Bangec kisiu 7 - Deduamiti

Arata desima sese faigec

¹ Mose ye kporucwomong medaru wisickeu wenac imohaingoc kerec nadzicmima kpetiac anudeac desima imocac wiacgedanga sasawa nga arata amma wiacgedanga sasawa imoc momoc nadzicmidacma kpetiac anggecdeac desiyunuec.

² Anu Isracelac ngicenarafocngina imoc amaarengnginaac oruhafocngina yeneng ngic arengyunuma kpetengina megec yeneac enarafocngina anggec amma sesengina mehagec.

³ Yeni sesengina yofi mehama Kebuac kicfu faigec, kereta siks kporucngo kperacyunuyunuya amma burumakangiwa gbomangina meic meickea twelf. Enara yohockang yereng kereta mocgu mehaoc, yohockangngo kereta mocgu, ifi nga ifi hama faidacgec. Burumaka ine tembuc tembuc mocgu mocgu faiyunugec. Anu wiac imoc kporucwomonggac fanihau faiyunudacgec.

Kereta Lewingic yemmeec

⁴ Ifi anggec Kebungo Mose yofi edeec,

⁵ “Ge wiac imoc sasawa enara yeneac mariunac menade imoc Kebugoc ewacemeemeac kporucamaac uaac amma mekecbisia. Amma Lewingic yeni uaarengngina tembuc tembuc fede, imocac siriha negensima wiac imoc yeneac mariu faidacbesena.”

⁶ Ifi edeu Mose ye kereta nga burumakangiwa gbomangina meic meickea imoc meyunuma Lewingic yemmeec.

⁷ Ye Geresonggac areng yeneng ua megecde, imocac negensima kereta yohockang nga burumakangiwa neackpac imoc yeni yemmeec.

⁸ Yemmema Meraringic yeneng ua megecdeac kereta neackpac nga burumakangiwa eit imoc yemmeec. Yeni sasawa womonggareng Aharon yeac medaha Itamarngo yenenggareng ayemmemanu yeac bageu ua megecde, ua imocac negensima yeneac mariu faiyunudarec.

⁹ Nga kehatngic yeneac ua imoc wiac kpetiac fuanginau tofohogecdeac deyec deyemmea imocac amma yeni mong mi yemmeec.

Ngicenara yeneng sese faigec

¹⁰ Nga arata kerecdoku nadzicmiec wenac imohaingoc ngicenara yeneng arata desi desiac sesengina arata fanihau faigec.

¹¹ Anu Kebungo Mose yofi edeec, “Ngicenara yeni sasawango arata desi desiac sesengina wenac twelfac manau tembuc tembuc faibisia. Imocac mong ye wenac monnu nga mong ye wenac monnu ifi nga ifi faidacbisia.”

Yehuda

¹² Ifi anu wenac kpete mocgu imohai Yehudaac kisicfunac Amminadaw medaha Nahesongngo sese faiec.

¹³ Yeng sese dema tera mong silwango memea mehama faiec, imocac ebiha shekelkpete 130 anec. Nga ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

¹⁴ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

¹⁵ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

¹⁶ Nga ye kopocsic meic meickeac seseac negemma noningngiwa mong faiec.

¹⁷ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Amminadaw medaha Nahesongngo sesea ifi faiec.

Yissaskar

¹⁸ Anu wenac kpete yohockang, imohai Yissaskar areng yeneac ngicenarangina Tsucar medaha Netanecelngo sesea mehaec.

¹⁹ Amma yeng sese yofi faiec, tera mong silwango memea mehama faiec, imocac ebiha shekelkpete 130 anec. Nga ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

²⁰ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

²¹ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa mong kifaya mocgu angana imoc faiec.

²² Nga ye kopocsic meic meickeac seseac negemma noningngiwa mong faiec.

²³ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Tsucar medaha Netanecelngo sesea ifi faiec.

Dzewulun

²⁴ Anu wenac kpete harebec, imohai Dzewulun arennunac yeneac ngicenarangina Helon medaha Elicawngo sesea mehaec.

²⁵ Amma yeng sese yofi faiec, tera mong silwango memea mehama faiec, imocac ebiha shekelkpete 130 anec. Nga ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

²⁶ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

²⁷ Amma sesegerec hafoangoc ohogecdeac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

²⁸ Nga ye kopocsic meic meickeac seseac negemma noningngiwa mong faiec.

²⁹ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Helon medaha Elicawngo sesea ifi faiec.

Recuwen

³⁰ Anu wenac kpete neackpac imohai Recuwen areng yeneac ngicenarangina Sedecur medaha Elitsurngo sesea mehaec.

³¹ Amma yeng sese yofi faiec, tera mong silwango memea mehama faiec, imocac ebiha shekelkpete 130 anec. Nga ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

³² Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

³³ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu mi angana imoc faiec.

³⁴ Nga ye kopocsic meic meickeac seseac negemma noningngiwa mong faiec.

³⁵ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong amma noningngiwa marimong amma ramangiwa medaha kifangina mocgu angana marimong faiyunuec. Imoc Sedecur medaha Elitsurngo sesea ifi faiec.

Simecon

³⁶ Anu wenac kpete marimong, imohai Simecon areng yeneac ngicenarangina Tsurishaddai medaha Selumicelngo sesea mehaec.

³⁷ Amma yeng sese yofi faiec, tera mong silwango memea mehama faiec, imocac ebiha shekelkpete 130 anec. Nga ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

³⁸ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

³⁹ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu mi angana imoc faiec.

⁴⁰ Nga ye kopocsic meic meickeac seseac negemma noningngiwa mong faiec.

⁴¹ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Tsurishaddai medaha Selumicelngo sesea ifi faiec.

Gad

⁴² Anu wenac kpete siks imohai Gad areng yeneac ngicenarangina Decucel medaha Elyasafngo sesea mehaec.

⁴³ Amma yeng sesea yofi faiec, tera mong silwango memea mehama faiec, imocac ebiha shekelkpete 130 anec. Amma ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

⁴⁴ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

⁴⁵ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

⁴⁶ Nga ye kopocsic meic meickeac seseac negemma noningngiwa mong faiec.

⁴⁷ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Decucel medaha Elyasafngo sesea ifi faiec.

Efrayim

⁴⁸ Anu wenac kpete sewen, imohai Efrayim areng yeneac ngicenarangina Ammihud medaha Elisamacngo sesea mehaec.

⁴⁹ Amma yeng sese yofi faiec, tera mong silwango memea mehama faiec, imocac ebiha shekelkpete 130 anec. Amma ye sokoc mong silwango memea faiec, imocac ebiha shekelkpete 70 anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

⁵⁰ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

⁵¹ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana, imoc faiec.

⁵² Nga ye kopocsic meic meickeac seseac negemma noningngiwa mong faiec.

⁵³ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Ammihud medaha Elisamacngo sesea ifi faiec.

Manasse

⁵⁴ Anu wenac kpete eit imohai Manasse areng yeneac ngicenarangina Peda-Tsur medaha Gameclicelngo sesea mehaec.

⁵⁵ Anu ye sese yofi faiec, tera mong silwango memea mehama faiec, imocac ebiha shekelkpete 130 anec. Nga ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga teratoau wit uha gombunga yombong kerecdokugoc yerec yerecgea imoc wake wakea taroc.

⁵⁶ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

⁵⁷ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

⁵⁸ Nga ye kopocsic meic meickeac seseac negemma noningngiwa mong faiec.

⁵⁹ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Peda-Tsur medaha Gameclicelngo sesea ifi faiec.

Benyamin

⁶⁰ Anu wenac kpete nain, imohai Benyamin areng yeneac ngicenarangina Gideconi medaha Awidangngo sesea mehaec.

⁶¹ Anu ye sese yofi faiec, tera mong silwango memea mehama faiec, imocac ebiha shekelkpete 130 anec. Amma ye sokoc mong silwango memea faiec, imocac ebiha shekelkpete 70 anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

⁶² Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

⁶³ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

⁶⁴ Nga ye kopocsic meic meickeac seseac negemma noningngiwa mong faiec.

⁶⁵ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Gideconi medaha Awidangngo sesea ifi faiec.

Dan

⁶⁶ Nga wenac kpete ten, imohai Dan areng yeneac ngicenarangina Ammisaddai medaha Ahicedzerngo sesea mehaec.

⁶⁷ Anu ye sese yofi faiec, tera mong silwango memea mehama faiec, imocac ebiha shekelkpete 130 anec. Amma ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

⁶⁸ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

⁶⁹ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

⁷⁰ Nga ye kopocsic meic meickeac seseac negemma noningngiwa mong faiec.

⁷¹ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Ammisaddai medaha Ahicedzerngo sesea ifi faiec.

Aser

⁷² Anu wenac kpete ilewen, imohai Aser areng yeneac ngicenarangina Ohran medaha Pagicelngo sesea mehaec.

⁷³ Anu ye sese yofi faiec, tera mong silwango memea mehama faiec, imocac ebiha shekelkpete 130 anec. Amma ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

⁷⁴ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

⁷⁵ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

⁷⁶ Nga ye kopocsic meic meickeac seseac negemma noningngiwa mong faiec.

⁷⁷ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Ocran medaha Pagicelngo sesea ifi faiec.

Naftali

⁷⁸ Anu wenac kpete twelf, imohai Naftali areng yeneac ngicenarangina Enan medaha Ahiracngo sesea mehaec.

⁷⁹ Anu ye sese yofi faiec, tera mong silwango memea mehama faiec, imocac ebiha shekelkpete 130 anec. Amma ye sokoc mong silwango memea faiec, imocac ebiha shekelkpete sewenti anec. Kpete imoc kpetiac amaac shekelkpeteac sirihau memea. Nga seseac yakaac negemma terau nga sokocfu wit uha gombunga yombong kerecdokugoc yerec yerecgea imoc wake wakea taroc.

⁸⁰ Amma ye sokoc mong golngo memea faiec, imocac ebiha shekelkpete ten anec nga imoc hosuc homuna gombungaac kerecngo wakema tarec.

⁸¹ Amma sesegerec hafoangoc oho ohoac negemma burumakangiwa mocgu kifaya mocgu angana nga ramangiwa mong amma ramangiwa medaha mong kifaya mocgu angana imoc faiec.

⁸² Nga ye kopocsic meic meickeac seseac negemma noningngiwa mong faiec.

⁸³ Amma ruaeac sese yenahafoc negecdeac negemma burumakangiwa gbomea meic meickea yohockang nga ramangiwa marimong, noningngiwa marimong amma ramangiwa medaha kifangina mocgu angana marimong faiyunuec. Imoc Enan medaha Ahiracngo sesea ifi faiec.

Sesengina kpeturanggeu yofi anec

⁸⁴ Isracelac ngicenarafocngina yeni arata kerecdoku nadzicmigecac nasotoau imohaingoc desi desiac sese yofi faidacgec, tera silwango memea twelf nga teratoa silwango memea twelf amma sokoc golngo memea twelfngoc.

⁸⁵ Nga tera silwango memea mocgu mocguac ebicngina imoc shekelkpete 130 anec nga sokoc silwango memea mocgu mocguac ebicngina imoc shekelkpete sewenti anec. Wiac sasawa silwango memea yeneac ebicngina imoc shekelkpete 2 400 anec, imoc kpetiac amaac shekelkpete feec, imocacsoc medacgec.

⁸⁶ Amma sokoc twelf golngo memea hosuc homungkerenggac sopogoc wake wakea tacgec, mocgu mocgu sasawa imocac ebicngina imoc shekelkpete ten anec. Sokoc golngo memea sasawa yeneac ebicngina imoc kpeturanggema shekelkpete 120 anec. Imoc kpetiac amaac shekelkpete feec, imocacsoc megec.

⁸⁷ Nga ramaburumaka sasawa sesegerec hafoangoc oho ohoac negemma mehagec imoc burumakangiwa twelf, ramangiwa twelf nga ramangiwa medaha kifangina mocgu angana imoc twelf, imoc sasawa sese imocac yakagoc faigec. Amma kopocsicac seseac negemma noning twelf, ifi faigec.

⁸⁸ Nga ruaeac sese yenahafoc negecdeac ramaburumaka sasawa imoc burumakangiwa twentifo, ramangiwa siksti, noning siksti, ramangiwa medaha kifangina mocgu angana sikstingoc faigec. Imoc arata kerecdoku nadzicmima sese imohai faidacma desigec.

⁸⁹ Anu Mose ye Kebugoc yoac denegeng anecdeac Kebugoc ewacemeemeac kporucamau emma wiac heigboriyemmeudeac katapaac witiau tapeau keruw yohockang taroc yereac botucngirau Kebuac ubaudumeng hau negenec.