Bangec kisiu 26 - Deduamiti

Isracelngicngac kpetengina megec naso yohockang anec

¹ Hafei homectoayagoc kpac anu Kebungo Mose nga womonggareng Aharon medaha Elecadzar yofi edeyuruec,

² “Ngeri Isracelngicngac yeneac ngichabu hafoangoc amaarengngina modacma Isracel manau ngic kifangina twentiunac namma ende amma dzikacfu kenggecdeacsoc andae yeneac kpetengina medacbesera.”

³ Ifi deu Mose nga womonggareng Elecadzar yeri Mocawac bangec tumiau Yardendoku tegia yeibigeng Yereho wegenahau imohai Isracelngicngac yoac edeyunuma yofi deoc,

⁴ “Ngic kifangina twentiunac namma ende yeneac kpetengina megec.” Imoc Kebungo Mose dederecge ammiec, ifi isoc yombong edeyunuoc. Nga Isracelac medacfora yomoc yeneng Aigitabangecfunac hagec.

Recuwen medacfora

⁵ Isracelac waracmedac Recuwen yeac medacfora yenearunac yofiguc hagec. Hanoc yearunac Hanocac fingecsahe, Falluc yearunac Fallucac fingecsahe,

⁶ Hetsorong yearunac Hetsoronggac fingecsahe amma Karmi yearunac Karmiac fingecsahe.

⁷ Areng imoc yeneng Recuwen yeac fingecsaheunac. Nga ngic yenearunac ngic yofiguc wasaihabunginausoc arengyunugec imoc 43 730 anec.

Elicawac medachora Datan nga Awiram

⁸ Nga Fallucac medaha kpara Eliacaw.

⁹ Eliacaw medacfora imoc Nemucel, Datan nga Awiram. Datan nga Awiram imoc yeri ngichabu yeneac enarahocngina meisingyuruyuruyango Koraac habuu torokpema Mose nga Aharon yereac yoac kpema Kebuac yoackpekpea ifingoc kpeoc.

¹⁰ Yoac kpegec bangecngo enara anggema Kora nga wiacfora yenigoc momoc gbokoyunudaru gerecngo ngic 250 yonohou homedacgec. Imocngo ngicngac goa yeni garengemegecdeac ma anec.

¹¹ Nga Koraac medacfora yeni ine mi homegec.

Simecon medacfora

¹² Nga yomoc Simecon medacfora fingecsahenginasoc yofi anggec, Nemucel yearunac nemucelngic yeneac fingecsahe. Yamin yearunac yamingngic yeneac fingecsahe, Yakin yearunac yakingngic yeneac fingecsahe,

¹³ Dzera yearunac dzerangic yeneac fingecsahe nga Sacul yearunac saculngic yeneac fingecsahe.

¹⁴ Areng imoc yeneng Simeconggac fingecsaheunac. Yeneac kpetengina imoc 22 200 anec.

Gad medacfora

¹⁵ Nga Gad medacfora yeneac fingecsahenginasoc yeni yofi anggec, Tsefon yearunac tsefonngic yeneac fingecsahe amma Haggi yearunac haggingic yeneac fingecsahe, nga Suni yearunac suningic yeneac fingecsahe,

¹⁶ Odzini yearunac odziningic yeneac fingecsahe, Eri yearunac eringic yeneac fingecsahe,

¹⁷ amma Arod yearunac arodingic yeneac fingecsahe nga Arecli yearunac areclingic yeneac fingecsahe.

¹⁸ Areng imoc yeneng Gad medacfora yeneac fingecsaheunac. Nga ngic imoc yenearunac ngic yofiguc wasaiarengnginausoc arengyunuma kpetengina megec imoc 40 500 anec.

Yehuda medacfora

¹⁹ Anu Yehuda medachora imoc Er nga Onan yeri Kenacanbangecfu homeoc.

²⁰ Medacfora goa yeneac fingecsahenginasoc ine yofi, Sela yearunac selangic yeneac fingecsahe, Perets yearunac peretsingic yeneac fingecsahe nga Dzera yearunac dzerangic yeneac fingecsahe.

²¹ Nga Perets medacfora yeni yofi kecgec, Hetsron yearunac Hetsrongngic yeneac fingecsahe, Hamul yearunac hamulngic yeneac fingecsahe.

²² Areng imoc yeneng Yehuda fingecsaheunac. Nga ngic imoc yenearunac ngic yofiguc wasaiarenginausoc arengyunuma kpetengina megec imoc 76 500 anec.

Yissaskar medacfora

²³ Nga Yissaskar medacfora yeni fingecsahenginasoc yofi, Tolac yearunac Tolacngic yeneac fingecsahe, Puwa yearunac puwangic yeneac fingecsahe,

²⁴ amma Yasuw yearunac yasuwingic yeneac fingecsahe nga Simeron yearunac simeronngic yeneac fingecsahe.

²⁵ Areng imoc yeneng Yissaskar fingecsaheunac. Nga ngic imoc yenearunac ngic yofiguc wasaihabunginausoc arengyunuma kpetengina megec imoc 64 300 anec.

Dzewulun medacfora

²⁶ Nga Dzewulun medacfora yeni fingecsahenginasoc yeni yofi, Sered yearunac seredengic yeneac fingecsahe amma Elon yearunac elongngic yeneac fingecsahe nga Yahelecel yearunac yahelecelngic yeneac fingecsahe.

²⁷ Areng imoc yeneng Dzewulun fingecsaheunac. Nga ngic imoc yenearunac ngic yofiguc wasaihabunginausoc arengyunuma kpetengina megec imoc 60 500 anec.

Yosef medachora

²⁸ Nga Yosef medachora Manasse nga Efrayim yereac fingecsahengira yofi,

²⁹ Manasse medacfora yeni yofi, Makir yearunac makiringic yeneac fingecsahe, nga Makir ye Gilecad mama. Gilecad yearunac Gilecadngic yeneac fingecsahe.

³⁰ Nga yomoc yeneng Gilecad medacfora, Icedzer yearunac icedzeringic yeneac fingecsahe amma Helek yearunac helekingic yeneac fingecsahe

³¹ nga Asricel yearunac asricelngic yeneac fingecsahe, Sehem yearunac sehemngic yeneac fingecsahe

³² nga Semida yearunac semidangic yeneac fingecsahe amma Hefer yearunac heferingic yeneac fingecsahe.

³³ Nga Hefer medaha Tselafehad ye medacfora kpac, naroangforasac fingecgec nga yeneac kpacngina yofi, Mahela, Noca, Hagela nga Mileka amma Tirtsa.

³⁴ Areng imoc yeneng Manasseac fingecsaheunac. Nga ngic imoc yenearunac yofiguc wasaihabunginausoc arengyunuma kpetengina megec, imoc 52 700 anec.

Efrayim medacfora

³⁵ Nga yomoc Efrayim medacfora yeneac fingecsahenginasoc, Sutela yearunac sutelangic yeneac fingecsahe amma Beher yearunac beheringic yeneac fingecsahe nga Tahan yearunac tahanngic yeneac fingecsahe.

³⁶ Nga yomoc Sutela medaha mocgu anec. Eran yearunac erangngic yeneac fingecsahe.

³⁷ Areng imoc yeneng Efrayim fingecsaheunac. Nga ngic imoc yenearunac ngic yofiguc wasaihabunginausoc arengyunuma kpetengina megec, imoc 32 500 anec. Nga ngic imoc yeni Yosefac nambaracfora yeneac fingecsahenginasoc.

Benyamin medacfora

³⁸ Nga yomoc Benyamin medacfora yeneac fingecsahenginasoc, Wela yearunac welangic yeneac fingecsahe, Asebel yearunac asebelngic yeneac fingecsahe, Ahiram yearunac ahiramngic yeneac fingecsahe,

³⁹ Sufam yearunac sufamngic yeneac fingecsahe nga Hufam yearunac hufamngic yeneac fingecsahe.

⁴⁰ Nga Wela medachora yeri Ared nga Nacaman. Amma Ared yearunac aredingic yeneac fingecsahe, Nacaman yearunac nacamangngic yeneac fingecsahe.

⁴¹ Areng imoc yeneng Benyamin medacfora yeneac fingecsaheunac. Nga ngic imoc yenearunac ngic yofiguc wasaihabunginausoc arengyunuma kpetengina megec imoc 45 600 anec.

Dan medaha mocgu

⁴² Nga Dan medaha mocgu yearunac fingecsahe yofi fingecgec, Suham yearunac suhamngic yeneac fingecsahe. Areng imoc yeneng Danggac fingecsaheunac.

⁴³ Suhamngicac areng sasawa ngic imoc yenearunac ngic yofiguc wasaihabunginausoc arengyunuma kpetengina megec imoc 64 400 anec.

Aser medacfora

⁴⁴ Nga Aser medacfora yeni fingecsahenginasoc yofi, Yimna yearunac yimnangic yeneac fingecsahe amma Yiswi yearunac yiswingic yeneac fingecsahe nga Weri yearunac weringic yeneac fingecsahe.

⁴⁵ Nga Weri medacfora yeneac fingecsahengina imoc yofi, Hewer yearunac heweringic yeneac fingecsahe, Malekicel yearunac malekicelngic yeneac fingecsahe.

⁴⁶ Nga Aser yeac naroanga kpara Sarac.

⁴⁷ Areng imoc yeneng Aser medacfora yeneac fingecsaheunac. Nga ngic imoc yenearunac ngic yofiguc wasaihabunginausoc arengyunuma kpetengina megec imoc 53 400 anec.

Naftali medacfora

⁴⁸ Nga Naftali medacfora yeneac fingecsahenginasoc yeni yofi, Yahetsecel yearunac yahetsecelngic yeneac fingecsahe, Guni yearunac guningic yeneac fingecsahe,

⁴⁹ Yetser yearunac yetseringic yeneac fingecsahe nga Sillem yearunac sillemngic yeneac fingecsahe.

⁵⁰ Areng imoc yeneng Naftali medacfora yeneac fingecsaheunac. Nga yeni wasaihabunginausoc arengyunuma kpetengina megec, imoc 45 400 anec.

⁵¹ Nga isracelngic wasaihabunginausoc arengyunuma kpetengina megec, imoc kpeturanggema 601 730 anec.

Bangec hendzicma yemmebesonga

⁵² Anu Kebungo Mose yoac yofi edeec,

⁵³ “Kpacnginaac kpetengina fekende, imocac siricfu bangec hendzicma yemmegec tembuc tembuc mema minginasoc ambisia.

⁵⁴ Ngeni kisic monggac ngichabu kuneng yeni bangec kuneng yemmebisia nga kisic monggac ngichabu kapia yeni bangec kapia yemmebisia. Imoc ngic wasaingichabuu kpetengina fede, imocac siricfu bangec hendzicma yemmebisia.

⁵⁵ Bangec imoc kpeing kpema hendzicbesonga. Ngeni ngicngacareng yeni kisicfocngina yeneac kpacareng nga kpetengina fekende, imocac siricfu bangec imoc mema mingina ambisia.

⁵⁶ Amma kpeing kpegec foraya fingerudesoc kisicfocngina modacma habu kuneng nga kapia bangec imoc mema mingina anggecdeac hendzicma yemmebisia.”

Lewingic kpetengina megec

⁵⁷ Nga Lewiac kisicfunac ngic yomoc fingecsahenginasoc arengyunuma kpetengina megec, Gereson yearunac geresonngic yeneac fingecsahe amma Kehat yearunac kehatngic yeneac fingecsahe nga Merari yearunac meraringic yeneac fingecsahe.

⁵⁸ Areng yomoc yeni Lewiac kisicfunac fingecsahengina, liwningic yeneac fingecsahe, hewerongngic yeneac fingecsahe, mahelingic yeneac fingecsahe, musingic yeneac fingecsahe, korangic yeneac fingecsahe. Nga Kehat ye ine Ameram mama.

⁵⁹ Nga Ameram enema kpara Yohewed, ye Lewiac naroang Aigitabangecfu fingerec. Nga ye Ameramgarunac Aharon nga Mose amma naingngira Miryam meyunuec.

Aharon medacfora

⁶⁰ Nga Aharon medacfora yofi fingecgec, Nadaw, Awihu, Elecadzar nga Itamar.

⁶¹ Anu Nadaw nga Awihu yeri ine gerec siriha mong mi faigecdeac dedea imoc sese isoc mehama Kebuac kicfu faima homeoc.

⁶² Nga Lewingic sasawa afongina mocgunac namma ende yeni arengyunuma kpetengina megec imoc 23,000 anec. Yeni Isracelngicngac yeneac botucnginau bangec mong mi yemmeyemmea, imocac amma yenigoc arengyunuma kpetengina mi megec.

⁶³ Mose nga womonggareng Elecadzar yereng Mocawac bangectumia Yardendoku tegia yeibigeng Yereho wegenahau imohai isracelngic wasaihabunginausoc arengyunuma kpetengina meoc.

⁶⁴ Anu Mose amma womonggareng Aharon yeri warac Sinai bangeckisiu isracelngic wasaihabunginausoc arengyunuma kpetengina meoc, ngic imoc yenearunac mongngo habu yomoc yeneac botucfu mong mi kefec.

⁶⁵ Imoc yofiac, Kebungo yeneac yofi deec, “Yeni bangeckisiu homegecde.” Ifi anu yenearunac ngic mongngo mi kefec, Yefunne medaha Kalew nga Nun medaha Yehosuac yerengsac kefoc.