Danicel 10 - Deduamiti

Dzikac nga ebictoa kunenggac kpefing

¹ Koresngo Parasbangecac ngictau kefu kifa kpete harebec ammanu Danicel kpara mong Beltesactsar mimia yearu yoac kpefinnu haec. Kpefingyoac imoc dzikac nga ebictoa kunenggac yoac nga imoc fora. Ye yoac imoc hennegegeng amma hania mekperagimiecac negentegerec.

² Naso imohai ni Danicelngo sonda harebec kiac ubahodunnagoc kefai.

³ Ifi kecma yaka songeagoc mong mi neai nga yangfusia amma waindoku imoc enacnau mong mi kemeec. Amma sebina kerecdokungo mi nadzicmima kecbareng sonda harebec wisickeec.

⁴ Anu afo kpete mocguac uameme kpete twentifo imohai ni Hiddekel dokutoaac tegiau kemma nanai.

⁵ Namma kpehengaima kic fima ngic mong henai. Ngic imoc ye wambaya linenkporucngo memea heiec nga kebangau fadeng dzegeec imoc Ufadz bangecac golngo memea.

⁶ Yeac sebia siriha imoc topas hoc isoc nga kicmesuya imoc piratacac siriha isoc nga kiwa imoc gerecborang isoc amma hanimaria imoc aieng sacsacac pirac pirac ifi isoc anec. Nga yoaraac udumenga imoc habutoa yeneac udumeng isoc anec.

⁷ Anu Danicel ni tembucna kpefinnu onga imoc henai nga ngic nigoc kecgec yeni ine imoc mong mi henggec. Anu kengectoa kunengngo yeneac witinginau enu yeni dzonongngina fedeu kengec worama kemma sufugec.

⁸ Sufugec ni tembucna namma kpefinnu onga wiac kuneng imoc henai. Hemba kucna kpac anec nga kicmesuna siriha gombunga angande imoc meaiu kucna kpac yombong anec.

⁹ Anu yeac yoaraac ubaudumeng negembareng kicna nininggeu kicmesuna bangecfu hetutuckema feai.

Ngicngo yoac deec

¹⁰ Febareng mari mongngo menuma miacnuu dzonong fedefedegoc marinango bangecfu merandzima yacma fafocngo heima tarai.

¹¹ Tacbareng yofi edenuec, “Danicel, Kebungo bangecngic ge heresongogoc hoanggude. Ye yaguc gearu suenuu haduaeac amma ge yacma hongngoc nanna. Nga ni yoac edegubeso anduaeac kedzac faima negenna.” Yeng yoac ifi deu dzonong fedefedegoc yacma nanai.

¹² Namba yofi edenuec, “Danicel, ge kengec mi anna. Ge wenac kpete mocgu hanahema herega desima Anutuac kicfu kemma yeac wiac negentegecnadeac anggenec amma memaemenec, imohai yoacga bic negenec nga ni yoacga imocac amma hadua.

¹³ Anu Paras eucererenggac ngickuneng ye wenac uameme twentiwan neac sing hedzickema nanec. Nanu ngickuneng yenearunac enaratoa mong kpara Mikacel ye meficnuudeac hau ni Parasac ngictau yegoc wayunudua.

¹⁴ Wayunuma gearu yaguc hadua. Anu kpefinnu onga hendang imoc ngadeguc fingecbesandeac ni ge imoc negentegecnadeac deireckegembade. Imoc geac ngicngacfocga yenearu noc faka fingecyemmeude, imocac yoac.”

¹⁵ Ye nigoc yoac ifi demanu kicmesuna bangecfu fiba kemeu yoac dedena kpac anu dundung nanai.

¹⁶ Anu negennec, bangecngic yeneac siric isoc anec, yeng enacbibicna kpesereu enacna anggema hoannau nanecmoc yoac yofi edeai, “O kunenna, kpefinnu onga henduaac amma ongana worau kucna kpac andacde.

¹⁷ Anu kunennaac enactofoc tofohongic neng dafi ge kunennagoc denegeng ambade. Amma ni yaguc kucna kpac anu asutaitaiac kuc mi fenendengoc.”

¹⁸ Ifi deba bangecngic neneac siric isoc ye monggoc kpeserenuma kuc monggoc nenec.

¹⁹ Nemma yofi edenuec, “Kengec mi anna. Ye bangecngic ge heresongogoc hoanggude. Ruae gearu febeso nga ge yaguc kucgagoc nga kucgagoc anna!” Ifi deu negemba kuc nearu hau yofi deai, “Kunenna, kuc bic nendanggac yoac edenuna negemba.”

²⁰ Deba yeng deec, “Ni dafiac gearu haduae imocac hania negennec me? Ni gearunac dzigene kemma Parasbangecac eucererenggac ngickunenggoc ewedede amma yeac kuc memama kemba Yawanbangeac ngickuneng yeng haude.

²¹ Nga ni warac warac foraac kibiu yoac oho ohoya fede edeguba. Mongngo mong mi meficnuu ngeneac ngickuneng Mikacel, yengsac meficnuma nigoc nanu yerigoc ewema kecdipe.