Danicel 2 - Deduamiti

Newukadnetsarac gaukpefing

¹ Anu Newukadnetsarngo ngictau ua mekecmanu kifa kpete yohockang anec imohai gaukpefing goa henu imocngo asuya meebiriu gaugbori anec.

² Ifi anu ngictaungo kpefingdedengicfora nga ngic asu hania hania meicyunuandae nga ngic bangecac asu heitaiyunuandae nga faka hania hania angandae amma kasedingic sasawa yeni yeng gaukpefing siriha dafi henec imoc edegecde, ifi negemma yearu bic hagecdeac kpacyunuu yeni hama yeac kicfu nanggec. Ye yofi negemma kpacyunuec,

³ Nga yofi edeyunuec, “Ni gaukpefing mong hemba imocngo ongaasuna meebiriu imocac gaukpefinna hendua imoc edenugecdeac deba hadau.”

⁴ Ifi edeyunuu kasedingic yeneng ngictau yofi edegec, “O ngictau ge nasoya nasoya kecengkecbesena! Gaukpefingga enactofoc tofohofocga edenununadeu neni imocac hania naric deireckema edegunide.”

⁵ Ifi degec ngictaungo yoac yofi merengyemmeec, “Neac yoac imoc seria nga imoc mi wabade. Ngeni ni gaukpefing siriha dafi hendua imoc dekperaginemma imocac hania ifingoc dekperaginembisia. Nga ngeni gaukpefing siriha dafi hendua nga imocac hania dafi imoc mi edenuma hania dekperagigecdeu deba sebingina herecgegec noboha noboha kapic kapic anude amma amagerecngina kpembarackegec seuhasac feude.

⁶ Nga ngeni gaukpefinggac hania dekperagima foraya edenugecdeu ubangerecac wiac homac nga uabung ngemmeba eweheiheitoa angemmegecde. Imocac amma gaukpefing hendua nga gaukpefinggac hania yagucnoc edenugec.”

⁷ Ifi deu yeni monggoc yofi meremmigec, “O ngictau, ge gaukpefingga enactofoc tofohofocga edenununadeu imocac hania naric edegunide.”

⁸ Ifi degec ngictaungo meremma yofi deec, “Neac yoac imoc seria nga imoc mi wabade. Nga ngeni imoc negemma naso mehereebeso andae, ni imoc negenyombonggeduae.

⁹ Ngeni gaukpefing siriha dafi hendua imoc mi edenugecdeu yoacfu desi desingina mocgu fede imocnoc ngemmebade. Ngeni yofi denegeng amma uba mocgu andau, neni ifi tobanggema ikoc ammima kengkecmina kecma dedeseriaac kuha mabeso. Anu yofi negenduae, gaukpefing siriha dafi hendua ngeni imoc yaguc bic edenugec nga ngeni imocac hania ifingoc naric dekperaginembisia.”

¹⁰ Ifi deu kasedingic yeneng ngictauac kicfu yofi degec, “Ngictau kuneng sasawa yeni kecerema kuctoanginagoc anggec nga yenearunac mongngo wiac mong ifia ngic mamocnginagoc nga ngic asu hania hania meicyunuandae amma kasedingic mi kpesiyemmekefec. Bangecfu ngic mongngo ngictauac wiac imoc dekperagima edeudeacsoc mi ande!

¹¹ Nga wiac imoc ngictaungo kpesinemmede imoc wiac ebira. O ngictau, ngic mongngo imoc naric mi edeguude, imoc anutu yenengsac naric anggecde. Amma yeni ngic bangecsebigoc nenanggoc mi kecdae.”

¹² Ifi degec ngictaungo herebu kuneng yombong negemma Bawel manau ngic negen negengnginagoc sasawa kpetotieyunugecdeac edeyunuec.

¹³ Edeyunuu dedekperagi imoc kendaru negen negengngic yunubeso amma Danicel nga ogofora momoc yunuhomegecdeac hofocyunugec.

Kebungo gaukpefinggac hania Danicel edzahaec

¹⁴ Anu Aryok ye ngictauac wasaingic yeneac ngickuneng kefec. Anu ngictaungo deu yeng wasaingicforagoc Bawelac negen negengngic yunugecdeac kenggec. Kenggec Danicelngo Aryokgoc yoac negen negenggoc nga negen negentegecgoc denegeng anec.

¹⁵ Amma ye ngictauac wasaiarenggac ngickuneng Aryok yofi kpesimiec, “Hania dafiac ngictau ye ngabasiric yombong dedekperagi imoc dedac?” Ifi deu Aryokngo siduc imocac hania Danicel edeec.

¹⁶ Edeu Danicel ye ngictauac amau emma ngictau yofi edeec, “Ge naso kapianec naric nenna imocac hania edegubade.”

¹⁷ Ifi dema monggoc ameau kemma tosofora Hananya, Misacel, nga Adzarya yeni ebic fingecbeso anecac siduc edeyunuec.

¹⁸ Nga Danicelngo yofi numugecdeac edeyunuec, “Kurumenga kurumengaac Anutungo wosoefac ayemmema wiac sufu sufuya imoc dekperagimibeso. Dekperagimiu ogofora Bawel manau negen negengngic tosea yenigoc homecfu faiyunugecdeac degec, imoc mi fingecbeso.”

¹⁹ Anu tofocnac imohaingoc Danicel ye kpefing mong henu wiac sufu sufuya imocac dedekperagi haec. Hau Danicel ye kurumenga kurumengaac Anutu kenehema deafehe ammima

²⁰ yofi deec, “Anutuac kpara warac hanac hanaheaunac kecerema nasoya nasoya nga nasoya kpac kenehema kecbesonga. Ye Negen negentegec nga Kuctoa mingina.

²¹ Ye naso nga yabungnaso meremma kecde. Ye ngictau meicyunuude ye tatacnginau faiyunukecde. Ye ngic negen negentegecnginagoc negen negentegec yemmekecde ye ngic negen negengngina irec ireckea negen negeng yemmekecde.

²² Yeng wiac keme kemea nga sufu sufuya dekperaginemmekecde. Wiac kundunnu fede imoc dekperaginemmekecde, kperagi imoc yegoc kecde.

²³ O, mangesafocninaac Anutu, ge yaguc negen negentegec nga kuc nendang, imocac ni dangge edeguma dengereguduae. Neni gearunac wiac negembeso negending imoc dekperaginendang. Ngictauac wiacac kpesigending imoc ge dekperaginemmedang.”

Danicel ye ngictauac kicfu haec

²⁴ Ngictau Newukadnetsarngo Aryok yeng Bawelac negen negengngic kpetotieyunuudeac uayoac miec. Anu Danicelngo yearu erema yofi edeec, “Ge Bawelac negen negengngic mi kpetotieyununa. Ni hesicnuna ngictauac kicfu kende gaukpefingaac hania dekperagimibade.”

²⁵ Ifi deu Aryok ye Danicel bic yombong ngictauaru hesickema kemma yofi edeec, “Ngictauna, ni ngicareng Yehudabangecfunac wangecyunugec hagec, ngic imoc yenearunac mong meficgedua. Yeng gaukpefingga hania naric dekperagigenude.”

²⁶ Ifi deu ngictaungo Danicel kpara mong Beltesactsar mimia ye yofi edeec, “Ge gaukpefing henai imoc edenunadeacsoc annec nga imocac hania dema dekperaginennadeacsoc annec me?”

²⁷ Ifi kpesimiu Danicel ye ngictauac kicfu turunga yofi meremmiec, “O Ngictau, wiac sufu sufuya kpesinemmenec imoc negen negengngic nga ngic asu hania hania meicyunuandae nga ngic mamocnginagoc nga ngic asomeng hemma hania deandae imoc yeneng imoc edegugecdeacsoc mi andae.

²⁸ Anu Anutu mong kurumenga kurumenga imohai kecde, yeng wiac sufu sufu dekperaginemmeande. Amma ngictau, yennoc ngadeguc noc faka fingecbesande imoc dekperagigenec. Yeng kpefinnu onga yofi negen negenggau faiu ge fefegau fema gaukpefing imoc hennec.

²⁹ O ngictau, ge fefegau fema noc faka ngade fingerude negen negeng ua ifi menec. Anu Anutu wiac sufu sufuya dekperaginemmeande, yeng negen negeng genu ngade noc wiac fingecbesande, imoc hennec.

³⁰ Nga negen negentegec nearu fede imocngo ngicngac sasawa kecdae yeneac mi ferahade, kpac. Nga wiac sufu sufuya ni dekperaginendac imocac hania yofi, Ngictau, ge heregango negen negeng ua mekecde imoc negentegecnadeac gaukpefinggac hania ngictau ge dekperagigende.

Gaukpefing edeec

³¹ O ngictau, ge kpefinnu wiac monggac onga kuneng mong henna geac wegenac nanec. Onga imoc herea nga pirac piraha imoc kicfifiacsoc kpac. Nga wiac imoc kicgango hemma kengectoa annec.

³² Onga imocac oruha imoc goltegengngo memea, mondaha nga marihora imoc silwango memea amma wosea nga kopoha imoc aieng sacsacngo memea.

³³ Nga hanihora imoc aiengngo memea nga hanitabehora imoc aieng nga bangecngo memea.

³⁴ Anu ge imoc hemma nammana hoc mong ngicmaringo mi mema ukugec hama ongatoa imocac hanihora aieng nga bangecngo memea imoc hedzameyuruec.

³⁵ Hedzameyuruu aieng, bangec nga aieng sacsac nga silwa amma gol imoc yeni wiac mocgu isoc dzamedacgec, yeni wenacnasou witsebera meic meicke amau fingecande ifi isoc firangngo fifirangyunuu kendacma kpac andacgec. Anu hocngo ongatoa kpeecmoc ye meremma tikitoa amma bangectoa bangec sasawa mewakedarec.

³⁶ Gaukpefingga ifi hennec nga Anutungo meficnuu yaguc hania edegubade.

Gaukpefinggac hania

³⁷ O ngictau, ge ngictau yeneac ngictau. Kurumenga kurumengaac Anutungo eucerereng nga engena kekecac kuc nga wiac menadeac kuc amma eweheihei imoc ge genec.

³⁸ Anu bangecngic nga tumiatoaac yang amma sawaac neng imoc geac marigau faiyunuec. Nga ge sasawa yeneac ngickuneng annadeac faiguec nga oruc golngo memea imoc genoc.

³⁹ Nga geac ngadegau eucerereng mong ereude imocngo geac mamea ambesande. Anu eucerereng kpete harebec ereude imoc aieng sacsacngo memea amma imocngo imocac ngictauac kuc mema bangectoa bangec hafoangoc garenggebesande.

⁴⁰ Anu eucerereng kpete neackpac ereude imocngo aieng seria isoc ambesande. Imoc yofiac, aiengngo wiac sasawa hedzac kpedzamedaru dzamedarude imocngo ifinoc wiac hedzac kpedzamedaru dzamebesande.

⁴¹ Amma hanitabehora nga gbongfora imoc aieng enangbangecgoc yerec yerecgea hennec imocac hania yofi, imoc eucerereng hendzic hendzira ambesande. Amma aieng andeac noboha kuhagoc feude. Imoc aieng nga enangbangecgoc kpetuc kpeturanggea, imoc bic hennec.

⁴² Amma haniaac gbongfora noboha aieng amma noboha enangbangec anec imocac hania yofi, eucerereng noboha imoc kuhagoc anude nga noboha imoc hendzirudeac siriha ambesande.

⁴³ Amma aieng nga enangbangec kpetuc kpeturanggea hennec imocac hania yofi, ngicngac bangec monnunac nga bangec monnunac yeni bangecngina kuhagoc anudeac meemema eweeneng anggecde. Anu uba mocgu sifu mi anggecde. Imoc aiengngo enangbangecgoc mi kpeturanggeude, ifi isoc ambesande.

Kurumeng Anutuac eucerereng

⁴⁴ Anu ngictau, imoc yeneac nasou kurumenga kurumengaac Anutungo eucerereng mong fefeseri feudeac faiude, imoc naric mi kpetotiebesandae. Nga imoc garenggegecdeac kuc ngicngac mong mi yemmegecde. Eucerereng imocngo eucerereng sasawa imoc kpedzamedaru kpac anggecde. Nga yengena ine fefeseri febesande.

⁴⁵ Amma hoc mong tikiunac mesi mesia imoc maringo mi memea, imoc ukuma aieng nga aieng sacsac, enangbangec, silwa nga gol sasawa hetackedarec, imoc hennec. Noc faka yomocac ngadeau fingecbesande imoc Anutu Engenatoango ngictau ge dekperagigenec. Gaukpefing imoc fora nga imocac hania deireckedua imoc ifingoc fora andeac ge imoc naric negensinggenade.”

Ngictaungo Danicel kpackuneng miec

⁴⁶ Anu ngictau Newukadnetsarngo kicmesuya bangecfu hetutuckema fema Danicel eweheihei ammima yakaac sese nga kerec homungkerenggac sese ye ammigecdeac dederecge ayemmeec.

⁴⁷ Amma Danicel yofi edeec, “Foracngoc geng wiac sufu sufuya imoc dekperaginennadeacsoc andanggac yofi deduae, ngeneac Anutungina ye anutu yeneac Anutungina. Ye ngictau yeneac Kebungina amma ye wiac sufu sufuya dekperaginemmeande.”

⁴⁸ Ifi dema Danicel ngickuneng anudeac desima ubangerecac wiac engena nga homac mima Bawel provins hafoangoc imocac ngickunengngina anudeac desima Bawel ngic negen negengnginagoc sasawa yeneac ngicenara anudeac faiec.

⁴⁹ Anu Danicel ye ngictau kpesimiu yeng Sadrak, Mesak nga Awed-Nego yeni Bawel provinsiu bangecgareng ua megecdeac desiyunuma uayoac yemmeu Danicel ye ine ngictauac enactofoc tofohongic amma yegoc kefec.