Danicel 4 - Deduamiti

Kibi ohou eucererenga sokodacbeso

¹ Anu Newukadnetsarngo kibi mong yofi ohoec, Ni ngictau Newukadnetsarngo kibi yomoc Ngicngac bangeha bangeha kecdae nga bangecareng sasawa amma yoacga yoacna bangectoa bangecfu kecdaemoc ngenearu faiduae. Ruae ngenearu yadiseri ambeso!

² Amma Anutu Engenatoango ni faka kuhagoc nga mi hehena anendac imoc dekperagingemmebadeac negemba ngereede.

³ Yeac fakaya kuhagoc sasawa imoc wiac engena! Yeac faka mi hehena imoc yeni wiac kuhagoc! Yeac eucerereng imoc feengkefude. Yeng imocac kunenga amma garenggekecde imoc fingecsahe nga fingecsahe feengkecbesande.

Gaukpefing henu ubaongea ebiriec

⁴ Newukadnetsar ni amanau ebicna kpac kefai amma ngictauamanau wiac gombunga gombunga mekecma naric yombong kefai.

⁵ Kecma gaukpefing mong hemba kengecnuec. Ni kpefing henai imocac fefenau fema negen negennau negen negeng hania hania negemma imocac kengec amba ubaongana ebiriec.

⁶ Ebiriu Bawelac ngic negen negengnginagoc sasawa gaukpefing imocac hania dekperaginenggecdeac hesicyunugec habisia, yoacseria imoc faiba kendarec.

⁷ Anu kpefingdedengic nga ngic asu hania hania meicyunuandae nga kasedingic nga asomeng yenemma kpefingyoac deandae yeni neac kicfu eregec. Eregec ni gaukpefinna edeyunuba yeni imocac hania mong mi dekperaginenggecdeacsoc anggec.

⁸ Anu wisic wisickeau Danicelngo erema neac kicfu nanec. Yeac kpara mong Beltesactsar imoc neac anutunaac kparaac wasea. Nga ye anutu kpetiac yeneac asugoc kecdeac neac hoannu ereu gaukpefinna edeai.

⁹ O Beltesactsar, mamocngic yeneac kunengngina! Ni negenduae, anutu kpetiac yeneac asungo geac ubaheregau kecde, nga wiac sufu sufu sasawa imoc naric dekperaginemmenadeacsoc annec. Imocac amma ge onga gaukpefinnu henaimoc imocac hania edenuna.

Ictoa

¹⁰ Ni fefenau fema orucnau gauu onga hemba imoc yofi anec. Ni kic fima hemba ic mong herea yombong bangec botuhau nanec.

¹¹ Namma ic imocngo kuneng yadima kuhagoc amma herea yombong nga susiango kurumeng kpesereec. Ifi kpesereu bangec tegia noboc noboc kecgec yeni imoc naric hendacgec.

¹² Nga maria tengging tengging siriha gombunga yombong anec amma foraya homac fingeru sasawango negebec anggecdeacsoc feec. Nga imocac haniau funucfu tumiatoaac yang hania hania yeneng hama fenegeng kecgec amma sawaac neng yeneng faecngina fawau mema kecgec. Ic imocngo bangecfu kekecnginagoc sasawa yaka meficgeyemmec.

Ic heigec kpeu

¹³ Anu fefenau fema ongau hemba kurumennunac kpetiac gareng wiac hennegeng angandae yenearunac mongngo maec.

¹⁴ Mama yoac yofi dema kucgoc arohoec, “Ic heigec kpeu fawa sasawa kpetarima maria tengging tengging mesidacma foraya ukugec sicsauc madacbeso. Tumiatoaac yang yeni bageaunac meickema worabisia. Neng yeni fawaunac worabisia.

¹⁵ Ic tofea imoc ine godeagoc bangecfu wagec tacbeso. Ngeni imoc aiengngo nga aieng sacsacngo witickebisia. Ye ihai tumiatoaac kpindzing gombunga erede imohai tacbeso nga asomeng dzimbongngo sawaunac heiu boroc boroc ambeso. Kekeha imoc yang yenigoc kpindzingbangecfu kecbeso.

¹⁶ Ye ubea nga momoronga ngic negen negeng monggoc mi ambeso. Yeni ine imoc meremma yang yeneac negen negeng migec ye ifi kecma kifa seweng kecbeso.

¹⁷ Gareng wiac hennegeng angandae yeneng yoac imoc desigec ifi kecbeso. Kpetiacareng yeni yoacfu desima hania ifi dedae. Engenatoa ye bangecngic yeneac eucererengnginaac ngickuneng amma yeng garengyunuma kecde. Yenearunac monggac negenu ngereeude, ye eucerereng naric miude, ye ngicngacarennunac mameangina mong naric miaru kuneng kefude. Ngicngac kecdae yeni imoc ngeneggecdeac ifi angkecde.”

¹⁸ Ni ngictau Newukadnetsarngo gaukpefing imoc hendua. Eucererennau ngic negen negengnginagoc sasawa kecdae yeni hania dekperagima edenugecdeacsoc mong mi andae. Nga anutu kpetiac yeneac asungo gearu kecdeac imocac hania imoc Beltesactsar geng imoc edenunadeacsoc annec.

Danicelngo gauac hania edeec

¹⁹ Anu Danicel kpara mong Beltesactsarngo negen negeng fingecmiec imocac kengectoa meficgema ubaebic meu sebiaac kuha maec. Ifi anu ngictaungo yofi deec, “Beltesactsar, gaukpefing me imocac haniango ubaebic mi meficgegembeso.” Ifi deu Beltesactsar ye yofi deec, “O kunenna gaukpefing imoc ngabafocga ge ngadegudae yeneac ambac imoc ngereebac!

²⁰ Ge ic henna yadima kuneng kuhagoc nga herea yombong kurumeng kpeseredac nga bangectoa bangec yeni imoc hendacdau.

²¹ Nga maria tengging tengging siriha gombunga yombong anec amma foraya homac amma sasawango negebec anggecdeacsoc anec. Nga haniau funucfu tumiatoaac yang hania hania yeneng hama fenegeng kecgec amma fawau sawaac neng yeneng kecdau.

²² Ngictau, ic imoc genoc! Geng yadima kucgagoc nga kuneng herea amma kurumeng kpeserenec. Amma eucererenggaac ngickunenga kecnec imoc bangec tegia noboc noboc kpeserede.

²³ Nga ngictau ge henna kurumeng imohacnac kpetiac gareng mong wiac hennegeng angkecde, yeng mama yofi dedac, ‘Ic imoc kpetackema hesisickema ic tofea godeagoc imocsac bangecfu wagec taru imoc aiengngo nga aieng sacsacngo witickebisia. Ye ihai tumiatoaac kpindzing gombunga fede imohai taru asomeng dzimbongngo heiu boroc boroc anude. Ye kekeha tumiatoaac yang yenigoc kefu kifa seweng wisickeude.’

Kpefinggac hania

²⁴ O ngictau, Engenatoango yoara desima dede, imoc kunenna ngictau gearu hade. Kpefing imocac hania yofi,

²⁵ Ge ngickekecfunac kisanggugec kekecga tumiatoaac yang yenigoc anude. Burumakangiwa kpindzing neande ifi annadeac anggenggecde. Nga asomeng dzimbongngo sawaunac mama nadzicguu boroc boroc amma kecnade. Ifi kecna kifa sewen wisickeude. Anu kecma yofi negembesannec, Engenatoango bangecngicngac yeneac eucererenggac kunengngina amma garengyunukecde. Ye mong me monggac negenu ngereeude imoc ye miude.

²⁶ Nga ic tofea godeagoc wagec tarudeac dedau imoc eucererengga geac negemma fekefude. Anu geng kecma yofi negentegecnade, Kurumengngo kunengkekec minginanoc. Imohai eucererengga monggoc menade.

²⁷ Imocac ngictau ge yoacna negemma imoc modacbesena. Ge kopocsicfakaga wayombonggema ngicngacfocga yeneac ubaga manganeu meficyunubesena. Ge godzufakaga wama makpekpea yeneac ubaga manganebeso. Ifi amma gombunga kekecac nasoga mehereenade gedang.”

Gaukpefing fora fingerec

²⁸ Anu ngictau Newukadnetsar yearu imoc sasawa fingecdarec.

²⁹ Afo twelf wisickemanu ngictau ye Bawelac ngictauac amakerengaac ama witiau kengha amma

³⁰ yofi deec, “Bawel ye wiac engena. Ni imoc ngictaukekecna femanu imohai kecbadeac negemma kuctoanango meai nga ni ngictau engena kibikperaginagoc imocngo edzacyunude!”

³¹ Nga ngictau ye yoac ifi dema kecmanungoc kurumennunac ubaudumeng mong fingecma yofi deec, “Ngictau Newukadnetsar, yomoc geac yoac. Eucererengga imoc gearunac yaguc meickedac.

³² Ngickekecfunac kisanggugec kekecga tumiatoaac yang yenigoc kecnade. Burumakangiwango kpindzing neandae ifi isoc kpindzing nekecnadeac ngombonggugecde. Dzimbongngo sawaunac mama nadzicguu boroc boroc amma kecnade. Nga kifa sewen feracguu kecma yofi negentegecnade, Engenatoango bangecngicngac yeneac eucererenggac kunengngina amma garengyunukecde. Ye Engenatoa kuctoa minginango ngicngac yeneac eucererenggac kunengngina kecma garengyunuma kecde. Ye mong me monggac negenu ngereeude imoc yearu faiude.”

³³ Anu aua mocgu mi wisickemanu yoac imocac fora Newukadnetsararu fingerec. Yeni ye ngicngac yenearunac kisanggec kemma burumaka isoc kpindzing nema kefu sawaunac asomeng dzimbongngo sebia heiu boroc boroc anec. Amma kecmanu orucdzoeya yadima herea hasaukpesac neng yeneac dzongina isoc anu soria imoc neng yeneac sori isocngoc anec.

Newukadnetsarngo Anutu afeheec

³⁴ Anu naso imocac wisic wisickeau Newukadnetsar ni kicna fiba kurumennu enu negen negenna monggoc ireckeec. Ireckeu Engenatoa kenehema kecengkecbesande ye eweheihei ammima yofi dema dengereai, “Yeng ngicngac yeneac kunengngina amma garengyunuma kecengkefude. Yeac eucerereng imoc fingecsaheya fingecsaheya feengkecbesande.

³⁵ Ngicngac bangeha bangeha kecdae yeni sasawa sendungsac, ifi isoc negende. Ye kurumenggac wasaiareng negenu naric ande ifi isoc ayemmeude. Ye bangecfu kecdae yeni ifi isocngoc ayemmeude. Mongngo yeac maria naric mi hedzickeude nga mongngo yofi naric mi kpesimiude, ‘Ge nocac faka ifi andang?’ ”

³⁶ Ifi debare naso imohaingoc negen negenna monggoc irecketegerec. Anu eucererenna eweheiheigoc anudeac ngictaukekecna amma kibikperagina nearu monggoc dzigeneec. Nga ni yoac negen negengagoc edenuandae amma ngic eweheiheinginagoc warac nigoc kecgec, yeneng nearu hagec. Hama eucererennau monggoc fainugec nga ni monggoc torokpema engena yombong anai.

³⁷ Imocac amma Newukadnetsar neng yaguc kurumenggac Ngictau engena dengerema afehema eweheihei ammiduae. Yeng wiac sasawa ande amma mede imoc fora. Amma yeac sing sasawa imoc yoacfu faka dindingac. Anu goa yeni sebiengeng kecdaeu, ye yeni mamea anggecdeac ayemmeudeacsoc ande.