Amosi 6 - Deduamiti

Isracelngo ebicfu enude

¹ Yahec, Tsionnu negenggec soronga anu kecandae, nga Samaria tikiu negengyohoha kpac kecandae, amma Isracel bangecac ngic kpackunengnginagoc, Isracel ngicngac ngeneng yenearunac mefic megecdeac haandae. Ubahodung, ngeni sasawango manganedacgecde.

² Ngeni kemma Kalne taong henggec amma imohacnac Hamat taong kuneng ifingoc hemma ferecgema Perestiaac taong Gat, ihai kemebisia. Yeneng Yehuda nga Isracel ngeneac eucerereng ferahedae me yeneac bangecngo ngeneac ferahede, ec?

³ Anu ngeni ebictoaac naso imoc nigera anggec nga faka angandae imocngo ebictoaac naso imoc kpedziu mewegenengunuande.

⁴ Anu ngeni fefengina imoc erefanggac baihagocngo me-mengere angana, imohai feandae amma heitatacngina yumea nga herea, imohai feandae nga tacma rama medahaac fusia songea neandae nga burumaka medaha gbofomaac fusia neandae.

⁵ Anu ngeni gitangina kpema Dawid isoc udumeng gboria heficgeandae.

⁶ Amma ngeni waingdokuya kude wakewakeau nema kerec homung kerengagocngo sebinginau hosoandae amma Yosefac esamedac ine ubamangangnga kpac memanganeyunuandae.

⁷ Ifiac amma yeneac botucfunac enara ngenennoc bangec monnu witicuaac hanachanahea anggecde, anu eng tacma semeng negebec angandae, imocngo wisickeude.

KEBUNGO Isracel ngadeheec

⁸ Kebu Kpembibiagoc ye yengenaoc yofi deseriemeec, Anutu Kuctoa Minginango dekperagide: “Ni Yacakowac esamedac yeneac sebiengengngina imoc ubango waduae amma amagereha seria imoc ngadeheyombonggeduae. Anu taongngina nga wiac sasawa imocac manau fede, imoc ngabafocngina yeneac mariu faidacbade.”

⁹ Nga ngicngac tenngo amamana mocguu engngoc tacgecdeu yeni ifingoc homedacgecde.

¹⁰ Anu sactosofocngina yeneng farengngina amaunac meicke kemma faigec dzeudeac hama mongngo imohai sufuma tacbauac yofi dekpesi anggecde. “Mongngo gegoc kecde me?” Deu deude, “kpahac!” Deu monggoc torokpema deude, “Waickegec, nenang ifiango Kebuac kpac monggoc mi kpacbisina.”

¹¹ Anu Kebu yengenaoc dederecge ayemmeec. Amma amatoatoangina kpedzamedarude nga amabisicbisicngina ifingoc medzameu kpacandarude.

¹² Nga becosingo hoctoatoa witiau naric nedziude me? Amma burumakango bangec medzac medzacmeac aieng taima kondung naric mendzirude me? Ngeneng ine desidesiac yoacfora imoc merenggec hodungagoc angande nga dindingac kekecac foraya imoc merenggec aengagoc angande.

¹³ Damoc ngeni Lo-Debar taong mema sebiengenggoc sogaima degec, “Neni nenang kucfu Karnaim mi meing me?”

¹⁴ Kebu Anutu Kuctoa Minginango yofi dekperagide, “Ni bangec monnunac ngicngac fenggeyemmeba Isracel areng Lebo-Hamat taong ihacnacngoc kengkecma Araba tumeau wisickede, yeni ngenigoc dzobondzobong anggecde.”