Amosi 8 - Deduamiti

Amosingo icgbomea kpaua sakahagoc henec

¹ Anu Kebu Kpembibiagocngo icgbomea kpaua sakahagoc edzacnuu henai.

² “Hembare yofi kpesinenec, Amosi ge noc wiac hennec?” Deu meremmiai, “Icgbomea kpaua sakahagoc taru henduae.” Ifi deba Kebungo yofi deec, “Isracel ngicngacfocna yeneac faka manganangina imocngo ic gbomea isoc kpauedeac amma naric mi orocyunubade.”

³ Kebu Kpembibiagocngo yofi dede, “Naso imohai womonnu yegec heiheingic yeneac yegecnginango meremma kpabetorenggac yegec anude. Nga fareng homac ukuyunugec fekengfeha andae. Imocac ngeni ning kpegec!”

Isracel bangec manganeec

⁴ Damoc ngeni makpekpea tipetangyunuandae nga bangecnginau kpekpedadanga meenti memati ayemmeandae, ngeni yomoc negenggec.

⁵ Amma yofi deandae, “Afo gboriaac nesogai nasotoango noc nasoac wisickeu neni wit balinina suenide nga noc nasoac Sabatango wisickeu neni witnina naric emenecfu suenide?” Anu ngeni kemma ikocfu wiacngina kapianec hederema sigeriu faima kpetea efeanec, imoc hemmaguc buma imoc meemma sueandae.

⁶ Ifi amma kpekpedadanga silwa dzo kapianecngo ngeneac wanacuaac bummeyunuandae nga makpekpea hanitabeac buma mocguacsocngo bummeyunuandae amma wit foraseuha ifingoc sueandae.

⁷ Kebu yengenaoc yofi deseriemeec, “Ngeneng yofi deandae, ‘neni Yacakowac areng dema sebiengeng angandae,’ amma fakangina mangana sasawa andagec, imoc naric mi nigecnuude.

⁸ “Ngeni negenggec bangecngo mi gbigbiheude nga ngicngac ihai kecdae yeni kiac ubahodung mi anggecde, me? Bangecngo Nilidoku isoc yadima yugecde amma Aigita doku isoc kpedzima kemegecde.”

⁹ Kebu Kpembibiagocngo yofi dede, “Naso imohaingoc, Ni deba wenac dzongiau wenackiwango kundung kpeude, nga wenacdzongiau amango kundung kpeude.

¹⁰ Amma ni mitiac nasotoangina sasawa imoc heimeremba songgonggac naso anude nga sogacsogai yegecngina imoc meremba ubahodunggac yegec anude. Anu mateng ubahengemmedacba orucdzongina mepotockegecde. Naso imohaingoc mocmedac mongngo homeu kiac songgong hodungaiande, ifi isoc fingerude. Ngeni ifi amma kecmagec dzoura naso imocngo wisickeude.”

¹¹ Kebu Kpembibiagocngo ifi dede, “Naso mong hamakecde, imohai neng bangectoa bangecfu deba boditoa fingerude, imoc semenggac homeandae nga dokuac ubangina gbanggeande, ifi isoc kpahac. Imoc Kebu neanna yoac negen negenggac boditoa imoc fingerude.

¹² Ifi fingeru ngicngac sasawa yeneng Kebu Neac yoac hofocma sisinghohong amma kondung ferecgema nobocnac noboc kenggecde nga bangec wihacnacngo wenac ere ereaubigeng kenggecde ammanu ine sifu mong mi meficgegecde.

¹³ “Naso imohai ngacnaroang kereng kereng nga sebigbori medac kucnginagoc yeni dokuac mekacngina gbanggeu gbiriticyunuu kicngina gigiu mayunuude.

¹⁴ Anu damoc yeni Dan nga Bertseba taong ngereac kebu kecde dema Samariaac kopocsicfu nesunggema yoacngina deseriandae, ngicngac imoc yeni makpegecdeu monggoc mi yacgecde, kpac.”