Aposoro 1 - Deduamiti

Yeni Tiri Asu megecde

¹ 2O Teofiro, ni warac yoac ohogenai, imoc Yesungo hanahema ua meec amma enacyoara kpounemmeec, imocac yoacsiduc seng anggendarai.

² Ye uaya mekengkefu nasoya wegene haec imohai Tiri Asuac kucfu aposoro warac meisingyunuec, yeni uaareng dederecge ayemmema kurumennu enec, imocac siducnoc ohodarai.

³ Yeng kpendzeng kpekecma homema monggoc gborima yacma uameme 40ac manau yengenaoc fingecsufu ayemmema faka hania hania mema Anutuac eucererenggac hania edekpou ayemmeec. Ayemmeu yeni faka imoc hemma ye fora kecde, imoc negentegecgec.

⁴ Amma yenigoc tacyac amma yoac yofi edeyunuec, “Ngeni Yerusaleng bic mi wabisia. Manggacac dedeseriyoac edengunuba negenggec, imoc fora kpeudeac tomai kecbisia.

⁵ Imoc yofiac, Yohane ye doku bic nadzicngemmeec nga yoc ine naso mi hereemanu Tiri Asu nadzicngemmeude.”

⁶ Ifi deu kpedzucnema tacgec yeneng kpesimigec, “Kebu, ge naso yomohai Isracel ngicngac monggoc kpedzucnununa neni nenang bangec ngictauninagoc amma kecnide me?”

⁷ Ifi degec yofi edeyunuec, “Manggac ye kuc minginango yeng wenac me yabungnaso hania hania faiec fede, imoc negentegecgecdeac kuc mi ngemme ngemmea.

⁸ Negenggec, Tiri Asungo ngenearu mama kuc ngemmeu ngeni siducdedefocna anggecde. Nga ngeni Yerusaleng amma Yudaia nga Samaria bangec sasawa yerecgema yoacna dekenggec bangeha bangeha sokodacbeso.”

Yesungo kurumennu enec

⁹ Yesungo ifi edeyunuma kicngina witiau efaima enec. Emmanu hoengngo kicnginaungoc merucgema meenec.

¹⁰ Meemmanu yeni fimodacma hofocgec ngic yohockang ngakpingira kongac kongacngo mi yenearu fingecma nambesera i.

¹¹ Namma yofi edeyunuoc, “Gariraia bangecfunac ngic, ngeni kicngina sawau fimangoc mi nambisia. Anutungo Yesu kurumennu meenu ye wangunuma endac. Amma ngic enu hendau, yennoc kecma siriha ifiangoc habesande.”

Yudaac turunga ngic meficgegec

¹² Anu aposoro yeni Oliwatikibumaunac dzigenema mama Yerusalennu enggec, imoc sing wegenac anu sabata nasou sing imoc naric kengha angkecgec.

¹³ Yerusalennu kemma ama tacyac angkecgec, imohai emma tacgec. Tacgec, yeneac kpac yofi: Petoro nga Yohane amma Yakobo, Anderea nga Firipo amma Toma, Batoromaio nga Mataio amma Yakobo Arifaioac medac, Simong Dzerote nga Yuda Yakoboac medac.

¹⁴ Ngic imoc yenennoc uba mocgu amma nunumu ua tatahoc mekecgec. Ifi anggec Yesuac nonggea Maria nga ngac goa amma Yesuac munafora, yeneng yenigoc yenahafoc kecma nunumu ua momoc mekecgec.

¹⁵ Anu Yesuac arengfora 120 nganoc ifingo kpedzucnema tacmagec Petorongo botucnginau namma yofi edeyunuec.

¹⁶ “Negen negensinggoc tosofocna, negenggec, Yudango ngic hesicyunuu kemma Yesu mendanggegec, yeacnoc Tiri Asungo bicngoc Dawidiac enacfu yoac faiu ohoec, imoc fora fingecbeso, imocac ifi anec.

¹⁷ Yuda warac nenang arennoc amma kefec, ye nenahafoc Kebuac uamemeac denecdenemmea.”

¹⁸ “Amma ngic yeng faka manganaac dzo mema ua bangec mong bummeec, ihai kemma oruhango kpemeremma kekpeu wosea kpendziru keracbawa madarec.

¹⁹ Amma imocac siduc Yerusaleng ngicngac sasawa negendacma bangec, imocac kpara Akedama degec, titiha yofi, ‘Bangec sac maecfu.’ ”

²⁰ “Mitiyegecfu yoac yofi oho ohoya fede, ‘Ye amabangeha kisi fingeru ngic mongngo yeac kporucbedzou mi tacbeso.’ (Myeg 69:25) Amma monggoc yofi, ‘Ngic mongngo yeac ngicenaraac tatac mebeso.’ (Myeg 109:8)

^21-22 Imocac amma ngic mong yeac turunga meisinggebesonga. Yohanengo Yesu mitidoku nadzicmiu uaya hanahema mema nenanggoc kengha kecma kurumennu enec, naso imohai ngic nenanggoc kecgec, ngic imoc yeneac botucfunac ngic mong isinggeni yeng nenanggoc Yesu homecfunac yarec, imocac siduc nenahafoc debisina.”

²³ Petorongo ifi deu ngic yohockang meficyurugec: Mong kpara Yosefe Basaba dekecgec, yeac kpara mong Yusto, amma ogea Matia.

²⁴ Meficyuruma yofi dema numugec, “O, Kebu ubaheheng mingina, ge ngic yohockang yoc yerearunac daoc meisinggema edzacnununa henni.

²⁵ Henni yeng aposoro kpac mema Yudaac tatac mebeso. Yuda ye tataha imoc wama yengena sing monnu kenec.”

²⁶ Ifi dema numuma meisinggeudeac kpeing kpegec Matia heficgeu aposoro 11 yenearu torokpegec.