Danicel 12 - Deduamiti

Mikacelngo naso wisic wisickeaac yoac deec

¹ Anu ngickunengtoa Mikacel, ye geac bangecarenggac kunengngina amma kasongina amma nangkecde, yeng naso imohai yacma nanude. Anu medacfocngina yenigoc nammanu ebictoaac naso mong warac ngicngac hanac hanaheaunac bangecfu fingeceregec kecma naso imohai ebictoa ifia mong mi fingerec, ebictoa mong ifiangonoc fingecbesande. Anu naso imohai geac ngicngacarennunac ngicngac kibi kpoukpouyau kpacngina oho ohoya fede yeni sasawa onggongyunudacgec komoc kpegecde.

² Anu bangec manau fekendae yenearunac homacngo gborima yacma goa yeni kekecseri mema kecgecde nga goa yeni ine ebic manau yofi kecgecde, ngadeyunuma game kpekpeu faiyunugec ifi kecengkecbesandae.

³ Anu negen negengngina irec ireckea yeni sawaac kperagia isoc kperagiagoc anggecde. Nga goa yeni ngicngac homac dindingackekecac sinnu faiyunugec, imoc yeni asomeng isoc kperaginginagoc amma nasoya nasoya feengkecgecde. Yoac imoc fora.

⁴ Anu Danicel, geng yoac yomoc mesufuma kibikpoukpouya imohai kpae faina. Anu kecma naso wisic wisickea haude. Anu bangectoa bangecac negen negeng monggoc nga monggoc anu ngicngac homac yeni bic yombong yomohai nga edimohai kengkecbesandae.”

Yohockangngo torokpema naso wisic wisickeaac yoac deoc

⁵ Anu ni Danicel, neng kic fima hemba ogohora yohockang, mong yeigeng doku tegiau nga mongngo edinoboc doku tegiau ifi nanoc.

⁶ Anu yerearunac mongngo yoac dema ngic wamba linenkporucngo memea heima dokuac witiau wi sawau nanecmoc yofi edeec, “Kecma noc nasoac faka yomoc mi hehena nga naso wisic wisickea fingerude?”

⁷ Anu ni kedzac kpema ngic wamba linenkporucngo memea heima dokuac witiau wi sawau nanecmoc yoara negemba yeng maria foiya nga kanaya kurumennubigeng miacma deserima Kebu kecengkecbesande yeac kpara kpacma yofi deec, “Naso mocguacsoc nga naso yohockang nganoc nga naso noboha wisickeu ngicngacareng kpetiac yeneac maringinaac kuc monggoc mi kpedzamegecde, imohai imoc sasawa mesidacgec wisickeude.”

⁸ Ni imoc negemma mi negentegeraiac amma kpesimiai, “O kunenna, noc wiacngo faka imocac ngadeau fingerude?”

⁹ Deba yofi deec, “Yoac imoc kpae bageau nga sufu sufuu femanu kecma naso wisic wisickea haude. Imocac Danicel ge kenna.

¹⁰ Anu homac yeni seucngina kpac yombong anggecde nga wonongngina meickegecdeac ua megecde amma kongaha anggecdeac ua megecde. Nga ngicngac ubaherenginau faka mangana arenggema imoc amma kecdae yeneng faka mangana imocngoc amma kecgecde amma yeneng negen negentegec mi megecde. Nga wiac negemma isinggegecdeacsoc andae, yeni imoc negentegecgecde.

¹¹ Anu wenacsoc sesegerec oho ohoac kpae faigecde nga wiac mangac manganea yombong mi hengena imocngo bangec kpetotieude, imohacnac hanahema wenac 1 290 kengkecma naso imoc wisickeude.

¹² Anu mong ye serima kecma wenac 1 335 kefude ye kenehagoc.

¹³ Nga ge ine kenna. Kemma kecnegeng amma kecmana naso wisic wisickea hau gborima yacnade, imohai yeng angammemegaac turunga gombunga gembesande.”