Bangec kisiu 1 - Deduamiti

Isracelngic arengyunuma kpetengina megec

¹ 177 Isracelngicngac yeni Aigitabangecfunac meickema kengkecmagec kifa kpete yohockang imocac afo kpete yohockanggac wenac kpete mocgu imohai Sinai bangeckisiu kensikema tacgec. Naso imohai Kebungo Kebugoc ewacemeemeac kporucamau Mose yoac yofi edeec,

² “Ngeni isracelngic kpebungngina hafoangoc yenearunac ngic sasawa fingecsahengina nga amaarengnginasoc modacma kpetengina mebisia. Ngeni ngic tembuc tembuc sasawa yeneac kpacnginaac kpete mebisia.

³ Ge nga Aharon ngeri isracelngic sasawa kifangina twentiunac namma ende nga dzikacfu naric kenggecdeacsoc andae yeneac kpetengina mema wasaingichabufocngina modacma arengyunudacbesera.

⁴ Nga Isracelac kisicfunac kisic twelf, imoc yeneac ngicenara mocgu mocgu, imoc kisicnginasoc amaarengnginaac ngicenara yombong, yeni ngerearu torokpema tacbisia.

⁵ Amma ngic yomoc yeneng ifi meficngurubisia: Recuwen yearunac Sedecur medaha Elitsur

⁶ Simecon yearunac Tsurisadai medaha Selumicel

⁷ Yehuda yearunac Amminadaw medaha Naheson,

⁸ Yissaskar yearunac Tsucar medaha Netanecel,

⁹ Dzewulun yearunac Helon medaha Elicaw,

¹⁰ Yosef medachora Efrayim yearunac Ammihud medaha Elisamac, Manasse yearunac Peda-Tsur medaha Gameclicel,

¹¹ Benyamin yearunac Gideconi medaha Awidan,

¹² Dan yearunac Ammishadai medaha Ahicedzer,

¹³ Aser yearunac Akeran medaha Pagicel,

¹⁴ Gad yearunac Decucel medaha Elyasaf,

¹⁵ nga Naftali yearunac Enanggac medaha Ohiran.”

¹⁶ Kebungo ngic imoc ngichabu yenearunac meisingyunuec. Yeni kisicfocngina yeneac fingecsaheac enarafocngina kecgec, isracelngic fingecsahengina yeneac engenafocngina.

¹⁷ Ye ngic imoc sasawa kpacngina kparu Mose nga Aharon yeri kemma yeni meyunuoc.

¹⁸ Anu yeni afo kpete yohockang imocac wenac kpete mocgu, imohai ngichabu hafoangoc kpedzucyunugec. Kpedzucyunuma fingecsahengina nga amaarengnginasoc modacma ngic tembuc tembuc sasawa kifangina twentiunac namma ende yeneac kpacngina tembuc tembuc kpacarennu arengyunuma kpetengina medacgec.

¹⁹ Imoc Kebungo Mose dederecge ammiec, imocac sirihau Sinai bangeckisiu wasaihabufocngina modacma arengyunudarec.

²⁰ Ye fingecsahengina nga amaarengnginasoc modacma kpetengina arenggeec. Yeni ngic tembuc tembuc sasawa kifangina twentiunac namma ende nga dzikacfu kenggecdeacsoc andacgec, yeneac kpetengina tembuc tembuc megec. Nga Isracel morocmedaha Recuwenggac medacfora yeneac fingecsahe yenearunac hanahema kpetengina kpeturanggema yofi anec:

²¹ Recuwenggac kisicfunac 46 500,

^22-23 Simeconggac kisicfunac 59 300,

^24-25 Gadac kisicfunac 45 650,

^26-27 Yehudaac kisicfunac 74 600,

^28-29 Yissaskarac kisicfunac 54 400,

^30-31 Dzewulunggac kisicfunac 57 400,

^32-33 Efrayimac kisicfunac 40 400,

^34-35 Manasseac kisicfunac 32 200,

^36-37 Benyaminggac kisicfunac 35 400,

^38-39 Danggac kisicfunac 62 700,

^40-41 Aserac kisicfunac 41 500,

^42-43 nga Naftaliac kisicfunac 53 400.

⁴⁴ Mose nga Aharon amma Isracel ngicenarafocngina twelf imoc yeneng ngichabu imoc kpetengina mema wasaihabufocnginaacsoc arengyunugec. Nga ngic twelf imoc yeni tembuc tembuc sasawa Isracelac kisicfunac nga amaarengnginasoc, imocac enara amma kecgec.

⁴⁵ Nga yeni amaarengngina fekenec, imoc modacma isracelngic sasawa kifangina twentiunac namma ende nga dzikacfu kenggecdeacsoc anggec nga wasaihabufocnginasoc arengyunugec

⁴⁶ yeneac kpetengina mema kpeturanggegec imoc 603 550 anec.

Lewingic

⁴⁷ Anu imoc yeneac botucfunac Lewiac kisicfunac ngic yeneac kpetengina mong mi megec amma wasaingic yenigoc mi arengyunugec.

⁴⁸ Imoc yofiac, Kebungo Mose bic yofi dema edeec,

⁴⁹ “Ge Lewiac kisicfunac ngic yeni ine wasaingic yenigoc mi arengyunubesena amma kpetengina isracelngic goa yenigoc mi mebesena.

⁵⁰ Ge ine yeni uayoac yofi yemmebesena, yeni Kebungo wiac heigboringemmekecduaeac kporucwomong wiahagoc amma uaac wiaha sasawa imoc garenggema kecbisia. Yeni kporucwomong nga imocac manau wiaha sasawa imocsac tofohodacbisia amma imocac uayasac mema kecbisia. Amma yeni kporucamangina kpedzima guru mema kporucwomong yerecgema tackembisia.

⁵¹ Nga yeni kporucamabangec mong wama kporucwomong mema bangec monnu mekembeso negenggec, imohai Lewiac kisicarengfora yenengsac kporucwomonggac wiac sasawa kpedzucnema tofoho kembisia amma yenengngoc kporucwomong monggoc kpedzigec emma nambeso. Anu ngic mongngo imocac wegenahau haudeu ye homecfu faibeso.

⁵² Isracelngic tembuc tembuc sasawango kpetengina kibiagoc gununggegec enu wasaingichabufocnginasoc kporucbedzongina imocac bageau kpedzigec enu guru mema tacyac angkecbisia.

⁵³ Nga Anutuac herebungo Isracelngicngac kpebungngina witiau mi enudeac Lewiac kisicarengfora yeni Kebungo wiac heigboringemmekecduaeac kporucwomong yerecgema kporucamangina kpedzigec enu guru mema tacyac angkecbisia. Ihai tacma yeni imoc garenggema uaya mema kecbisia.”

⁵⁴ Anu Isracelngicngac yeni Kebungo Mose dederecge ammiec, yoac imoc sasawa modacma megec ifi fingecdarec.