Bangec kisiu 4 - Deduamiti

Kehatngic uayoac deyemmeec

¹ Anu Kebungo Mose nga Aharon yoac yofi edeyuruec,

² “Ngeri Lewingic yenearunac Kehatac medacfora fingecsahengina nga amaarengnginasoc modacma kpetengina mebesera.

³ Imoc ngic kifangina tetiunac namma emma fifti, yeni Kebugoc ewacemeemeac kporucama manau marimefic ua naric megecdeacsoc andae, ngic imoc yeni kpetengina medacbesera.

⁴ Kehatac medacfora yeni Kebugoc ewacemeemeac kporucama mana kpetiacfu wiac kpetiac nga kpataning yombong, imoc sasawa sinnu kenggecde imohai garenggekecbisia. Yeni ua imoc mekecbisia.

Katapa

⁵ Anu Isracelngicngac kporucamahabunginagoc yeni efaima yacma kembeso ammagec Aharon nga medacfora yeni Kebugoc ewacemeemeac kporucamau emma kporuc katapa hedzickema nande, imoc mesima imocngo Kebungo wiac heigboringemmekecduaeac katapa kperahebisia.

⁶ Kperahama imocac witiau sel dolfin kondungyanggac seberango memea, imoc witiau monggoc kperahama kporuc kibia dorong imoc momoc witiau kperahama tofoya ring manau sineyuru kembesera.

Tatac

⁷ Faima icsogong kpara Kebungo nenigoc kecde, imocac tatacfu kporuc kibia dorong mongngo kperahama imocac witiau teragedanga nga sokocgedanga amma kpakenecgedanga nga seseac dokuac kpakenec kuneng sasawa faidacbisia. Nga nasosocac icsogong imoc ifingoc imohai faigec takecbeso.

⁸ Taru kporuc kibia sacsac mong mema wiac imoc sasawaac witiau kperahama dolfin kondungyanggac seberango kperahadacma tofoya sineyuru kembesera.

Kifanananga

⁹ Anu yeni kporuc kibia dorong mong mema kifanananga nga kifagedanga nga fitacgedanga teragedanga amma kerecdokuac sokoha sasawa, imoc wiac imocac uaac wiac sasawa, imoc hedzickedacbisia.

¹⁰ Amma yeni kifanananga nga wiacgedanga sasawa imoc toru mong dolfin kondungyanggac seberango mema, imohai baniyunuma dzake mong tofoyagoc mema witiau faibisia.

Arata

¹¹ Ammanu arata golngo memea, imocac witiau kporuc kibia dorong tiamema dolfin kondungyanggac seberango imoc kperahama tofoya sineyuru kembesera.

¹² Anu womonggac uaac wiacgedanga sasawa kpetiac womonggac manau mekecandae imoc kporuc kibia dorong, imocac manau baniyunuma imoc dolfin kondungyanggac seberango biranggema tofou faiyunubisia.

¹³ Nga sese oho ohoac arata imocac hama meickema kporuc kibia giweng imocac witiau kperahabisia.

¹⁴ Nga arata witiau sese ua megecde imocac wiacgedanga sasawa, imoc gerecac teragedanga, saracgedanga, sapacgedanga nga sokoha sasawa faidacbisia. Faima imoc dolfin kondungyanggac seberango kperahama tofoya sineyuru kembesera.

Kehatngic imoc tofohogecde

¹⁵ Anu Aharon nga medacfora yeni wiac kpetiac sasawa nga imocac wiacgedanga sasawa kperahadacgec wisickeu kporucamahabu sasawa efaima kembeso anggecde naso imohai kehatngic yeni wiac imoc tofohogecdeac efaima habisia. Amma yeni homebauac ine wiac kpetiac imoc meheng kpeheng mong mi ambisia. Kehatac medacfora yeni Kebugoc ewacemeemeac kporucamaac wiac imoc tofohogecdeac deyec deyemmea.

¹⁶ Anu womonggareng Aharonggac medaha Elecadzar yeng kporucwomong nga imocac manau wiac kpetiac sasawa fedacde, imoc amma yeneac uagedangngina sasawa garenggedacbeso. Imoc kifaac kerecdoku, hosuc homungkereng, seseac yaka wenacsoc faiandae amma wiac nadzicgecdeac kerecdoku.”

¹⁷ Anu Kebungo Mose nga Aharon yofi edeyuruec,

¹⁸ “Ngeri kehatareng gombunga garengyunuma yeneac fingecsahe onggongyunuec yeni Lewiac kisic yeneac botucfunac mi kpac ambisia.

¹⁹ Nga wiac kpetiac nga kpataning yombong, imocac wegenahau kemma homebauac yofi ayemmebisia. Aharon nga medacfora yeni ama mana kpetiacfu emma kehatngic tembuc tembuc sasawa yeni noc ua megecde me noc wiac tofohogecde, imoc edeyunubisia.

²⁰ Nga yeni homebauac yenaoc ine wiac kpetiac imoc kicngina tegiango hembauac manau mong mi embisia.”

Geresonngic yeneac uaareng

²¹ Anu Kebungo Mose yofi edeec,

²² “Ge ifingoc Gereson medacfora amaarengngina nga fingecsahenginasoc modacma kpetengina medacbesena.

²³ Nga arengyunuma kpetengina menade ngic imoc yeni kifangina tetiunac namma emma fifti mede amma ua Kebugoc ewacemeemeac kporucamau naric megecdeacsoc ambisia.

²⁴ Nga yeni ua yofi mebisia amma wiac yofi tofohoma mekecbisia. Imoc yeneac uangina.

²⁵ Yeni kporucwomonggac kporuc nga Kebugoc ewacemeemeac kporucama nga kperaha nga imocac witiau dolfin kondungyanggac sebera faiandaemoc amma Kebugoc ewacemeemeac kporucamaac naguyaac kporuc, imoc sasawa tofohokecbisia.

²⁶ Nga yeni ifingoc sobenggac kporuc nangkendemoc nga kporucwomong nga arataac sobenggac nagutoaac kporuc, amasobenggac kporuc amma imocac witicngina nga kporucwomonggac uaac wiac sasawa, imoc yenennoc tofohodacbisia nga imocac ua sasawa mekecbisia.

²⁷ Nga Aharon nga medacfora yeneng geresonngic dederecge ayemmegec yeni marimeficngina amma finac tofohobisia amma uangina sasawa mekecbisia. Yeni wiac sasawa tofohogecde, imoc maringinau faigec garenggedacma kecbisia.

²⁸ Anu Geresonggac fingecsaheunac ngic yeni Kebugoc ewacemeemeac kporucamau uaareng imoc mebisia. Nga womonggareng Aharon medaha Itamarngo yenenggareng ayemmeu yeac bageu ua imoc medacbisia.

Meraringic yeneac uaareng

²⁹ Anu ge Merari medacfora fingecsahengina nga amaarengnginasoc modacma arengyunuma kpetengina mebesena.

³⁰ Ge ngic sasawa kifangina tetiunac namma emma fifti mede nga ua naric megecdeacsoc andae, yeni arengyunuma kpetengina mena yeni Kebugoc ewacemeemeac kporucamau marimefic ua mekecbisia.

³¹ Yeni imohai marimefic ua sasawa mebisia, imoc yofi, yeni finac yomoc tofohobisia, kporucwomonggac fombong nga imocac icsira odac odac nga icsira herea hafoangoc sasawa amma yeneac haningina sasawa.

³² Amma yeni ifingoc icsira herea hafoangoc amasobennu totong yerecgekende, imoc haninginagoc nga kping nga witicngina amma wiacgedangngina sasawa nga imocac uaac wiac sasawa tofohodacbisia. Nga ngic mocgu mocgungo noc wiac tofohogecde, ngeni wiac imocac kpacngina arennu arengyunuma kpacbisia nga yeneng wiac imocac sirihau tofohokecbisia.

³³ Merari medacfora yeneac fingecsahe imoc yeneng Kebugoc ewacemeemeac kporucamau marimefic ua mebisia. Nga womonggareng Aharonggac medaha Itamarngo yenenggareng ayemmeu yeac bageu kecma marimefic ua imoc mekecbisia.”

Kehatngic kpetengina medacgec

³⁴ Mose nga Aharon amma ngichabu yeneac enarafocngina yeni Kehatngic fingecsahengina nga amaarengnginasoc modacma arengyunuma kpetengina medacgec.

³⁵ Ngic imoc yeni kifangina tetiunac namma emma fifti nga yeni Kebugoc ewacemeemeac kporucamau marimefic ua imoc megecdeacsoc anggec.

³⁶ Nga ngic fingecsahenginasoc arengyunuma kpetengina megec yeni 2 750 anggec.

³⁷ Mose nga Aharon yeri Kebungo Mose dederecge ammiec, imoc tofohoma Kehat fingecsaheunac arengyunuma kpetengina meoc. Nga yeni sasawa Kebugoc ewacemeemeac kporucamau marimefic ua megecdeac dedea.

Geresonngic

^38-39 Nga Geresonggac medacfora yeneac fingecsaheunac nga amaarengnginasoc arengyunuma kpetengina megec, imoc ngic sasawa kifangina tetiunac namma emma fifti nga ua naric megecdeacsoc anggec. Yeni Kebugoc ewacemeemeac kporucamau marimefic ua mekecgecdeac dedea.

⁴⁰ Nga ngic fingecsahengina nga amaarengnginasoc arengyunuma kpetengina megec, yeneac kpetengina 2 630 anec.

⁴¹ Mose nga Aharon yeri Kebungo Mose dederecge ammiec, imoc modacma Gereson areng yeneac fingecsahe arengyunuma kpetengina meoc. Nga yeni sasawango Kebugoc ewacemeemeac kporucamau marimefic ua megecdeac deyec deyemmea.

Meraringic

^42-43 Nga Meraringic yeneac fingecsahengina nga amaarengnginasoc modacma arengyunuma kpetengina megec. Ngic kifangina tetiunac namma emma fifti nga ua naric megecdeacsoc anggec yeni sasawa kpetengina megec. Amma yeni Kebugoc ewacemeemeac kporucamau marimefic ua mekecbisia.

⁴⁴ Yeni fingecsahenginasoc modacma arengyunuma kpetengina megec, imoc 3 200 anec.

⁴⁵ Mose nga Aharon yeri Kebungo Mose dederecge ammiec, yoac imoc modacma Merariareng arengyunuma kpetengina meoc, ngic imoc yeninoc.

Kebungo edeec imocacsoc meec

⁴⁶ Mose nga Aharon amma Isracelac ngicenara yeni ifi amma Lewiarenggac fingecsahengina amma amaarengnginasoc modacma arengyunuma kpetengina medacgec.

⁴⁷ Megec ngic imoc yeni kifangina tetiunac namma emma fifti meec. Amma yeni sasawango hama Kebugoc ewacemeemeac kporucamau marimefic ua mong mekecgec me finac tofoc tofoho ua mekecgec.

⁴⁸ Ngic imoc arengyunuma kpetengina megec imoc 8 580 anec.

⁴⁹ Nga Kebungo Mose dederecge ammiec, yeni imoc modacma kpetengina mema ngic tembuc tembuc sasawa yeneac marimefic ua me finac tofoc tofohoac ua yemmegec. Kebungo Mose dederecge ammiec, imocacsoc ngic tembuc tembuc sasawa yeni uayoac tembuc tembuc yemmedacgec.