Bangec kisiu 9 - Deduamiti

Onggoc onggongge nasotoaac singseria

¹ Isracelngicngac yeni Aigitabangecfunac mama kecmagec kifa kpete yohockang imocac afo kpete mocgu imohai Kebungo Sinai bangeckisiu Mose yoac yofi edeec,

² “Isracelngicngac ngeni naso dedeau onggoc onggongge nasotoa takecbisia.

³ Imoc afo yomocac wenac kpete fotin ammanu ama toforebeso anu naso dedea, imohai yombong nasotoa imoc negensima tacbisia. Nga imocac singseria nga dederecge yoac fede, imocac siricfu modacma nasotoa imoc takecbisia.”

⁴ Ifi edeu Mose ye Isracelngicngac yeni onggoc onggongge nasotoangina negensima tacgecdeac edeyunuec.

⁵ Edeyunuu yeni afo kpete mocgu, imocac wenac kpete 14, imohai ama marai anu Sinai bangeckisiu onggoc onggongge nasotoa imoc tacgec. Yeni Kebungo Mose dederecge ammiec imocacsoc yombong anggec.

⁶ Anu goa yeni fareng kpeserema Kebuac hehenu wonongnginagoc amma kecgecac wenac imohai onggoc onggongge nasotoangina imoc negensima tacgecdeac osigec. Osima wenac imohaingoc Mose nga Aharon yerearu kemma

⁷ Mose yofi edegec, “Neni fareng kpeserema Kebuac hehenu wononninagoc amma kecdimbe. Anu neni naso memea imohai yombong Isracelngicngac yenigoc kecma Kebusese meminideac kpaeninagoc andimbeac obohode.”

⁸ Ifi degec Mosengo yofi edeyunuec, “Ngeni tomai kecmagec Kebungo ngeneac yoac dafi edenuu negemmaguc edengunubade.”

⁹ Ifi deu Kebungo Mose yofi edeec,

¹⁰ “Ge Isracelngicngac yofi edeyununa, ‘Ngenearunac me fingecsahengina yenearunac mongngo fareng mong kpeserema Kebuac hehenu wonongagoc amma kefude me bangec hereau kenudeac sinnu kenudeu, yeng sifu Kebuac negensima onggoc onggongge nasotoa imoc naric takecbeso.

¹¹ Ebicnginagoc yeni afo kpete yohockang imocac wenac kpete fotin, ama marai anu imohai nasotoa takecbisia amma makekenggac ramamedaha imoc icsogong aenga kpac nga mondzang hodungagocgoc nebisia.

¹² Nga maunga mong wagec tacmanu ama mi wereckembeso nga sic mong mi hetackebisia. Onggoc onggongge nasotoaac singseria fede, imocac siricfu modacdacma tacbisia.

¹³ Nga ngic mong ye Kebuac hehenu kongaha kecma onggoc onggongge nasotoa eng wama mi tarude me bangec hereau mi kenude nga sifu onggoc onggongge nasotoa mi tarudeu, ye ngicngacareng tosofora yeneac botucfunac meickebisia. Ye naso dedeau Kebusese mi memiecac ifi ammigec yengenaocngoc kopocsihaac turunga tofobeso.

¹⁴ Nga kuricngic mongngo ngenigoc kecma Kebuac negensima onggoc onggongge nasotoa tacbeso negendeu ye nasotoa imocac singseria nga dederecgeyoac fede, imocac siricfu ambeso. Ngeni ngenang nga kuricngic ngenigoc kecdae, ngeneac singseria mocgungoc yombong andacbeso.’ ”

Hoengngo kporucama semeec

¹⁵ Anu kporucwomong medacma mesigec wenac imohai hoeng mongngo kporucwomong semeec, nga imoc kpara mong Kebungo wiac heigboringemmekecduaeac kporucama. Hoengngo imoc semema femanu ama toforeu siriha gerecborang isoc anu kperagima kporucwomong witiau tackemmanu ama wereckenec.

¹⁶ Nga nasosoc ifinoc fingecyemmekefec, wenacfu hoengngo semekefec nga tofocnacfu siriha gerecborang isoc amma kperagiyemmekefec.

¹⁷ Amma Kebungo hoeng miaru kporucama witiaunac enusoc Isracelngicngac yeni efaima yacma kporucamangina meickema bangec imoc wama kengkecgec. Nga hoengngo bangec damohai mama taru Isracelngicngac yeni imohai kporucamangina kpedzigec enu guru mema tackenggec.

¹⁸ Isracelngicngac yeni Kebungo dederecge ayemmeec imocacsoc efaima kengkecgec. Nga dederecge ayemmeec imocacsoc kporucamangina kpedzigec enu guru mema tackenggec. Anu hoengngo kporucwomonggac witiau seria takefecsoc yeni kporucamabangec ihai tacyac anggec.

¹⁹ Nga hoengngo kporucwomong witiau naso herea takefec isoc, imohai Isracelngicngac yeni Kebungo dederecge ayemmeec imoc negemma yoara tofohoma bangec imoc mi wama kengkecgec.

²⁰ Nga naso goau ine hoengngo kporucwomong witiau wenac dafigucsac taru yeni Kebungo dederecge ayemmeec imoc tofohoma imohai tayac anggec. Anu monggoc dederecge ayemmeu yeni imoc tofohoma torokpema kengkecgec.

²¹ Naso goau hoengngo tofocnac anu mama tacmanu ama wereckengkefec. Nga ama wereckenu Kebungo monggoc hoeng miaru enu ngicngac yeni efaima yacma kporucamangina meickema kengkecgec. Anu naso goau hoeng imoc tofocnacnac kemma asoacsac tacma enu yeni imoc modacma torokpema kengkecgec.

²² Hoengngo wenac yohockang, me afo mong, me wenac goa mehereema kporucwomong witiau taru yeni imohai ruaegoc tacyac angkecgec. Nga hoengngo monggoc enu yeni efaima yacma kporucamangina meickema torokpema kengkecgec.

²³ Kebungo deu yeni kporucamangina kpedzigec enu guru mema tackenggec amma monggoc deu yeni efaima yacma kporucamangina meickema bangec imoc wama kengkecgec. Yeni Kebuac enac tofohogec nga yeng Mose dederecge ammiec, imoc tofohoma ifi angkecgec.