Danicel 6 - Deduamiti

Danicel ngickuneng kpac miec

¹ Anu Dareyawes ye eucererenggac provinsiac ngickuneng 120 faiyunugecdeac deseriec. Ngickuneng imoc yeni yeac bageu provins sasawa garengyunugecde, ifi negenec. Amma ye kpacngina satrap yemmema uayoac yemmeec.

² Nga eucererenggac ngickuneng harebec meisingyunuma yeni satrap sasawa garengyunugecdeac faiyunuec, nga Danicel ye harebec yenearunac mong. Ngickuneng harebec yeneac uangina yofi anec, ngictauac wiac nganoc mong mi sufuude me manganeudeac satrap yeneng eucererenggac ngickuneng harebec dzoac nga uanginaac siduc hafoangoc ohoma yemmegecde. Ngic harebec yeneng imoc henggareng angkecgecdeac deec.

³ Amma Danicel ye asu wiac engena siriha mong yombong femiec imoc eucererenggac ngickuneng nga satrapngic ua mekecgec yeni feracyunudarec. Imocac amma ngictau ye eucerereng hafoangoc imocac ngickuneng amma garenggeudeac uayoac miudeac negensiec.

Ngickuneng keracmangang anggec

⁴ Anu Danicel ye eucererenggac ua mekecfu eucererenggac ngickuneng tosea nga satrap yeni yofi negemma yeac uaya piti hennegeng angkecma degec, “Ye uaya gombunga mi meudeu ye yoacfu fainide.” Anu ye yoac modac modacngic yombong amma uaya mong mi memanganeec nga yeac uaac mongngo modzotitiyoac mong mi degecac ngic yeni yoacfu faigecdeac hania obohogec.

⁵ Ifi obohoma ngic imoc yeni yofi degec, “Nenang Danicel yoacfu fainideac wiac mong mi meficgedimbe. Ye Anutuyaac singyoac modacma kecde, imohaisac wiac mong meficgebing gedang.”

⁶ Ifi dema eucererenggac ngickuneng nga gawana satrap yeni ngictauaru kemma yoac yofi degec, “O ngictau Dareyawes ge nasoya nasoya kecengkecbesena!

⁷ Eucererenggac ngickuneng sasawa nga satrap nga ngic yoac negen negentegecgoc yemmekecgec amma gawana neni sasawango uba mocgu amma negendimbe yoacseria mong ohoma singseria mong yofi deseribesonga. Uameme tetiac manau ngictau geac kpacsac kpacma numugembeso. Yeni anutu mong me ngic mong eweheimima numuyemmegecdeac kpae heiyemmebisina. Anu mong ye ifi mi anudeu laionyanggac teng manau ukugec kemebeso.

⁸ O ngictau, kibi oho ohongic yeneng yoacseria kibiu ohogec ge kpacga ohoma imocngo meserina kibi imoc ngicngac sasawa yeneac kicnginau faibisia. Ifi anna imocngo Madaybangec nga Parasbangec neneac singyoac amma mi kpac anude nga imoc meickegecdeac sing mong mi feude.”

⁹ Ifi degecac ngictau Dareyawes ye singseriakibi imocac bageau kpara ohou imoc ngicngac sasawa yeneac kicnginau faigec hendacbisia.

Danicel ye ameau Anutuya numumiec

¹⁰ Anu ngictaungo kpara kibiu ohou ngic kicnginau faigec Danicel ye imoc hemma negemma ameau enec. Nga ameaac mana wi imohai firangnaguya Yerusalaimbingeng witi witia wau nangkecgec. Ye imohai kemma angande, ifi isoc amma wenacsoc atac harebec Anutuyaac kicfu fafoc heimima ye dangge edema numumikefec.

¹¹ Amma ye Anutuya kpacsambic ammima numumimanungoc ngichabu imoc yeni uba mocgu amma ameau hama Danicel henggec.

¹² Ifi hemma yeni ngictauac kicfu bic kemma yeac yoacseria heigborimima yofi degec, “O ngictau, geng yoacseria mong yofi kicnginau faigecdeac denec, ‘Uameme tetiac manau ngictau geac kpacsac kpacma numugembeso. Yeni anutu mong me ngic mong eweheimima numuyemmegecdeac kpae heiyemmebisina. Anu mong ye ifi mi anudeu laionyanggac teng manau ukugec kemebeso.’ Ge kpae imoc meserinadeac kpacga ohonec me?” Degec ngictaungo yoac yofi merengyemmeec, “Yoac imoc fora yombong. Imocngo madayngic nga parsengic neneac singyoac amma imoc mi kpac anude. Imoc meickegecdeac sing mong mi fede.”

¹³ Anu yeni ngictauac kicfu yofi degec, “Ngicareng Yehudabangecfunac wangecyunugec hagec, ngic imoc yenearunac mong, Danicel, ngic imoc ye geac eweheihei mong mi femiu yoacseriau kpacga ohonec imoc wama wenacsoc naso harebec anutuya kpacsambic ammima numumiande.”

¹⁴ Ifi degec ngictaungo yoac imoc negemma negenu manganeyombonggeu Danicel ebicfunac dafi mesima onggonggeudeac negen negeng uatoa mema kecmanu wenackiwa kemeec.

Laiongyang yeneac tennu ukugec kemeec

¹⁵ Anu ngic imoc yeni gurugoc ngictauaru hama yofi edegec, “O ngictau, negenna, madai nga parasngic singyoacnina yofi fede, ngictaungo yoacseria me singseria mong meseriude, imohai imocac meic meickeac sing mong mi fede.”

¹⁶ Ifi degec ngictaungo dederecge ayemmeu yeni Danicel mema kemma laion yeneac tennu ukugec kemeec. Kemeu ngictaungo Danicel yofi edeec, “Anutuga tatahoc eweheimima kecnecmoc yeng ebicfunac mesigubeso.”

¹⁷ Anu yeni hoctoa mong mehama imocngo teng enara hedzickegec. Anu Danicel heimefic mong mi ammigecdeac ngictaungo ringa ongeagoc amma ngickunengfora kecgec yeneac ring onganginagocngo kpae faiec.

¹⁸ Faigec wisickeu ngictau ye amau kemma tofocnac hafoangoc imohai yakasege kecma songo meficgeudeac faka angkecgec imoc yeni mi hagecdeac edeyunuec amma ye gau feudeac gau hoforec.

Anutunango angeroya sueec

¹⁹ Anu ngictau ye amanegeng yacma laion yeneac teng enarau kenec.

²⁰ Ye Danicel teng tarec imohai kensikema ubahodunggac ubaudumenggoc kpacma deec, “Danicel, Danicel, Anutu kekehagocac enactofoc tofohongic, ge Anutuga tatahoc eweheimima kecnec, yeng laion yenearunac mesiguudeacsoc andac me?”

²¹ Deu Danicelngo deec, “O ngictau, ge nasoya nasoya kecengkecbesena!

²² Ni yeac kicfu kopocsicna kpac nga ngictau ge mong mi memanganeguaiac Anutunango imoc hemma angeroya sueu yeng laion yeneac enacngina medzickeu mong mi memanganenudau.”

²³ Ifi deu ngictaungo sogaiyombonggema Danicel tennunac kpedzigec ereudeac edeyunuec. Anu ye Anutuya negensinggeecac amma sebiau kubecnganoc mong mi henggec.

²⁴ Anu ngictaungo deu ngic Danicel yoacfu faigec imoc yeni nga enemmedacfocngina meyunu hama laion yeneac tennu ukuyunugec. Ukuyunugec teng buyau mi kememagecngoc laion yeneng imohaingoc bic yuma sicngina sasawa kitackedacgec.

Ye Anutu kekehagoc

²⁵ Anu ngictau Dareyawesngo ngicngac bangeha bangeha kecdae nga bangecareng sasawa amma yoacga yoacna sasawa bangectoa bangecfu kecdacgecmoc yenearu yeac kibi yofi ohoma faigecdeac edeyunuec, “Ruaengina yadiseri ambeso!

²⁶ Ni kibi yomoc ngemmema yoacseria mong yofi faiduae, ngicngac neac eucererennu noboc noboc kecdacdae ngeni Danicelac Anutuya yeac kicfu dzonong fedefede nga damugoc kecbisia, Yennoc Anutu kekehagoc ye kecengkefude nga kecbesande. Yeac eucerereng imoc naric mi kpetotiebesandae. Yeng Ngictaungina amma ngicngac garengyunuma kecde, faka imoc nasoya nasoya fekengkecbesande.

²⁷ Yeng ngicngacfora ebicfunac mesiyunuude nga onggongyunuude. Ye negensinggegecdeac faka kuhagoc nga faka morora kurumennu nga bangecfu meande. Yennoc Danicel laionyang yeneac kucginaunac mesidac.”

²⁸ Anu Dareyawesac ngictaunasoyau nga paresngic Koresac ngictaunasoyau Danicel ye kuctoayagoc anu kekeha ngereeyombonggeec.