Danicel 3 - Deduamiti

Newukadnetsarngo deu nemuonga afehegec

¹ Anu ngictau Newukadnetsarngo ongatoa mong golngo meec imocac hereaya kubit kpete siksti nga nobocnac noboc imocac kubit kpete siks anec, imoc Bawel provinsiu Durac bangecac tumiatoau gununggeec.

² Gununggema ongatoa imoc desigecdeac ngictau Newukadnetsarngo yoac fau bangecac eucererenggac ngicenara, satrap nga memba yeneac enarafocngina amma memba, dzogareng, desi desingic nga magistretngic amma ngic tosea provinsnginausoc uayoacac kuc mekecgec imoc sasawa hadacgecdeac kpacyunuec.

³ Kpacyunuu bangecac eucererenggac ngicenara, satrap nga memba yeneac enarafocngina nga memba, dzogareng, desi desingic nga magistretngic amma ngic provinsnginaac manau uayoacac kuc mekecdacgec yeni sasawa ngictau Newukadnetsarngo ongatoa gununggeecmoc imoc desigecdeac sikedacma nammagec

⁴ dedekperagingic mongngo yofi dema kucgoc kpacma edeyunuec, “Ngicngac bangeha bangeha kecdae nga bangecareng sasawa amma yoacga yoacna sasawa ngeni dederecgeyoac yomoc negemma modacbisia.

⁵ Ngic yeneng trampet nga kungac fifigecde nga gita witicngina homac kpegecde nga aieng wiac nga gita kpegecde nga kungac gurugoc memea fifigecde amma musi sasawa goaac udumeng hania hania fingeru negenggecde naso imohai kicngina bangecfu hetutuckema ngictau Newukadnetsarngo ongatoa golngo memea gununggeec imoc eweheihei ammima numumibisia.

⁶ Nga mong ye naso imohai bangecfu hetutuckema wiac imoc mi numumiudeu ye ukugec gerecamatoa manau gerec dzekecde imohai kemebeso.”

⁷ Anu naso imohai trampet nga kungac fifigec nga gita witicngina homac kpegec nga aieng wiac nga gita kpegec nga kungac gurugoc memea fifigec amma musi sasawa goaac udumeng hania hania fingeru ngic sasawa yeni imoc negenggec. Ngicngac bangeha bangeha kecdae nga bangecareng sasawa amma yoacga yoacna sasawa yeni ngictau Newukadnetsarngo ongatoa golngo memea gununggeecmoc imocac kiwau kicngina bangecfu hetutuckema eweheihei ammima numumigec.

Yehudangic harebec yoacngina degec

⁸ Nga naso imohai kasedingic goa yeneng wegenac hama yehudaareng yeneac yoacngina dema

⁹ ngictau Newukadnetsarac yoac meremma yofi edegec, “O ngictau ge nasoya nasoya kecengkecbesena!

¹⁰ Ge yoac mong yofi dekperagima deserinec, ‘Ngicngac sasawa ngeni trampet nga kungac fifigecde nga gita witicngina homac kpegecde nga aieng wiac nga gita kpegecde nga kungac gurugoc memea fifigecde amma musi sasawa goaac udumeng hania hania fingeru negemma onga golngo memea imocac kiwau bangecfu hetutuckema eweheihei ammima numumibisia.

¹¹ Nga mong ye kiwa bangecfu hetutuckema mi numumiudeu ye ukugec gerecamatoa manau gerec dzekecde imohai kemebeso.’

¹² Anu geng Yehuda arennunac ngic goa Bawel provinsiu bangecgareng ua megecdeac segereyunuma meisingyunuma uayoac yemmenec, Sadrak nga Mesak amma Awed-Nego, ngic imoc yeni geac dederecgeyoac kpedau. Yeni anutufocga eweheiyemmema mi numuyemmeandae nga ongatoa golngo memea gununggenecmoc imoc eweheimima mi numumidae.”

¹³ Ifi degec ngictau Newukadnetsarngo herebutoa gereagoc negemma Sadrak nga Mesak amma Awed-Nego meyunuma yearu hagecdeac deu yeni yeac kicfu meyunuma hagec.

¹⁴ Hagec Newukadnetsarngo kpesiyemmema yofi deec, “Sadrak nga Mesak amma Awed-Nego, ngeni neac anutufocna eweheiyemmema mi numuyemmeandae nga ongatoa golngo memea gununggeai nocac imoc eweheimima mi numumidau? Imoc fora dedae me?

¹⁵ Imocac ngeni yaguc efaima kecmagec trampet nga kungac fifigecde nga gita witicngina homac kpegecde nga aieng wiac nga gita kpegecde nga kungac gurugoc memea fifigecde amma musi sasawa goaac udumeng hania hania fingeru negenggecde naso imohai bangecfu ngonducnema onga medua imoc eweheimima numumibisia! Nga eweheimima mi numumigecdeu imohaingoc mengunuma ukungunugec gerecamatoa manau gerec dzekecde imohai kemegec negemba anutu mongngo marinaunac onggongngunuma naric mi mesingunuude!”

¹⁶ Ifi deu Sadrak nga Mesak amma Awed-Nego yeneng turunga meremma yofi edegec, “Ngictau Newukadnetsar, neni yoac turunga dafi merembing.

¹⁷ Ngeni ifi anemmegecdeu Anutunina eweheimima numumiandimbe yeng gerecamatoa manau gerec dzekecde imohacnac onggonnunuma geac mariunac mesinunuudeacsoc ande.

¹⁸ Nga ifi mi fingecnemmeudeu ngictau ge yofi negenna, neni sifu anutufocga eweheiyemmema mi numuyemmenide nga ongatoa golngo memea gununggenecmoc imoc ifingoc eweheimima mi numuminide.”

Ngic harebec gerecfu ukuyunugec

¹⁹ Ifi degec Newukadnetsarngo yeneac herebu kunengngo mewakeyombonggeu kicmesuya meremma siriha mong yombong anec. Anu meremma gerecamatoa manau gerec dzekecde imohai gerec yukeandae imoc naso siks ferahama sewen anudeac dederecge ayemmeec.

²⁰ Anu wasaingicfora kucnginagoc edeyunuu yeneng Sadrak nga Mesak amma Awed-Nego dzegeyunuma gerecamatoa manau gerec dzekecde imohai ukuyunugecdeac edeyunuec.

²¹ Ifi deu wasaingic yeneng ngic imoc wambangina managoc nga ngakpiherecngina nga dungina amma wambagedangngina sebinginau tacmanungoc gerecamatoa manau gerec dzekecde imohai ukuyunugec.

²² Anu ngic yeni ngictauac dederecgeyoac seria imoc modacma gerecamatoa manau gerec dzekecde imohai gerec homac yombong yukegec dzeec. Anu ngic goa yeneng Sadrak nga Mesak amma Awed‑Nego gerecfu ukuyunugecdeac gerecboranggac naguu meyunuma enggec. Ngic imoc yeni gerecborangngo yonohou homedacgec.

²³ Anu Sadrak nga Mesak amma Awed‑Nego imoc yeni witicnginagoc gerecamatoa manau gerec dzekecde imocac botuhau gerecborang manau igocyunugec kemegec.

²⁴ Kemegec ngictau Newukadnetsarngo yenemma kengectoa kpeu bic yombong yacma ngic yegoc wiac hania hania isinggeandae yeni yofi kpesiyemmeec, “Ngic harebec witicyunuma gerec botuhau ukuyunuding me?” Ifi deu yofi meremmigec, “O ngictau, ifinoc anding.”

²⁵ Ifi degec yeng yofi merengyemmeec, “Anu ni ine ngic neackpac yungecyunuyunuya yeni imohai ebic mong mi meficgema gerec botuhau kengha anggec yenenduae. Nga ngic kpetea neackpac yeac siriha imoc anutu yeneac medac monggac siric isoc.”

Ngic harebec gerecfunac mesiyunuec

²⁶ Anu Newukadnetsarngo ifi dema gerecamatoaac gerecac naguac wegenac kemma namma kpacyunuma deec, “Anutu Engenatoaac enactofoc tofohongic Sadrak nga Mesak amma Awed-Nego, ngeni imohacnac meickema mama yei hagec.” Ifi deu yeni magec.

²⁷ Magec eucererenggac ngicenara, satrap, memba enarafocngina amma ngic ngictaugoc isinggema negen negeng miandae yeni kpedzucnema namma henggec ngic imoc yeni gerecngo sebingina memanganeudeac kuc mi femiec. Orucdzongina mi dzeec, nga ngakpiherecngina siriha mong mong mi anec nga sebingina hosuc homung mi fiec.

²⁸ Ifi hemma Newukadnetsar ye yofi deec, “Sadrak nga Mesak amma Awed-Nego yeneac Anutungina ye kenehagoc. Yeng angeroya sueu enactofoc tofohofora onggongyunudac! Anu yeni anutu mong numumigecdeac ngombonggegec yeni imoc wama ngictauac yoac kpema Anutungina negensinggeyombonggema sebingina yeac mariu faidau. Yeni yenang Anutunginaacsac eweheihei ammima numumidau anu anutu mong eweheihei mi ammigec.

²⁹ Amma anutu mong ye isocngoc ifi amma onggongyunuudeacsoc mong mi kecde. Imocac amma neng yoacseria yofi dekperagiduae, Ngicngac bangeha bangeha kecdae nga bangecareng sasawa amma yoacga yoacna sasawa botucnginaunac mongngo mong Sadrak nga Mesak amma Awed-Nego yeneac Anutungina denggbaringgeudeu hanimaria kebangaunac herecgebesonga nga amea hedzackpedzamegec seuc isoc ambeso.”

³⁰ Anu ngictaungo ifi dema deserima Sadrak nga Mesak amma Awed-Nego yeni Bawel provinsiu kuctoanginagoc yombong amma kecgecdeac desiyunuec.