Bangec kisiu 12 - Deduamiti

Miryam nga Aharon yeri Mose keracmangang ammioc

¹ Mose ye kusitngac mong meu enema anecac Miryam nga Aharon yeri imocac keracmangang ammioc.

² Ammima yeri yofi deoc, “Kebungo Mosearusac yoac deande imoc negende fora mi ande. Ye goa nenearu ifingoc yoac deande.” Ifi demaec Kebungo imoc negenec.

³ Nga Mose ye bangectoa bangecac witiau ngicareng imoc sasawa kecgec, yeni feracyunuma memaemema yumia yombong kefec.

⁴ Anu yeri yoac deoc imoc Kebungo negemma imohaingoc Mose nga Aharon amma Miryam yofi edeyunuec, “Ngicngac harebec imoc ngeni Kebugoc ewacemeemeac kporucamau hagec.” Ifi deu yeni kenggec.

⁵ Kenggec Kebungo hoeng manau mama kporucama naguyau namma Aharon nga Miryam wegenac kenecdeac kpacyuruu yeri kenoc.

⁶ Kenec yofi edeyuruec, “Ngeri yoacna negenec, botucnginau profete mong kefudeu ni neannaoc wiac kpefinnu edzahabade nga gaugau isoc yoacna edebade.

⁷ Nga enactofoc tofohongicna Mose ye ifi mi ammianduae, ye amana hafoangoc imocac manau naric kecde.

⁸ Ni yegoc yoac mong sangoyau mi deanduae, kpac. Ni Moseac kicfu fingec fingec mekperagiemeba nengande. Anu ngeri nocac enactofoc tofohongicna Mose desure ammibeso kengec mi andaoc?”

⁹ Anu Kebungo yereac herea buyombonggeu wayuruec.

¹⁰ Nga hoengngo kporucama witiaunac wama enu Miryam ye lepra hafeiyagoc amma sebiango ais maande, ifi isoc kongac kongac anec. Anu Aharon ye Miryamgaru dzigenema henu lepra hafeiyagoc nanec.

¹¹ Ifi hemma Mose yofi dema edeec, “O kunenna, neri negen negentegecnira kpac kecma kopocsic meficgedicac imoc nereac witinirau mi faibesena.

¹² Ngac ye nonggeaac heremanaunac homemea fingeru wiac mongngo fusia noboha nedarec, ifi isoc mi kecbeso.”

¹³ Ifi deu Mose ye Kebu kpacma yofi dema numumiec, “O Anutu, ge naric ye mengerenadeac numugenduae.”

¹⁴ Ifi deu yofi meremmiec, “Ye mamango kicmesuyau sofohobac debac game kpeu kecmanu wenac sewen wisickebac. Imocac kporucamabangecac ngadeau faigec kemema imohai witicngac amma kporucama manausac kecmanu wenac sewen wisickebeso. Wisickeu ine monggoc meerebisia.”

¹⁵ Ifi deu yeni Miryam kporucamabangecac ngadeau faigec kemema imohai kefu wenac sewen wisickeec. Nga ngicngac yeni sing torokpema mi kenggec. Yeni ihai kecmagecngoc Miryam monggoc meeregec.

¹⁶ Nga imocac ngadeau ngicngacareng yeni efaima yacma kporucamangina meickema Hatserot wama kengkecma Pacaran bangeckisiu kporucamangina kpedzigec enu guru mema tacyac anggec.