Aposoro 4 - Deduamiti

Petoro nga Yohane witicamau

¹ Petoro nga Yohane yeri ngicngac yoac ifi edeyunuma nammaec womonggareng amma womonggac tebengic enara nga sadukaio yeni yenahafoc yerearu kemma ihai nanggec.

² Nga ngic nanggec yereng yoac edekpou ayemmema Yesu ye enaranina mema homecfunac yarec, imocac yoacsiduc desaheyemmedarec yeni herebu negemma ngaba ayecmegec.

³ Ifi ayecmema mendangyuruma ama bic marai anecac witicamau faiyurugec tacmaec ama wereckenec.

⁴ Anu habutoango Petoro yoac deu negenggec, yenearunac homacngo imoc negensinggema Yesuac habuu torokpegec. Anu ngicngac imoc kpetengina 5 tauseng anec.

Petorongo Yesuac kpara dekperagiec

⁵ Wereckengau yudangic yeneac tutumangtoaac memba nga enarafocngina amma mitiac negen negengngic, yeni Yerusalennu kpeturanggegec.

⁶ Kpeturanggema womonggarengtoa Hanasi nga Kaifa amma Yohane nga Aresande amma womonggareng enara kecdae, yeneac arengfocngina sasawa yenahafoc kpedzucnema tacgec.

⁷ Tacma Petoro nga Yohane meyuru hama kicnginau faiyurugec. Faiyuruma yofi dekpesi ayecmegec, “Ngeri noc kucfu nga meracac kpacfu faka yomoc medaoc?”

⁸ Kpesiyecmegec Petoro ye Tiri Asungo ubeau wakeu yofi edeyunuec, “Enarameme nga Isracel garengfocnina deba negenggec.

⁹ Ngeni ngic hanimangang ye dafi ngereedac amma yearu faka gombunga dafi fingecmidac, imohaingoc kpesinecmebau.

¹⁰ Ngeni nga israengic sasawa negenggecdeac yoac yofi deireckeba, ngeneng Yesu Kristo Nadzaretenac mariponnu kpegec homeu Anutungo ye homecfunac megboriu yarec kecde. Nga yeac kpacfu ngic imoc ngereema kicnginau nande.

¹¹ ‘Amameme ngic ngeneng hoc mong mangana dema ukugec. Nga hoc imocngo amaac hoc wotung amma seria nanude nga nambesande.’ (Myeg 118:22)

¹² Ngic monggaru kpeketahegec yeng kopocsicac ebicfunac naric mi mesiyunuude, komoc kpegecdeac sing mong mi fede, kpac. Bangeha bangeha nenang Yesuac kpacfu kecni yeng kopocsicac ebicfunac mesinunuu komoc kpenide.”

¹³ Anu Petoro nga Yohane yeri kibiama yadau mong mi tarocngo kengeha kpac enacefacngoc yoac deocac yeni imoc negemma kerectegec anggec. Amma yeri Yesugoc kefoc, imoc yerensigec.

¹⁴ Anu ngic sebia ngereec, yeng yerigoc nanu henggecac yoac merengyecmegecdeac obohogec.

¹⁵ Obohoma tutumangtoaunac ayecmegec sobennu mama nammaec yenaocngoc yoac yofi dema denegeng anggec.

¹⁶ “Nenang ngic yohockang dafi ayecmenideac obohode. Yeri negensinggegecdeac faka kuhagoc yombong meec fingectegeru Yerusalennac ngicngac yeneng siduha bic negendacdau, imocac busic naric mi kpenide.

¹⁷ Nga yoac imoc amasoc kenu negendacbauac yeri Yesuac kpacfu yoac monggoc mi edekpou ayemmeecdeac dekengec ayecmeni.”

¹⁸ Ifi dema kpacyuruma yofi edeyurugec, “Ngeri Yesuac kpac ngic monggoc edekpou mi ayemmebesera.”

^19-20 Ifi degec Petoro nga Yohane yereng yoac yofi merengyemmeoc, “Wiac kicninango hening amma kedzacninango negening, imoc busic naric mi kpenide. Ngeni ngenaoc negenghenggec, ngeneac yoac me Anutuac yoac tofohobesonga. Damocngo Anutuac kicfu ngereede?”

²¹ Ifi deec yeni dekengec yoac monggoc ayecmema eng faiyurugec kenoc. Imoc yofiac, faka fingerecac ngicngac sasawa Anutu dengeregec. Imocac aposoro dafi ayemmebeso, imocac obohogec.

²² Nga ngic faka kuhagoc sebiau fingeru ngereec, ye ngicyada kifaya 40 feraheecac yeni aposoro eng wayurugec.

Anutungo kuc yemmeudeac numumigec

²³ Wayurugec Petoro nga Yohane yeri arengfocngira yenearu dzigenema kenoc. Kemma womonggareng enara amma garengfocngina yoac edeyurugec, imocac yoacsiduc edeyunudarec negenggec.

²⁴ Negemma yeni uba mocgu amma Anutu kpacma dengerema yofi degec, “Kuctoa mingina, ge kurumeng nga bangec amma kondung nga imocac iwai hania hania meficyununec.

²⁵ Geng bicngoc Tiri Asu edena yeng kisicnina amma enac tofoc tofohoga Dawidi, yeac enara meefaina yeng yoac yofi deec, ‘Foracngoc bangec monnunac ngicngac Anutu mi negemmidae, yeni faka mangana anggecdeac yoac dedzege anggec nga ngiha ngiha yeni negen negeng ua mema kpedzongemegec, imoc mi ngereeec.

²⁶ Bangecac ngictau yeni efaigec nga ngicenara uayoacnginagoc, yeni kpeturanggema Kebu memagec. Nga yeng ngic meisinggema kerecdokungo nadzicmiec, ye ifingoc memagecdeac yoac degec.’ (Myeg 2:1-2)

²⁷ Geac enac tofoc tofohoga kpetiac, imoc Yesu Kristo nga geng ye kerecdokungo nadzicminec. Nga taong yomohainoc Herode nga Pontio Pirato, yereng bangec monnunac ngic Anutu mi negemmidae, yeneng Isracel ngicngac yenigoc kpeturanggema ye keracmangang ammigec.

²⁸ Amma waracngoc geangga kucfu nga enacgango denecac sirihau ifi ammidacgec.

²⁹ O Kebu, yomoc ine dekengec yoacngina hennegeng amma enac tofoc tofohofocga kuc meficnunuma nanggenununa yoacga kengeha kpac dekperagiyemmebisina.

³⁰ Demina mariga sinena sebiu ngerec ngeree nga negensinggegecdeac faka kuhagoc nga faka mi hehena kpetiac enac tofoc tofohoga Yesu, yeac kpacfu fingeckembeso.”

³¹ Ifi numugec wisickemanu amabangec kpedzucnema tacgec, imoc kpididieu Tiri Asungo ubanginau wakeu Anutuac yoac kengeha kpac ngic enacefac deireckeyemmegec.

Yesu negensinggegec, yeni uba mocgu

³² Yesu negensinggegec, habu imoc yeni uba mocgu amma wiac feyemmeec, imocac neac geac mi dema urecngina mekecgec.

³³ Aposoro yeneng Kebu Yesu homecfunac yarec, siduc imocac hepuc amma kuhagoc dekperagigec. Nga danggunuctoayango sokoyunudacma feec.

³⁴ Yeneac botucnginau mongngo wiac monggac mi obohoec, kpac. Ngicngac sasawa amabangecnginagoc kecgec, yeni amabangecngina imoc desigec hiedzo kirecgeu

³⁵ Aposoro yenearu faigec. Faigec, yeneng ngic yeni iwaiac obohogecsoc medereyemmekecgec.

³⁶ Anu ngic mong kefec kpara Yosefe, aposoro yeneng kpara mong Banaba degec, imocac titiha yofi: Demeseri medac. Ye Lewiac arennunac Kipiro nucfu fingerec.

³⁷ Ngic yeng bangeha mong desiu hiedzo kirecgeu aposoro yenearu mekemma faidarec.