Danicel 1 - Deduamiti

Danicel ye Bawel imohai kefec

¹ Ngictau Yehoyakimngo kifa harebec yehudangicngacareng yeneac ngictau kecma garengyunukefec imocac kifa kpete harebec anu Bawel bangectoaac ngictau Newukadnetsar ye dzikac yenigoc kpeudeac Yerusalaim imohai hama oda ngadeau dzikacac wiara fau imocngo taong hafoangoc hedzickema taru ngicngac yeni imocac ngadeau kengha ambeso obohogec.

² Nga ewegec Kebungo yehudaarenggac ngictau Yehoyakim ye nga Anutuac womonnu kpakenec nga teragedanga goa momoc mariau fau yeng imoc mema Sinecar bangecfu mekemma imoc yengena anutuyaac amau finactoayaac tohonnu faiec.

³ Anu ngictaungo ngictauamaac garengtoa Aspenadz dederecge ammima yofi deec, “Ge Isracel bangecfunac sebigboringic goa ngictauac fingecsaheunac nga ngickuneng yeneac arengnginaunac meyunuma hesicyunu habesena.

⁴ Nga medac imoc yeni sasawango kicsiricngina gombunga ambisia amma yeni puring nga kuchafeingina kpac, ifi ambisia. Yeni wiac nga negen negeng hania hania fede, imoc negentegecdacbisia. Amma yeni fitira yombong amma wiac sasawa kpouyemmegec negen negeng imoc bic mema negembisia. Nga yeni ngictauac amau yombong enactofoc tofoho ua mema nanggecdeac fakangina sirihau nga gombunga yombong ambeso. Ngeni ifingoc kasedingic yeneac kibi oho oho nga yoacngina kpouyemmebisia.”

⁵ Amma ngictaungo wenacsoc yaka nga waindoku nekefec, yaka imocac tosea hendzicma wenacsoc yemmegecdeac deec. Anu ye ifingoc ngicfora yofi dederecge ayemmeec, “Yeni kifa harebec kpouyemmekecgec wisickeuguc ngictauac kicfu namma yeac enactofoc tofoho ua mebisia.”

⁶ Anu Yehudaac kisicfunac Danicel, Hananya, Misacel nga Adzarya yeni sebigbori imoc yeneac botucfu kecgec.

⁷ Nga ngictauamaac garengtoa yeng kpacngina gboria yofi yemmeec, Danicelac kpara Beltesactsar nga Hananyaac kpara Sadrak nga Misacelac kpara Mesak amma Adzaryaac kpara Awed-Nego.

Yaka mong negec

⁸ Nga Danicel ye ine ngictauac yaka nga waindoku nekecgec imoc yofi negemma waec, “Ni imoc nema Kebuac kicfu wononnagoc ambade.” Hereau ifi negemma kemma ngictauamaac garengtoa meficgema yofi deec, “Ni yaka imoc nema Kebuac kicfu wononnagoc ambadeac amma yaka imoc nebadeac sifu mi ngombonnubang me?”

⁹ Anu Anutungo garengtoaac hereu faka meu Danicelac negenu ngereeu ye yeac ubia manganeec.

¹⁰ Amma yeng Danicel yofi edeec, “Ni kunenna ngictauac kengecnude. Anu yeng nenedokungina imoc ngemmenideac desiec. Nga sebigbori tosea kifangina ngenigoc socfungoc andae ngeni yeneac botucnginau kicmesungina huringaiu imoc yeni isoc mi anggecdeu ngeni ebic meficgenenggec ngictaungo orucna herecgebacac.”

¹¹ Anu ngictauamaac garengtoa ye Danicel nga Hananya nga Misacel amma Adzarya yeneac garengyombong kefec, yeng ifi deu Danicelngo yofi deec,

¹² “Ge sifu uameme ten enactofoc tofohofocga tobannunuma uaac semengsac nga dokutehec nenideac nemmebesena.

¹³ Nemmena neneac siricnina nga sebigborimedac ngictauac yaka songea nekecdae yeneac siricngina imoc geac kicfu fingecbisina. Fingecni imohai enactofoc tofohofocga siricnina hemma imoc modacma anemmebesena.”

¹⁴ Ifi deu yeneac yoac imoc negemma siricngina hennegeng anudeac uameme ten tobangyunuec.

¹⁵ Anu uameme ten wisickeu yeneac siricngina gombunga nga sebifusingina gbofoma nga gunura imocngo sebigborimedac sasawa ngictauac yaka songea nekecgec imoc yeneac sebingina ferahaec.

¹⁶ Ifi fingeru yakagarengnginango yakangina songea nga waindokungina imoc nenedokunginaarunac meickema uaac semengsac yemmekefec.

Anutungo wiac yemmeec

¹⁷ Anu Anutungo sebigborimedac neackpac imoc negen negeng irec ireckea nga kibi oho ohoac negen negeng amma negen negentegec sasawa yemmeec. Anu Danicel ye onga sasawa nga gaukpefing hania hania imocac hania negentegerec.

¹⁸ Anu ngictaungo naso deecmoc wisickeu ngictauamaac garengtoango Newukadnetsarac kicfu hesicyunuma kenec.

¹⁹ Kenu ngictaungo yenigoc denegeng amma sasawa yenearunac Danicel, Hananya nga Misacel amma Adzarya yeni isoc mong mi meficyunuec. Ifi anu uayoac yofi yemmeec, yeni yeac enactofoc tofohongic amma yeac wegenahau kecma ua mebisia.

²⁰ Anu ngictaungo wiac sasawa kpesiyemmedacma yofi meficgeec, yeni wiac sasawa negentegecgec amma negen negengngina irec ireckea yombong. Yeneac negen negentegecngina imocngo yeac eucererengau ngic mamocnginagoc sasawa nga ngic sasawa asu hania hania meicyunuandae ngic imoc feracyunuec imoc naso ten isoc anec.

²¹ Anu Danicel ye imohaingoc kecmanu Koresngo ngictau anu kifaya kpete mocgu anec, imohai wisickeec.