Bangec kisiu 29 - Deduamiti

Hombannu sesegerec faifai

¹ Nga afo kpete sewenggac wenac kpete mocgu imohai kpekpedzuc kpetiac tacbisia. Anu wenac imohai ua mong mi mebisia. Ngeni wenac imohai trampet fifigec udumeng meficgebeso.

² Anu sesegerec hafoangoc ohogec homuna gombunga fiu Kebungo homunaac negenu ngereebeso. Imoc yofi, ngeni imohai burumakangiwa mocgu kifaya mocgu angana nga ramangiwa mocgu amma ramangiwa medaha sewen kifangina mocgu angana nga sebingina soronga yombong nga puringa kpac, imoc faikecbisia.

³ Nga sese imocac yaka imoc wit uha gombunga yombong kerecdokugoc yerecgema yofi faibisia, ngeni burumakangiwagoc efakpete 3/10 faibisia nga ramangiwagoc efakpete 2/10 faibisia.

⁴ Nga ramamedaha sewen tembuc tembucacsoc efakpete 1/10, ifi faikecbisia.

⁵ Amma noningngiwa mong kopocsic meic meickeac sese dema momoc ohogecde imocngo ngaba meic meicke ua mengemmeude.

⁶ Anu afo mong monggoc gboria erede imocac sesegerec hafoangoc ohogecde naso imohai imoc seseac yakagoc faikecbisia. Amma uamemesocac sesegerec imoc ifingoc naso imohai imocac yaka nga dokugoc faikecbisia. Ngeni imoc sasawa dederecgeyoacngina fede, imoc modacma Kebuac sesegerec hafoangoc ohogec homuna gombunga fiu yeng imoc hemma negenu ngereeude, ifi fingerudeac angkecbisia.

Kpetiackekecac kpekpedzucnaso

⁷ Anu afo kpete sewen imocac wenac ten, imohai yakasege kecma kpekpedzuc kpetiac tacbisia. Anu wenac imohai ua mong mi mebisia.

⁸ Amma sesegerec hafoangoc oho ohoya imoc yofi ohogec homuna gombunga fiu Kebungo homunaac negenu ngereebeso. Ngeni burumakangiwa mocgu kifaya mocgu angana nga ramangiwa mong amma ramamedaha sewen kifangina mocgu angana amma sebingina soronga yombong nga puringa kpac, sese imoc faikecbisia.

⁹ Faiyunuma sese imocac yaka dema wit uha gombunga yombong kerecdokugoc yerecgema faikecbisia. Ngeni burumakangiwaac efakpete 3/10 faibisia nga ramangiwa imocac efakpete 2/10 faibisia.

¹⁰ Nga ramamedaha sewen mocgu mocgu sasawaacsoc efakpete 1/10, ifi faidacbisia.

¹¹ Faima noningngiwa mong imoc kopocsic meic meickeac sese dema faibisia. Nga ngeni ifingoc kopocsic nga ngaba meickegecdeac sesegerec nga wenacsocac sese hafoangoc dzekefude amma sese sasawaac yaka nga doku momoc faikecbisia.

Afo kpete sewenggac kpekpedzuc kpetiac

¹² Anu afo kpete sewen imocac wenac kpete fiftin ngeni imohai wenac sewenggacsoc Kebuac negensima nasotoa tacma kpekpedzuc kpetiac tacbisia. Anu wenac imohai ua mong mi mebisia.

¹³ Amma ngeni sesegerec hafoangoc oho ohoac dema gerecac sese yofi mehama ohogec homuna gombunga fiu Kebungo homunaac negenu ngereebeso. Imoc burumakangiwa kifangina mocgu angana tetin nga ramangiwa yohockang amma ramangiwa kifangina mocgu angana fotin, imoc sasawa yeneac sebingina soronga yombong nga puringa kpac, ifi faiyunukecbisia.

¹⁴ Amma sese imoc yeneac yaka dema wit uha gombunga yombong kerecdokugoc yerecgema yofi faikecbisia, burumakangiwa kifaya mocgu angana tetin nga mocgu mocgu yeneac efakpete 3/10 faibisia nga ramangiwa yohockang mocgu mocgu yereac efakpete 2/10, ifi faikecbisia.

¹⁵ Nga ramamedaha fotin mocgu mocgu sasawa yeneac efakpete 1/10, ifi faikecbisia.

¹⁶ Amma ngeni ifingoc noningngiwa mong kopocsic meic meickeac sese dema faibisia. Amma ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.

Nasotoaac wenac kpete yohockang

¹⁷ Nga wenac kpete yohockang imohai ine burumakangiwa twelf kifangina mocgu angana nga ramangiwa yohockang amma ramangiwa fotin kifangina mocgu angana amma sebingina soronga yombong nga puringa kpac faibisia.

¹⁸ Ngeni sese imocgoc kpetenginaacsoc seseac yaka nga doku dedea fede imocacsoc torokpema faibisia.

¹⁹ Amma ngeni ifingoc noningngiwa mong kopocsic meic meickeac sese dema faibisia. Amma ngeni ifingoc wenacsoc sese hafoangoc dzeande, imoc faima imocac yaka nga doku momoc faikecbisia.

Nasotoaac wenac kpete harebec

²⁰ Nga wenac kpete harebec imohai ine burumakangiwa ilewen nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac faidacbisia.

²¹ Ngeni burumakangiwa nga ramangiwa amma ramamedaha kpetenginaacsoc seseac yakangina nga dokungina dedea imocacsoc momoc faikecbisia.

²² Amma ngeni ifingoc noningngiwa mong kopocsic meic meickeac sese dema faibisia. Amma ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.

Nasotoaac wenac kpete neackpac

²³ Nga wenac kpete neackpac imohai burumakangiwa ten nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac faiyunubisia.

²⁴ Amma burumakangiwa nga ramangiwa amma ramamedaha kpetenginaacsoc seseac yakangina nga dokungina dedea imocacsoc sesegoc torokpema faibisia.

²⁵ Anu ngeni ifingoc noningngiwa mong kopocsic meic meickeac sese dema faibisia. Nga ngeni ifingoc wenacsoc sese hafoangoc dzeande, imoc faima imocac yaka nga doku momoc faikecbisia.

Nasotoaac wenac kpete marimong

²⁶ Nga wenac kpete marimong imohai burumakangiwa nain nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac faidacbisia.

²⁷ Amma burumakangiwa nga ramangiwa amma ramamedaha kpetenginaacsoc seseac yaka nga dokugoc dedea imocacsoc torokpema faikecbisia.

²⁸ Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.

Nasotoaac wenac kpete siks

²⁹ Nga wenac kpete siks imohai burumakangiwa eit nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac, imoc faidacbisia.

³⁰ Anu burumakangiwa nga ramangiwa amma ramamedaha kpetenginaacsoc seseac yaka nga doku dedea imocacsoc torokpema faikecbisia.

³¹ Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande, imoc faima imocac yaka nga doku momoc faikecbisia.

Nasotoaac wenac kpete sewen

³² Nga wenac kpete sewen imohai burumakangiwa sewen nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac, ifi faiyunubisia.

³³ Amma burumakangiwa nga ramangiwa amma ramamedaha kpetenginaacsoc seseac yaka nga doku dedea, imocacsoc torokpema faikecbisia.

³⁴ Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.

Nasotoaac wenac kpete eit

³⁵ Nga wenac kpete eit imohai kpekpedzucnaso kpetiac tacbisia amma uamemesoc ua mong mi mebisia.

³⁶ Tacma sesegerec hafoangoc ohogecdeac, gerecsese yofi mehama ohogec homuna gombunga fiu Kebungo homunaac negenu ngereebeso. Imoc burumakangiwa mocgu nga ramangiwa mocgu amma ramangiwa medaha sewen kifangina mocgu angana nga sebingina soronga yombong nga puringa kpac, ifi faiyunubisia.

³⁷ Anu burumakangiwa nga ramangiwa amma ramamedaha kpetenginaacsoc seseac yaka nga doku dedea, imocacsoc torokpema faiyunukecbisia.

³⁸ Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.

³⁹ Sese imoc ifinoc nasotoangina deserigec, imohai yombong Kebuohomikecbisia. Ngeni ifingoc yoac deserigecac sese nga ubangerecac sese faibisia. Imoc sesegerecngina andeac hafoangoc ohogecde me seseac yaka me doku me ruaeac sesengina faikecbisia.”

⁴⁰ Anu Mose ye Kebungo yoac dederecge ammiec, imoc sasawa Isracelngicngac edeyunudarec.