Danicel 11 - Deduamiti

¹ Anu madayngic Dareyawesngo ngictau kefu kifa kpete mocgu ammanu neng imohai bic yacma namma ye nanggema kaso kpemiai.

Parasbangecac ngictau kpete neackpac

² Ni yoac fora edeguba negenna. Parasbangecfu ngictau harebec monggoc eregecde nga yeneac ngadenginau kpete neackpacngo finactoaya kpedzucnema sasawa feracyunuma dzofinaha kuneng anude. Finactoayagoc amma kuhagoc anu sasawa herengina miacma Yawanggac eucererenggoc dzikac kpebesandae.

³ Anu ngictau mong kuhagoc yombong yeng fingecma ereude. Ye kuctoayagoc amma eucererenga garenggeude amma wiac hania hania songeaac arennu angkefude.

⁴ Anu yeng erema fingeru naso mong mi femanu imohaingoc eucererenga dzamebesande. Dzameu hendzicma kurumenggac firang neackpacbigeng kecdae yeneng noboc nga noboc megecde. Anu ngictaubangeha yearunac meickema goa yemmeude. Imoc yeac esangabofora yeneac mi anude nga yeng ngictaukuhagoc anec ngictaukucnginagoc ifia isoc mong mi ambesandae.

Sautbangecac ngictau

⁵ Anu sautbangecac ngictaungo kuhagocngoc anude. Ammanu yeac wasaiareng enarafora yegoc kecdae yenearunac mongngo kuhagoc amma ye ferahama yeac tatac mema ngickunengngina amma garengyunuude. Yeac eucerereng imoc wiac kuneng ambesande.

⁶ Nga kifa dafiguc wisickemanu dzadzahac dedzege anecde. Imoc yofi, sautbangecac ngictauac naroangango notbangecac ngictauaru hama yoac yegoc dzegeude. Dzegema ye kuc imoc mekefudeacsoc mi anude nga ngic ye kuc imoc ifingoc naso herea mekefudeacsoc mi anude. Anu naso imohai ngac imoc nga yeac ngicngacfora amma manggaha nga ngic ye nanggema kecgec, yeni wama ngabafocngina yeneac mariu faiyunubesandae.

⁷ Anu ngac yeac sacarennunac fingecsahebisic mongngo fingecma erema manggahaac tatac meude. Mema hama notbangecac ngictauac wasaihabufora yenigoc ewema yeni feracyunuma firang anude. Firang anu sautbangecac ngictauac tatacseriau wasaiarengango kucgoc kemma imohai serima nanude. Ifi namma songeaac arennu ngicngac ihai kecdae faka hania hania ayemmebesande.

⁸ Amma dzikacfu wiacngina yomoc kpakenec nga teragedangina mema Aigitabangecfu mekenude, imoc anutufocngina yeneac onga nga aieng nganoc gerea hetinggegec patatakeu ongangina hania hania megec nga kpakenec nga teragedangngina buma kuneng silwa nga golngo memea. Imocac witiau ye kifa dafiguc wama notbangecac ngictaugoc dzikac mi kpebesande.

Notbangecac ngictaungo dzikac hanahebesande

⁹ Anu ngadeau notbangecac ngictau ye dzikac kpema sautbangecac eucerereng manau kemema amabangehau eng monggoc dzigenebesande.

¹⁰ Anu ngadeau yeac medacfora yeni efaima dzikacac wiacngina kpedzucnedacma wasaihabu kuneng homac yombong anggecde. Habu imocngo monggoc sautbangecgoc dzikac hanahema imohai tunggbaung isoc sautbangec manau kemma yenigoc ewema ngictauac dzikacac odaseriau yombong kensikebesandae.

¹¹ Ifi anu sautbangecac ngictau ye herebu kuneng negemma yacma kemma notbangecac ngictaugoc ewebesande. Nga notbangecac ngictaungo wasaihabu kuneng kpedzucyunuu ewegec sautbangecac ngictaungo firang anu wasaihabu imoc yeni yeac mariu embesandae.

¹² Amma sautbangecac ngictau ye ubahereango nendefe yombong amma wasaihabu ten tauseng kpebucyunuude. Amma ye sifu firang mong mi ambesande.

Notbangecac ngictaungo sautbangecfu dzigenebesande

¹³ Anu kifa goa wisickeu notbangecac ngictaungo monggoc waracac wasaihabu ferahema kpedzucyunuu nanggecde. Nga wasaihabu imoc yeni kuneng amma dzikacac wiac homacngoc feyemmebesande.

¹⁴ Anu naso imohai homacngo yacma namma sautbangecac ngictaugoc ewegecde. Nga kpefinnu onga imoc fora fingerudeac geac ngicngacarennunac godzucngic yeni herengina miacemema ewema dzikacfu mayunuude.

¹⁵ Anu notbangecac ngictaungo hama taontoa mong odaseriagoc yerecgema dzikacac wiacgedanga faima ewema firang amma taong imoc mebesande. Anu sautbangecac wasaihabufora yeni serima mi nanggecde. Ngicfora meisingyunuyunuya yeni seria nanggecdeac kuc mi feyemmeude.

¹⁶ Notbangecac ngickuneng ye hama yegoc eweude. Amma ye faka hania hania songeaac arennu ammiu mongngo ye naric mi hedzickema nanude. Ye bangeckereng imohai hama namma mariango wiac hafoangoc kpedzamebesande.

Notbangecac ngic yeni yoac dzegebesandae

¹⁷ Anu ye eucererenga hafoangoc imocac kuc kpedzucnema sautbangec yenearu hama sifu ngaba kpac anudeac yoac dedzege ambeso negemma ifinoc anude. Ye naroanga mong sautbangecac ngictau miu enema anude, ngac imoc ye ewea kpetotiebesandeac mimia. Nga ebic imoc mi fingecmiude, imoc ine sautbangecac ngictau meseriude.

¹⁸ Imoc wisickeu notbangecac ngictau ye monnu meremma kondungbangec nga nucbangecfu kemma yenigoc ewema firang amma homac meyunuude. Ifi angkecmanu wasaienara mongngo nendefefakaya kpac anudeac ammiu nendefefakaya imoc yeac witiu merenu dzigeneude.

¹⁹ Imoc wisickeu ye meremma dzigenema yengena amabangehau kemma hocoda seria mema imocac manau amaseringina meseriude. Amma ye imohai tifotockema makpeu monggoc mi meficgegecde.

²⁰ Anu yeac tatahau yacma nanude yeng eucererengaac bangec kibikperagiagoc imohai takesimemengic mong sueude. Nga uameme goasac kecma yeac kuc herecgema ngictautatacfunac meickeude. Nga imoc herebuac arennu me dzikacfu ewegecdeac amma kpac, imoc wiac siriha mong heficgeu kpac ambesande.

Ngictau manganango bangec garenggebesande

²¹ Anu ngicngac yeneng ngic mong ngadehegecde, yeng yeac tatac mema nanude. Nga yeneng ye ngictauac kuc nga uakibi mong mi migec. Nga wiac mong mi memimagec yeng faitobang ayemmema eucerereng imoc medarude.

²² Anu yeac kicfu wasaihabutoa dokutunggbaungngo meicyunuande ifi isoc meicyunudarude nga kpedzameyunudarude nga dzadzahaac ngictau mong ifingoc ifi ammigec kpac anude.

²³ Amma dzadzahac yegoc dzegegec yeng imohaingoc hanahema tobangyunuude, yeac angammemea ifia feude. Ye ngicfora homac kpac anu ye sifu yadima kuhagoc ambesande.

²⁴ Anu mi ireckemagec provinsac bangec kerehagocfu hama esangabofora nga yeneac ngabofocngina dzikacfu mi megecdeacsoc anggec imoc meude. Ifi amma finacgedangngina dzikacfunac meec nga godzufaka amma meec nga finac femiec, ye imoc hendzicma ngicfora yemmeude. Amma taong odaseringinagoc ebic hania hania meficgeyemmeudeac negen negengau negengareng anude. Anu faka imocac nasoya kecma wisickeude.

²⁵ Ngictau imoc ye eweudeac ubiaac kuc nga sebiaac kuc kpedzucnema sautbangecac ngictaugoc dzikac kpeude. Ifi negemma wasaihabu kuneng meyunuma sautbangecfu habesande. Anu sautbangecac ngictau ye ifingoc yenigoc eweudeac efaiude. Efaima wasaihabufora homac yombong kucnginagoc kpedzucyunu ewegecde. Anu ngicareng yeneng negen negengngina kpedzucnema ye memanganegecdeac negemma areng hania hania faigecdeac ye serima mi nanude.

Sautbangecac ngictau wasaingichabutoayagoc

²⁶ Yeac yaka negecde yenennoc ye memanganegec kpac anude. Nga wasaingichabutoaya imoc wangge wanggengo wiac wanggeandae ifi isoc wanggeyunuma meicyunugec homacngo mayunuu homegecde.

²⁷ Ammanu ngictau yohockang yeri ubanegen negengngirau ebic meficgeemeecdeac negen negeng femanu yakaac tatac mocgufu tacma ikocyoac denegeng anecde. Nga nasotoa imoc wisic wisickeau haudeac naso fedengoc, imocac fora mong mi fingecbesande.

Sautbangec wama bangehau dzigenebesande

²⁸ Anu ye finactoaya homac kpedzucnema bangehau dzigeneude. Nga ubanegen negengango kpetiac dzadzahac herecgeudeac feude. Amma ye imoc arenggema kecma mesima bangehau dzigene kenude.

²⁹ Nga ye naso mema imoc modacma dzigenema sautbangecfu haude. Anu naso imohai waracnaso nga ngadenasou fingerec ifi isoc mi fingerude.

³⁰ Imoc yofiac, Kittim imohacnac wage homac yeneng hama yegoc ewegecdeac hagecde. Hagec ubia kuha mau dzigenema kemma herebuyaac kucngo dzadzahac kpetiac memanganeudeac ua meude. Amma amabangehau monggoc dzigenema ngic goa dzadzahac kpetiac wagec kiwa yenearu fibesande.

Kpetiac womong memanganebesandae

³¹ Anu yeng wasaihabuya habuya sueyunuu yeni hama kpetiac womong nga oda manau sufusufukekecngina Kebuac kicfu wonongagoc anudeac ammigecde. Amma sese wenacsoc faiandae imoc meickema imocac tatahau wiac mangac manganea mi hehena yombong faiu imocngo bangec kpetotieude.

³² Anu dzadzahac yoara kpegec yeng ikoc amma yoac songea songea edeyunuma dzadzahac imoc wagecdeac sinnu hodzingyunuude. Anu ngicngac Anutungina negemmidaemoc yeni serima nanggecde amma yeneac kucngina mi kpac anude.

³³ Amma ngicarennunac ngic negen negen irec ireckeagoc yeneng ngicngac homac negen negentegec yemmegecde. Ammanu naso dedea haude imohai goa sifu dzikacac beangngo nga gerecngo yunuhomegecde amma witicyunuma wangecyunu kenggecde nga ngabafocngina yeneng wiacngina sasawa mema kenggecde.

³⁴ Anu mayunuude imohai memeficngina hama meficyunugecde anu ngicngac homac yeneng faitobang ayemmema yenearu torokpegecde.

³⁵ Amma negen negen irec ireckeagoc goa yeni ifingoc mayunuude. Mayunuu meisingyunugec yacgec dzuac dzuac ua seria meyemmegec kecma naso wisic wisickea hau kongaha nga goctopoha kpac anggecde. Nga nasotoa faifaia imoc febesandengoc.

Anutu emmibesande

³⁶ Anu ngictaungo songea modacma faka hania hania mema kecma anutu sasawa eyemmedacma anutu yeneac Anutu ifingoc emmi emmiyoac warac mi negen negena deude. Anu wiac fingerudeac dedea imoc fingecbesande imocac amma ye wiac hania hania meude imoc sasawa fingerude. Anu kecma herebuac nasoya wisickeude.

³⁷ Amma ye esangabofora yeneac anutufocngina eweheihei mong mi ayemmebesande. Amma ngac yeneng nemuongaac songea negemmima afeheandae nga anutu sasawa goa eweheihei mong mi ayemmeude. Ye ine wiac imoc sasawa feracyunuma yengena sebia meemma kefude.

³⁸ Amma ye odaseriaac anutu mong eweheihei ammiude. Yeac esangabofora yeneng anutu imoc mong mi negemmigec ye anutu imoc gol, silwa nga hoc buma kuneng nga wiac hania hania buma kuneng, yeni wiac ifia mima eweheihei ammiude.

³⁹ Amma kuric anutungo kuc miu ye taong odangina seriagoc fekenude imohai kemma songeaac areng modacma faka hania hania ayemmeude. Ngic yeneng yeac negenggec naric anu eweheiheinginagoc anggecdeac ayemmeude. Ye ngickuneng amma ngicngac homac garengyunugecdeac kuc yemmema uanginaac bung dema bangec hendzicma yemmebesande.

Ngictau mangana nasoya wisickebesande

⁴⁰ Anu naso imocac wisic wisickeau sautbangecac ngictaungo yegoc dzikac hanahema kucgoc hama eweude. Ifi anu notbangecac ngictaungo keretacgedanga nga becosicfu kengkeng wasaingicfora amma wagea homac yenigoc hama yegoc eweude. Amma ye bangec homac yombong imohai kemma dokutunggbaung isoc hama feracyunubesande.

⁴¹ Nga ye ifingoc bangec kuc nga kibikperagiagoc imohai hau ebictoa bangec homac yenearu fingecyemmeude. Anu Edom nga Mocaw amma Ammonggac medacfora yeneac areng homac yeni yeac mariunac woragecde.

⁴² Nga ye bangeha bangeha yenearu maria sineu Aigitabangec ye ebicfunac naric mi woraude.

⁴³ Anu luwingic nga kusingic ye modacma kemma yeng wiac buma kuneng gol nga silwango memea amma Aigita yeneng wiac mekecma garenggekecgec wiac imoc sasawa yeac mariu faigec yeng imoc garenggeude.

⁴⁴ Anu wenac ere ereaunac nga notbigennunac imocac yoacsiduc kedzahau kemeu kengec kuneng kpeude. Amma ye herebutoa kuneng negemma homac kpetotieyunuu kpac anggecdeac efaima dzikac kpeudeac kenude.

⁴⁵ Amma ye ngictaukekecac kporucamagedanga kondungtoa nga kuc kibikperagia kpetiacac tiki botucngirau kpedziu enude anu yeng kpac anudeac nasoya wegene hamanu mongngo ye mi meficgebesande.