Bangec kisiu 11 - Deduamiti

Kebuarunac gerec yonohoec

¹ Ngicngac yeni naso imohai hanahema Kebuac modzotitiyoac yofi dekecgec, “Ebic hania hania fingecnemmema kecde.” Nga yoac imocngo Kebuac kedzahau kemeu negemma herea buyombonggeu yeng gerec deu botucnginau fingecma dzema kporucamabangecnginaac tegiau kecgec, yeni yonohoec.

² Yonohou ngicngacareng yeni Mose haudeac kpacgec ye Kebu numumiu yeng deu gerec bokoec.

³ Bokou Kebungo deu botucnginau gerec dzeecac amabangec imocac kpara Tawecera degec.

Yakaac hodzinggegec

⁴ Anu Isracel yeneac botucnginau ngicngacareng hania hania yeni yenearu torokpema kecgec, yeneng kekecngina efaudeac ngombongyunuma hodzinggegec. Hodzinggegec Isracelngicngac yeni ifingoc kiacma yofi degec, “Wiac fusingina songeagoc nenideac meficgenemmebisia!

⁵ Neni Aigitabangecfu kondungyang buma kpac eng mema nekefing nga sakpoc, wotamelen, laki nga aniang kambac kambac sacsac amma korucaniang negenni fede.

⁶ Nga yaguc yaka imocac songonina ande anu imoc yei mi fede, imocac homema kucnina kpac anu manyakasac nema kecdimbe.”

⁷ Manyaka imoc koriandergbomea isoc anec amma icsopea kapianec seriec, ifi isoc anec.

⁸ Anu ngicngac yeni imoc kpedzucnema hocfu hedzamema me tontonnu kpepereckegec. Kpepereckema imoc birikennu ohoma negec me icsogong mema negec. Nga icsogong imocac songea imoc icsogongbisic oliwa kerehagoc memea imocac songea isoc anec.

⁹ Nga manyaka imoc tofocnac kporucamabangecfu dzimbonggoc momoc makefec.

Naric mi garengyunubade

¹⁰ Anu ngicngac tembuc tembuc sasawa yeni amaarengnginasoc kporucamanginaac naguu tacma kiacgec Mose ye imoc negenec. Nga Kebungo herebu monggoc yombong negenu Mose ye imoc negenu mi ngereeu

¹¹ Kebu yofi edeec, “Ge enactofoc tofohoga ni nocac mangana yombong anendang? Ni negemba imoc mi ngereede. Ge neac negenna mi ngereeu ngicngacareng hafoangoc yomoc yeneac ebic imoc neac witiu fainec!

¹² Neng ngicngac sasawa imoc mi kpenangyunuma meyunuai nga yeni neac heremanaunac mi fingecgec! Nga geng yofi edenuma kecnec, ‘Ngac mongngo sabac meande, ifi isoc ngicngac yomoc yeni ifi yombong ayemmema tabugau meyununa nga neng yoac deserima mangfocngina yeneac bangec anudeac deai, imohai tofoyunuma kembesena!’

¹³ Ni yang dahacnac mema ngicngacareng yomoc sasawa gumecyunubade? Yeni neac kicfu kiacma yofi dema kecdae, ‘Ge yang meficgenemmena neni.’

¹⁴ Ni mocgusacngo ngicngacareng hafoangoc yomoc naric mi garengyunubade, imoc ni naric kpac yombong.

¹⁵ Ni ifi ambadeac negensinecfu yofinenggacngoc homecfu fainubesena, me neac negenna ngereedeu ebic yomoc meickena kpac anu imoc monggoc mi hembade.”

Ngicenara sewenti yeneng Asu megec

¹⁶ Ifi deu Kebungo Mose yoac yofi edeec, “Ge Isracel yeneac enarafocngina damoc yeneng ngicngac garengyunuma kecdae imoc yenearunac ngic sewenti naric negenyununec imoc hagecdeac kpacyununa yeni Kebugoc ewacemeemeac kporucamau hama gegoc momoc nanggec.

¹⁷ Nammagec ni mama gegoc yoac denegeng amba gearu Asu fede, Asu imocac noboha ifingoc yeneac witiu faibade. Ifi anu ngicngacareng yeneac ebic gegoc momoc tofohogec geng imoc tembucga monggoc mi tofohonade.

¹⁸ Anu ngicngac yofi edeyununa, ‘Ngeni kpetiac anggecdeac ua mema wereckenuac efaima kecmagec ama wereckenu wiac fusingina songeagoc ngemmeba negecde. Ngeni Kebuac kedzacfu kiacma yofi degec, “Neni Aigitabangecfu naric kefing, yaguc ine merang wiac fusingina songeagoc nemmeu nenide?” Ifi degecac ni Kebungina neng wiac fusingina songeagoc ngemmeba negecde.

¹⁹ Ngeni wiac fusingina songeagoc negecde, imoc wenac mocgu me yohockang me marimong me ten me twenti imoc imocacsocsac kpac.

²⁰ Ngeni imoc nema kecmagec afo mong wisickeu becngasi hesigecde. Makefu yanggac modzongina tiu urumbeso angemmeude. Imoc yofiac, Kebungo botucnginau kecde ngeni ye ubango wama yeac kicfu yofi dema kiacgec, “Neni nocac Aigitabangec wama haing?” ’ ”

Kebuac ngicngac sasawa profete ambau, imoc ngereebac

²¹ Ifi deu Mose ye yofi deec, “Ngic nigoc haningo sing hadae yeneac kpete imoc 600,000 anu ge yofi denec, ‘Ni wiac fusingina songeagoc meficgeyemmeba nekecmagec afo mong wisickeude.’

²² Nga yeneac amma ramaburumakafocnina kpehou anni naric mi socyunuude. Nga kondununac kondungyang sasawa meyunudacma gumecyununide isoc naric mi socyunuude.”

²³ Ifi deu Kebungo yoac yofi edeec, “Neac maringo ua imoc meudeacsoc ande. Yoacna ikoc me fora imocac fora yagucngoc fingeru hennade.”

²⁴ Ifi deu Mose ye kemema ngicngac yenearu kemma yoac imoc edeyunuec. Edeyunuma Isracelngicngac yeneac ngicenarafocngina sewenti kpedzucyunuma kporucama yerecgema nanggecdeac edeyunuec.

²⁵ Nanggec Kebungo hoeng manau mama Mosegoc yoac denegeng anoc. Amma yeac witiau Asu feec, imocac noboha ifingoc ngicenara sewenti yeneac witiu faiec. Fau witinginau taru yeni imohaingoc profeteyoac degec nga imocac ngadeau profeteyoac monggoc mi degec.

²⁶ Nga ngic yohockang kpacngira Eldad nga Medad yeri ifingoc ngicenaraac kpacngira oho ohoya nga yeri ngadeau mi maoc. Yeri ine wama kporucamangiraungoc tarec Asungo witingirau mau kporucamabangecfungoc profeteyoac deoc.

²⁷ Deec sebigboringic mongngo negemma nedzima kemma Mose yofi edeec, “Eldad nga Medad yeri kporucamabangecfu tacma profeteyoac dedape.”

²⁸ Ifi deu Nun medaha Yehosuac ye sebigboriaunacngoc Moseac enactofoc tofoho kefec yeng yofi edeec, “O Mose kunenna, ge hama kpae heiyecmebesena.”

²⁹ Ifi deu Mosengo yoac yofi meremmiec, “Ge neac keracmangang annec imoc mi ngereede. Kebuac ngicngac sasawa yeneac witiu Asuya faiu yeni profete ambau, imoc negemba ngereebac.”

³⁰ Mose ye ifi desima ye yengena nga Isracel ngicenarafocngina yeni kporucamabangecfu dzigenegec.

Kebungo neng meficgeyemmeec

³¹ Anu Kebungo deu kondunnunac firang kpema koneng neng fifiyunuu erema kporucamabangecngina tegiau kpututuckema kenggec. Imoc ngic wenac mocguacsoc naric kenude imocacsoc bangec wegenahau kpututukecma kengha anggec imoc bangecfunac namma ende kubit kpete yohockang anec.

³² Nga ngicngac yeni yacma wenac nga toforecfu koneng neng mekpedzuc amma kecmagec ama wereckenu torokpema mema kecmagec ama toforeec. Nga kapianec mekpedzuc anggec imoc homerkpete ten anu mocgu mocgu arengyunuma faiyunugec kporucamabangec yerecgema sokoma feec.

³³ Anu fusia nema nemangoc kecmagec Kebungo ngicngacareng yeneac herea buyombonggeu hafei homectoayagoc deu hama ngicngac yunuec.

³⁴ Yunuu homegec yeni amabangec imohai tonggoyunuma bangec imocac kpara Kiwerot Hattacawa kpacgec.

³⁵ Nga ngicngac yeni efaima yacma kporucamangina meickema Kiwerot Hattacawac wama kengkecma Hatserot kensikema imohai tacyac angec.