Danicel 5 - Deduamiti

Beltesatsarngo fatatoa faiec

¹ Anu ngictau Belesatsarngo ngickunengfora 1,000 yeneac fatatoa mong faima heitaiyunuu hagec yenigoc waindoku neec.

² Amma ye imoc nehemma dederecge ayemmema yofi anggecdeac deec. Yeac mama Newukadnetsar, yeng warac Yerusalaimgac kpetiac womong imohacnac kpakenec gol nga silwango memea mehaec, imoc mehagecdeac edeyunuu mehagec. Mehagec ngictau nga ngickunengfora amma enengfora nga ngacfora tosea yeni kpakenec imohai negecdeac deec.

³ Deu kemma kpakenec golngo memea warac Yerusalaim taontoau Anutuac kpetiac womonnunac mehaec, imoc mehagec. Mehagec ngictau yengena nga ngickunengfora amma enengfora nga ngacfora tosea yeni kpakenec imohai negec.

⁴ Anu waindoku nema naso imohaingoc anutungina gol, silwa, aieng sacsac, aieng nga ic amma hocngo memea imoc dengereyunugec.

Mari mongngo kibi ohoec

⁵ Ifi ammagec naso imohaingoc ngicac mari gbongngo fingectegecma ngictauac amatoaac parannu hocweroc kongac kongacngo oho ohoya imohai kifatoa wegenahau kibi ohou fingerec. Anu ngictau ye mari ohoec imoc kiwango henec.

⁶ Hemma ngictau ye kicmesuya meaiu negen negengau negen negeng hania hania fingeru ubaebic meficgema hanimaria kuha kpac anu dzonoma fedeec.

⁷ Ifi fingecmiu kucgoc yombong arohoma kpacma ngic asu hania hania meicyunuandae nga kasedingic amma asomeng yenemma kpefingyoac deandae imoc yeni yearu bic hesicyunu hagecdeac dederecge ayemmeec. Deu hagec Bawelac negen negengngic yofi edeyunuec, “Ngic mong ye kibi oho ohoya imoc osou negembade amma imocac hania dekperaginenude, ye wamba kibia giweng heimima kubu golngo memea ubahemima kuc miba eucererennau ngickuneng ngictau bageau kpete harebec ua imoc meudeac faiba yeng garengyunuude.”

⁸ Anu ngictauac ngicfora negen negentegecnginagoc imoc yeni sasawango ngictauaru eregec amma kibi oho ohoya imoc osogecdeac obohogec amma hania dekperagigecdeac ifingoc obohogec.

⁹ Obohogec ngictau Belesatsar ye kicmesuya meaiyombonggeu ongea worau ngickunengfora yeni ifingoc obohoma kengec kuneng amma dafi anggecde, imoc mi ireckegec.

¹⁰ Tacgec ngictauac nonggea ngactaungo ngictau nga ngickunengfora yoac dafi degec, imoc negenec. Negemma nenedoku netacgec mana ihai emma yofi edeec, “O ngictau, ge nasoya nasoya kecengkecbesena, kicmesuga meaima siriha mong mi ambeso nga negen negenggau wiac fingecde imocngo ubaebic mi meficgegembeso.

¹¹ Ngic mong eucererenggau kecde ye anutu kpetiac yeneac asugoc kecde. Nga geac manggaac nasou negen negeng irec ireckea nga negengising amma negen negentegec imoc anutu yeneac negen negentegec isoc ngic yearu meficgegec. Ifi meficgema mangga Newukadnetsarngo Danicel meisinggema kpefingdedengic nga ngic asu hania hania meicyunuandae amma kasedingic nga ngic asomeng yenemma kpefing deandae imoc yeneac enarangina anudeac uayoac miec.

¹² Imoc yofiac, ye asu wiac engena siriha mong yombong femiec nga negen negeng amma negen ising femiec. Ye gaukpefinggac hania naric deudeacsoc anec amma yoac sufu sufuya deireckekefec amma wiac dzege dzegea mesiec, imocac amma manggacga ngictaungo Danicel kpara mong Beltesactsar miecmoc ye meisinggeec. Imocac ngeni Danicel kpacgec yeng hama hania dekperagigenude.”

Danicelngo kibi oho ohoyaac hania dekperagiec

¹³ Anu Danicel ngictauac kicfu wangec hagec ngictaungo yoac yofi dema edeec, “Ge Danicel, mannango ngictau kefec imohai ngicareng Yehudabangecfunac wangecngunu hagec, ge ngic imoc yenearunac mong.

¹⁴ Nga geac yofi degec negenai, anutu yeneac asungo gegoc kecdeac negen negeng irec ireckea nga negen ising amma negen negentegec imoc wiac kuneng fegende.

¹⁵ Anu yaguc ngic negen negentegecnginagoc nga ngic asu hania hania meicyunuandae imoc yeni neac hoannu wangecyunuma eregec kibi oho ohoya imoc osoma hania dekperaginenggec negembadeac hadau nga yeni ine imoc osogecdeacsoc mi andau amma imocac hania dekperaginenggecdeacsoc mi andau.

¹⁶ Amma yeni geac yofi degec negendua, geng naric wiac hania haniaac hania dekperaginadeacsoc annec nga wiac dzege dzegea imoc ifingoc yungecannec. Imocac ge yaguc kibi oho ohoya imoc osona negembade imocacsoc annade nga hania dekperaginennadeacsoc annadeu ni wamba kibia giweng heigemma kubu golngo memea imoc ubahegemba eucererennau ngickuneng kpetea harebec annade.”

¹⁷ Ifi deu Danicelngo yoac yofi meremmiec, “Ubangerecgaac wiac nennadeac denec imoc geangga fegenu nga ua meduaac ubangerec wiac imoc ngic goa yemmebesena. Nga ni ine naric eng kibi oho ohoya imoc osogemba negennade amma ngictau ge imocac hania dekperagigembade.

Newukadnetsarac siduc

¹⁸ O ngictau, Anutu Engenatoango eucerereng, ngickunengkekec nga eweheihei nga kibikperagi amma ngictaukekec mangga Newukadnetsar miec.

¹⁹ Miu ngickunengkekec imocngo Ngicngac bangeha bangeha kecdae nga bangecareng sasawa amma yoacga yoacna sasawa yeni ayemmeu yeac kicfu dzonongngina fedeu kengectoanginagoc anggec. Ye ngic mong kpehomebeso negenec ye kpehomeec nga monggac negenu ngereeu ye naric kefude deec amma monggac negenu naric anu miarec nga monggac negenu naric mi anu memaec.

²⁰ Amma imohai ine sebiengeng amma ubaherea nga ongaasuya manganau seriyombonggeu ngicngacfora mangana ayemmekefec imohai ye ngictau tatahaunac meickegec nga kibikperagiagoc kekec imoc yearunac wangecgec.

²¹ Ye ngicngac nga ngickekefunac kisanggec meickeu negen negenga imoc yamberec yeneac negen negeng isoc anec. Anu kisanggec katedonggi yeni isoc kefec. Anu burumakangiwa kpindzing gumeandae ifi isoc gumegec nga sawaunac asomeng dzimbongngo sebia heiu boroc boroc angkefec. Ifi kefu wisickeu yofi negengireckeec, Anutu Engenatoa ye kuctoayagoc. Ye bangecngicngac eucererengnginaac kunenga amma monggac me monggac negenu ngereeudesoc meisinggema imoc garenggeudeac faude.

Belesatsar

²² Anu ge yeac medaha Belesatsarngo faka imoc sasawaac hania negennec amma ubaga mong mi memaemenec.

²³ Ge ine geanggaac negenna engena anu kurumenga kurumengaac kunenga kecde, ye wiac mamea, ifi negennec. Ifi negemma kpakenec nga teragedanga yeac amaunac megec, imoc gearu mehagecdeac edeyununa ngickunengfocgagoc nga enengfocga amma ngacfocga tosea yenigoc imohai waindoku nedau. Ifi nema kecma anutu nga nemuongangina silwa, gol, aieng sacsac, aiengtehec nga ic amma hocngo memea dengereyunuma eweheiyemmedau. Nga nemuonga imoc ifia yeni kicnginango wiac mong naric mi henggecde nga kedzacnginango wiac mong naric mi negenggecde amma yeni negen negengngina kpac, ge wiac imoc eweheiyemmema kecnec. Anu asutaitaiga yombong imoc Anutuac mariau tacde amma angammemega sasawaac mingina nga kunenga, ye ine mi dengerema eweheihei ammiannec.

²⁴ Imocacnoc yeng mari imoc sueu kibi imoc ohodac.

²⁵ Nga kibi oho ohoya fingecdac imoc yofi, ‘Mene mene tekel u-farsin.’

²⁶ Kibi oho ohoya imocac titiha yofi, Mene, imocac hania yofi, Anutungo eucereerenggaac kpetea osoerekefu nasoya yagucnoc wisickede.

²⁷ Tekel, imoc yofi, ebicgaac kpetea bic mema sigeriu isingguma henggec ebicga soha mi ande.

²⁸ Nga Peres, imoc yofi, eucererengga imoc bic hendziru yohockang anu madayangicngac nga parasngicngac yemmedac.”

²⁹ Danicel ye ifi desiu Belesatsarngo imohaingoc deu wamba kibia giweng heimima kubu golngo memea ubahemigec nga uayoac migec yeng eucererenggac ngickuneng kpetea harebec anec.

³⁰ Anu tofocnac imohaingoc kadesingic yeneac ngictau Belesatsar kpehomegec.

³¹ Kpehomema madayngic Dareyawesngo eucerereng imocac ngictau kefudeac uayoac migec meec. Ngic imoc ye naso imohai kifaya 62 anec.