fingerec, ni kpefinnu Elam provinsiu Susaac amaseria hocodayagoc imohai nanai. Namma kpefinnungoc hemma Ulai dokusing usu usuya imocac tegiau nanai.

Ramangiwa baiha yohockang

³ Amma kicna fiba enu hemba ramangiwa mong doku tegiau nanec, ye baiha herea yohockang nga ngade ereec imocngo ogea feraheyombonggema nanec.

⁴ Anu hembare ramangiwa ye baihango wenac keme kemeaubigeng nga notbigeng amma saoutbigeng heiec nga yang sasawa yenearunac mongngo yeac kicfu serima mi nanggec. Nga mongngo yeac mariunac mesiyunuudeacasoc mi anec. Nga ye songea modacma faka hania hania mema kuctoayagoc anec.

Noningngiwa baiha mocgu

⁵ Anu kpefinnungoc imocac hania negembadeac negembibiema kic fima hemba noningngiwa mong wenac keme kemeaunac haec. Amma ye baiha wiac kuneng kiwaac botucngirau nanec nga ye bangec mong mi kpeserema bangectoa bangecac witiau kenec.

⁶ Kemma ramangiwa baiha yohockang warac doku tegiau nanu henaimoc mewegenema yearu herebuac kucfu kucgoc nedzima kenec.

⁷ Ifi hemma nambareng ye ramangiwaac wegenahau yombong kemma herebuac kucfu ramangiwa baihango heiec. Heima baiha yohockangngoc hetackeecac ramangiwa ye noningngiwaac kicfu serima nanudeac kuha kpac anec. Anu noningngiwango hefahau bangecfu makpeu tidzameu mongngo ramangiwa yeac mariunac mesiudeacsoc mi anec.

Noningngiwaac baiha neackpac eregec

⁸ Anu noningngiwa ye kuha monggoc nga monggoc anec. Kuhagoc yombong ammanu baiha kuneng imoc usuu imocac tatahau baiha neackpac kucnginagoc erema kurumenggac firang neackpac imohaibigeng nanggec.

⁹ Anu yenearunac monnu baic mocgu ereec, imoc wiac kapia amma yadikecma kuneng amma sautbigeng nga wenac ere ereaubigeng amma bangec kibikperagiagoc imohaibigeng yadiec.

¹⁰ Anu yeng yadiengkecma kurumenga kurumengaac wasaiareng yeni meficyunuma areng imoc yenearunac goa nga asomeng yenearunac goa mayunuudeac ayemmema bangecfu ukuyunuu magec tidzameyunuec.

¹¹ Amma ye ifingoc kurumeng wasaiareng yeneac kuneng yombongngina, ye emmima yearunac sese wenacsoc faiandae imoc meickema yeac womonggac tatac imoc kpedzameec.

¹² Amma sese nasosoc faiandae imoc meickegec imohai kopocsicac amma wasaiareng kuneng mong yeac mariu faigec. Anu baic imocngo yoac fora amma faka fora ngadehema bangecfu ukuu maec. Nga ye faka nga wiac mong meudeac negenu imoc fingecdarec.

Kpetiacngic monggac kpesi kpesi

¹³ Anu negemba kpetiacngic mongngo yoac deu kpetiacngic ogeango meremma yofi edeec, “Kpefinnu wiac yofi henai, wenaha wenaha sese faifai imocac meic meickeyoac nga Anutu ngadehema wagecac bangec manganeyombonggeudeac amma wasaiarengtoa nga Anutuac kpetiac womong tidzamegec, faka imoc hanaheu naso dafiguc ifi angkecmagec faka imoc wisickebesande?”

¹⁴ Ifi kpesimiba yofi edenuec, “Tofocnac nga asoac 2 300 wisickeu wiac sasawa imoc kpac anude. Anu imocac witiau kpetiac womong monggoc mengerema kpetiac monggoc anudeac desibesandae.”

Angero Gawricelngo gaukpefinggac hania deec

¹⁵ Anu Danicel ni kpefinnu onga imoc hemma hania negentegecbadeac negen negeng ua mekecbareng ngic isoc mongngo kicnau fingecma nanu henai.

¹⁶ Ammanu Ulai doku witiaunac ngicac ubaudumeng mongngo kpacma yofi deu negenai, “Gawricel, ge ngic kpefing hendac imocac hania deireckemina imoc negentegecbeso.”

¹⁷ Ifi deu ye ni nambare neac hoannau hau ni kengec kuneng yombong amma kicmesuna bangecfu hetutuckema makpema feba yofi edenuec, “Bangecngic, kpefinnu onga hennegeng andang imoc naso wisic wisickeau fingerudeac kedzac faima negenna.”

¹⁸ Yoac ifi edenu nammanu kicna gigiu bangecfu makpema hetutuckema gau kuneng feai. Feba yeng kpeserenuma miacnuu nanannau nanai.

¹⁹ Namba yofi deec, “Ge naso wisic wisickeaac onga hendang. Negennec, herebuac naso wisic wisickeau wiac fingecbesande ge imoc negennadeac edeguduae.

²⁰ Ramangiwa baiha yohockang hendang imoc Maday nga Parasbangec imoc yeneac ngictaufocngina.

²¹ Nga noningngiwa dzotoayagoc imoc ye Yawan ngictau nga baiha kuneng kiwaac botucngirau ereec imoc bangec imocac ngictaungina warac warac kefec.

²² Nga baiha usuu imocac tatahau baic neackpac eregec imoc bangecarennunac eucerereng neackpac eregecde nga yeni kucngina imoc yeac isoc mi ambesande.

²³ Nga ngictau imoc yeneac nasongina wisic wisickeaubigeng godzungic fakanginaac kpete imoc wake wakea ammanu ngictau mong ereude, yeng nendefe yombong amma sing dindingac memgbaringgeudeac negen negentegectoayagoc ambesande.

²⁴ Anu ngictau imocngo kuhagoc yombong ambesande amma ngictau warac warac ye isoc kpac. Ye ine wiac memanganeude amma kpedzameude imoc wiac kuneng anudeac yeac yofi negenggecde, ye wiac mangana yombong. Anu ye wiac sasawa ambeso me mebeso negenude, imoc ifingoc anu fingerude. Ye ngickuneng kucnginagoc kpetotieyunudacma ngicngacareng kpetiac ifingoc kpetotieyunuude.

²⁵ Ye wiac memanganeudeac negen negentegehagoc yombong anudeac ikocfakayango kicngina mesufuyombonggeude. Anu yeac ubahereau nendefeyoac monggoc yombong yadiude. Amma ngicngac ebic mong mi fingecyemmeudeac negemma kecgec yeng ngicngacareng homac kpetotieyunudarude. Amma ye ngictau yeneac Ngictau emmiude. Ifi anu ngicngo faka mong mi meu eng hetackegec kpac ambesande.

²⁶ Amma tofocnac nga asoac, kpefing imocac dedea imoc fora ande. Nga kpefing imoc ngadeguc yombong fingecbesandeac geng imoc sufu sufu mekecbesena.”

²⁷ Anu Danicel ni kucmama amma uameme goa hafei anenec. Amma sifu yacma ngictauac ua meai. Nga kpefing imoc negemba wiac kuneng anu negentegecbadeacsoc mi anai.