Amosi 9 - Deduamiti

KEBUNGO Isracel bangec yoacfu faiyunuude

¹ Kebungo ni kpefinnu wiac mong yofi edzacnuu henai, hemba Kebungo womongaac arataugeng namma yofi deec, “Ge womong bubuyaac kpetingnga imocac witiau kpena titiseria sasawango gorocgoroc amma baracke mama ngicngac hebucyunubeso. Anu damocngo gbori tacgecdeu yeni wasaibeangngo hebucyunubade, imohai mongngonec worama komoc mi kpeude.

² Yeni worama bangec usuma teng buyau kemegecdeu, Ni emuhanac marinango meyunu erebade. Nga wi sawau enggecdeu, Ni ihacnac ifingoc meyunu mabade.

³ Anu yeni Kamere tikibumau sufuemegecdeu, Ni sifu hofocyunuma mendangyunubade. Nga nearunac kengec sufuma kondung bageau yombong kemegecdeu, Ni deba boidzoc manganango yiniudengoc.

⁴ Anu ngabafocngina yeneng witicuau meyunu kenggecdeu, Ni deba wasaibeanggac nenea anggecde. “Ni kicsisic yenembade, imoc ngerecngereeac kpac.”

⁵ Kebu ye Kebu Kuctoa Mingina, yeng bangec kpesereu sisingaiande nga ihai damocngo kecdae yeni kiac ubahodung anggecde. Amma bangec sasawango Nilidoku isoc bounggegecde nga Aigita doku isoc kpedzima fegecde,

⁶ ye euriring amea kurumennu mema titiseria imoc bangecfu faiude. Amma kondungdoku kparu hau bangec witiau kpakeande. Ye kpara Kebunoc.

⁷ “Isracelareng ngeneng neac kicfu Itiopia yenigoc siricngina mocgu mi andae me?” Kebungo ifi dekperagide. “Isracel, Ni Aigitanac mi meicguyai, me Perestia ngicngac yeni Kirikia nucfunac mi meyunuyai nga Siria ngicngac yeni Kir bangecfunac mi meyunuyai me?

⁸ “Negendae Kebu Kpembibinagoc neac kicngo ngicngac kopocsicac eucererennu kecdae yenearu fibade. Nga bangecfu kecdae, yeni memanganeyunuba kpac anggecde. Ammanu ni sifu Yacakowac esamedac yeni ine hafoangoc mi memanganeyunubade.” Kebungo ifi dekperagide.

⁹ “Imocac amma Ni de-derecge angemmema bangeha bangeha yeneac botucfunac Isracel ngicngac wit isinggeandae isoc kpemindzahengunuma isingngunubade. Ifi amba forango bangecfu maude nga hocbisic bisicngo ine bangecfu mi maude.

¹⁰ Isracel ngicngacfocna yeneac botucfu damocngo kopocsic meficgemaguc yofi deandae, “Ebictoango feracnunuma naric mi mewegenenunuude,” imoc yeni ngabafocngina yeneac wasaibeannu homedacgecde.

KEBUNGO Isracel monggoc mengereude

¹¹ “Naso mong haude imohai, “Ni Dawidac eucererengnga makpeec imoc monggoc medzuacma me-mengere ambade. Amma hocoda dzamedzamea imocac sesuhau wiac sasawa manganedarec, imoc monggoc mengerema warac tarec ifi isocngoc faibade.

¹² Anu yeni Edomgac bangec tosea mema bangec nga ngicngac damoc neanna bingec meisingyunuai yeneac bangec tosea ifingoc megecde.” Kebu wiac sasawa yomoc meude, yeng ifi dekperagide.

¹³ Anu Kebungo yofi dekperagide, “nasongo hamakecde, “imohai waing forango ebirangoc anudeac amma kpememengicngo ua mema kecmanungoc bangec medzacmedzacmengicngo haude nga heihomecngic ye waing homema kecmanungoc waing waraima homerec imocngo fora bic anu tidzoctidzohongicngo haude. Anu ngicngac yeneac waingngina songeagoc imocngo homac yombong anude, imoc dokungo tikiunac wakema maande ifi isoc maude.

¹⁴ Ni Isracel ngicngacfocna witicuau kecdae yeni monggoc meyunu habade. “Anu taongngina manganeec imocac sesuhau monggoc me-mengere amma imohai tacyac anggecde. Nga waing uanginau homecma waing dokuya negecde. Amma semeng uanginau homecma fora menec anggecde.

¹⁵ Anu Ni Isracel ngicngacfocna yenang bangecnginau faiyunuba hombonanga kecgecde nga ngabafocngina yeneng hama bangec yemmeai imohacnac naric mi meicyunugecde.” Kebu Anutunginango ifi dede.