Bangec kisiu 14 - Deduamiti

Ngicngac yeni ubakpekpeyoac degec

¹ Ifi degec tofocnac imohai ngichabu hafoangoc yeni uba udumengngina miacma arohomumunggema tofocnac hafoangoc kiacgec.

² Nga Isracelngicngac sasawa nga ngichabu hafoangoc yeni Mose nga Aharon yereac ubakpekpeyoac yofi deyecmegec, “Neni Aigitabangecfu kecma homebing imoc ngereebac! Me bangec kisi yomohai homebing imocngo naric ambac!

³ Nga Kebungo nocac neni hesicnunuma kenu bangec yomohai dzikacac beangngo nunugec homenide nga enemmedacfocnina wangecnunuma meyunuma kenggecde. Imocac neni Aigitabangecfu dzigenema kennide, imocngo negenni naric anude.”

⁴ Ifi dema yenaocngoc yofi denegeng anggec, “Nenang ngicenara mong meisinggeni yeng naric wangecnunuu dzigenema Aigitabangecfu kennide.”

⁵ Ifi degec Mose nga Aharon yeri Isracelac ngichabu hafoangoc kpedzucyunuec nanggec yeneac kicfu kicmesungira bangecfu hetutuckema feoc.

⁶ Nga Nun medaha Yehosuac amma Yefunne medaha Kalew yeri ngic bangec sufu sufu hennegeng anggec imoc yenearunac yeri wambangira maringirango mesurackeoc.

⁷ Mesurackema Isracelac ngichabu hafoangoc yofi edeyunuoc, “Neni bangec sufu sufu hennegeng annideac ferecgema kening imoc bangec gombunga yombong.

⁸ Nga Kebungo nenanggac negenu ngereeudeu yeng naric imohai hesicnunuma bangec imoc nemmeude. Bangec imohai namu nga hanifosoc doku isoc hakecde.

⁹ Nga ngeni Kebuac yoara kpekecma ebic meficgedae. Ngeni faka mangana imoc wayombonggebisia. Amma ngeni bangec imocac ngicngac yeneac kengec amma mi kecbisia. Nenang yunukporac naric ayemmenide, imoc wiac efea anude. Yeneac memeficngina imoc bic meickeec nga Kebungo nenanggoc kecma meficnunuude, imocac ngeni yeneac mi kengecngunubeso.”

¹⁰ Ifi edeyurugec ngichabu hafoangoc yeneng ine yofi arohogec, “Hoc mema ukuma yererebeso!” Ifi arohomagec Kebuac kibikperagitoango Isracelngicngac sasawa yeneac kicfu Kebugoc ewacemeemeac kporucamau fingectegeru henggec.

¹¹ Henggec KebungoMose yofi edeec, “Ni ngicngac yomoc botucnginau kucfaka hania hania meanduae, imoc sasawa henggec anu yeni ngadenuma kecdae, faka imoc ine mong mi wagecde amma mi negensinnudae.

¹² Neng deba hafei homectoayagocngo yunuhomema kpetotieyunuu kpac anggecde. Anu ge ine mesaheguba ngicngacareng kuneng anna kucgango yeneac kucngina feraheude.”

¹³ Ifi deu Mose ye Kebu yofi edeec, “Ge ifi anna aigitangicngac yeni geac siduc yofi negenggecde! Ge kuctoagagocngo ngicngacareng yomoc botucnginaunac hesicyunuma hanec.

¹⁴ Amma bangec yomocac mingina yeni imoc edeyunugec kedzacnginango yofi bic negenggec, ‘Kebu ge ngicngac yomoc yeneac botucnginau kecna kicnginango genggec. Ge wenacfu yeneac witinginau hoeng manau waraiyemmema kengkecnec nga tofocnac gerec manau kecma waraiyemmeannec.’

¹⁵ Anu geng ngicngacareng yomoc naso mocgungoc sasawa yunuhomenadeu bangecareng yeni warac kedzacnginango geac yoacsiduc negenggecmoc yeni siduc imoc negemma yofi degecde,

¹⁶ ‘Kebu ye ngicngacareng yomoc yeni bangec yemmeudeac deserima edeyunuecmoc imohai hesicyunuma kenudeac obohoma bangeckisiu kpebucyunuec.’

¹⁷ Ifi fingecbacac sifu yofi anna, ge deserima denec, yoac imoc modacma kucga engenatoa mekperagiyemmebesena.

¹⁸ Kebu ge herebugaac kuha garenggekecnec imoc bic mi fingecande, nocac ge yoac dedzege amma imoc modackecnec. Amma ngicngac angammemengina mangana amma goa memanganeyunugec nga singyoac kpegec ge yeneac kopocsic waannec. Nga ge kopocsicngina eng mi wanade. Imoc yofi, manggac yeni angammemengina mangana amma goa memanganeyunukecgec, geng imoc nambaracfocngina nga esangabofocngina yenearu turunga kpounade nga kpoubesannec.

¹⁹ O Kebu ge dzadzahac dzegema imoc modackecnec, fakaga seria imoc modacna ngicngac yomoc yeni faka mangana anggenggec, ge imoc sifu wayemmena. Negennec, yeni Aigitabangecfunacngoc hakecma yaguc bangec yomohaingoc hasikegec geng kopocsicngina wama kengkecnec ifi isocngoc yaguc ifingoc kopocsicngina imoc ifingoc wayemmena.”

Anutuarunac turunga hayemmeude

²⁰ Ifi deu Kebungo yofi edeec, “Ge yoac dedang, imoc modacma kopocsicngina waduae.

²¹ Amma ni kecyombonggeduae nga Kebu neac kibikperagitoango bangectoa bangec hafoangoc sokodacma fede. Nga ni yofi ayemmebade,

²² Ngic sasawango neac kibikperagina henggec amma Aigitabangecfu nga bangeckisiu negensinggegecdeac faka morora mema edzacngunuba imoc hengkecgec, yenennoc faitobannu fainuma ubaudumennaac kedzac mi kpegec, imoc naso ten ande.

²³ Nga bangec yemmebadeac kisicfocngina deserima edeyunuai imoc yenearunac ngic mongngo yenearunac naric mi henude. Yeni ngadenuma kecgecac yenearunac mongngo bangec imoc naric mi henude.

Asu siriha mong Kalewaru feec

²⁴ Anu enactofoc tofohongicna Kalew yearu ine asu siriha mongngo wakema fede nga yeng angammemea sasawau ni modacnuma kecde. Imocac amma ni ye hesickema bangec kemma henec, bangec imoc faimiba yeac fingecsahe yeneng bangec imoc megecde.

²⁵ Anu amelekngic nga kenacanngic yeneng tumiatoa emu fede, ihai kecdaeac ngeni wereckenu meremma sing monnusing kemma bangec kisiac sinnu kondung sacsacfubigeng kembisia.”

Bangec kisiu homedacgecde

²⁶ Amma Kebungo Mose nga Aharon yoac yofi edeyuruec,

²⁷ “Ngichabu yomoc yeni ubaherenginau faka mangana arenggema neac ubakpekpeyoac denemma kecdae, ngeni fakangina mangana imoc mong mi wadae. Isracelngicngac imoc yeni ubakpekpeyoac tatahoc denengkecdae imoc negemma kecduae.

²⁸ Imocac yoac yofi edeyununa, ‘kebungo yofi dede, Forangoc, ni kecduae. Imocac ngeni yoac degec kedzacnango negenai, imocac siricfu wiac angemmebade.

²⁹ Ngeni ubakpekpeyoac denemma kecgecac ngicmedac kifangina twentiunac namma ende arengngunuma kpetengina meing ngeni sasawango bangec kisi yomohai makpema homedacgec farengngina fekenggecde.

³⁰ Nga ni marina sawau sinema deserima bangec imohai kecgecdeac deai imohai ngenearunac mongngo mi kenude, kpac. Imoc Yefune medaha Kalew nga Nun medaha Yehosuac yerisac enecde.

³¹ Anu nambaracfocngina kapia ngaba yeneac mariu enggecde degec, ni ine imoc yeni hesicyunuma ngeneng bangec ngadehema suregec, imohai faiyunudacba bangec imoc negenggecde.

³² Nga ngeneac farengngina ine bangec kisi yomohai fekenude.

³³ Anu ngeneng yoac modac modacngina mong mi fengemmedeac amma nambaracfocngina yeneng ramaburumakagareng amma bangeckisiu kifa foti kecmagec ngeni homedacma farengngina bangeckisiu hoaema bangec monggoc anude.

³⁴ Ngeni wenac foti sufu sufu kengkecma bangec hennegeng angkecgec, ifi isoc wenac mocgu mocguac turunga kifa mocgu mocgu kopocsicnginaac ebic tofohogecde, imoc kifa foti ifi kecgecde. Ifi kecma yofi negentegecgecde, neng marina meickema warac angemmekefai, ifi isoc monggoc mi ambade.’

³⁵ Kebu neng yoac imoc dedua amma monggoc debade, ‘Ngichabu hafoangoc yomoc yeni ubaherenginau faka mangana arenggema uba mocgu amma neac yoac kpekecdae yeni bangec kisi yomohai kekecngina wisickeu bangec yomohaingoc homegecde.’ ”

Bangec hennegengngic ten homegec

³⁶ Anu Mosengo ngic bangec sufu sufu hennegeng anggecdeac sueyunuu kenggec. Yeni kemma monggoc dzigenema ngichabu hafoangoc yeneac kicfu bangec imocac yoacsiduc mangana amma ye ubakpekpeyoac homac demima kecgec.

³⁷ Ngic ten imoc yeni bangec imocac yoacsiduc mangana angkecmagec Kebuarunacebictoa mongngo hama yunuu yeac kicfu homegec.

³⁸ Homegec bangec sufu sufu hennegeng anggecdeac kenggec ngic imoc yeneac botucfunac Nun medaha Yehosuac nga Yefunnec medaha Kalew yerengsac kefoc.

Kebuac yoac kpema dzikacfu kenggec

³⁹ Anu Mose ye yoac imoc Isracelngicngac sasawa edeyunudaru ngicngacareng yeni imoc negemma ubahodung kuneng anggec.

⁴⁰ Amma yeni asoacngoc yombong yacma tikibangecfu enggecdeac negemma yofi degec, “Neni efaima nandimbe. Neni kopocsic meficgeing, fora, amma neni yaguc Kebungo bangec ennideac deecmoc imohai ennideac negendimbe.”

⁴¹ Ifi degec Mosengo yofi merengyemmeec, “Ngeni nocac Kebuac dederecgeyoac ferahegecdeac ambeso andae? Ngeni ifi anggecdeu firang mi anggecde.

⁴² Nga Kebungo ngenigoc mi kecdeac mi embisia. Enggecdeu ngabafocngina imoc yeneng ngabafocngina goa yeneac kicfu ngunubauac.

⁴³ Ngeni Kebu wama ngadehegecac amma amalekngic nga kenacanngic yeni imohai dzikacac beangngo ngunukpebuc andacgecde. Ifi anu Kebungo ngenigoc mi kefude.”

⁴⁴ Anu yeni imoc negemma sifu ubaseri amma ewegecdeac tikibangecfubigeng enggec. Anu Kebuac dzadzahaac katapa nga Mose yeri kporucamabangec mi wama kenoc.

⁴⁵ Tikibangecfubigeng emmagec amalekngic nga kenacanngic tikibangec imohai kecgec yeneng mama yunukporac ayemmegec singsararang kpema kengkecma Horma bangecfungoc kendacgec.