Amosi 5 - Deduamiti

Amosingo Isracel yeneac ubahodung yegec heiec

¹ O Isracel, geac amma ubahodung yegec yomoc heigenduae, ge kedzac kpema yegec sibia yomoc negenna.

² “Ngac ngicfu mi kengkena Isracel ye makpeec, naric monggoc mi yarude. Ye bangehau makpema femanu mongngo mefickema mi miarude.”

³ Kebu Kpembibiagocngo Isracelac yofi dede, “Geac taontoaunac wasaingic seria tauseng sueyununadeu handretngosac dzigenegecde. Nga taonnunac handretngo kenggecdeu tenngosac dzigenegecde.”

⁴ Kebungo Isracel ngeneac yofi dede, “Ngeni kpachofoc anemma kekec meficgegecde.

⁵ Anu Gilgal taongngo bangec monnu witicuau kenude nga Bet-Elngo kparakpac anude. Imocac amma ngeni Bet-Elu kpachofoc mi anembisia nga Gilgal mi kembisia amma singkpema Bertseba mi kembisia.”

⁶ Ngeni Kebu ni kpachofoc anemma kekec meficgegecde. Ifi mi anggecdeu ye gerec isoc mama Yosefac kisicfora kpaiyunuude, ammanu mongngo Bet-Elu gerec imoc naric mi kpebockeude.

⁷ Ngeni desidesiacyoac imoc merenggec hodungnga angande nga faka dindingac imoc ngadehema hanitiandae.

⁸ Kebungo asomeng habuya habuya sasawa meficyunuec, ye hurubia merennu unung unungmeragia angande nga hadzing mekundungkpeu toforeande. Amma kondunggac doku kpacyunuma bangec kiwau kpakeyunuu sokoma fedae. Ye kpara Kebunoc.

⁹ Yennoc piratac posonggerehagocngo dzikacacngic seria kpedzameyunuande nga taong odangina seriaseria, imoc kpembarackeu kpac andarude.

¹⁰ Ngeni ngic yoacfu namma yoacfora desiandae nga ngicngac yoacfora deandae yeni ubango ukuyunuandae.

¹¹ Anu ngeni makpekpea meentimemati ayemmema hodzinnu wit nga baliac takesi neterema meandae. Ifiac amma ngeni hocngo amagerecngina kuneng kuneng megec, imohai tacyac mi anggecde nga waing homecgec urubeacbeac feec, imohacnac waing foraac dokuya mi negecde.

¹² Nga singyoac kpena dafiguc anec, imoc ni negenduae amma kopocsic ebiria dafiguc meficgenec imoc negendacduae. Ifiac amma ngeni hania kpacfu ngic dindingac faka mangana ayemmeandae amma ngeni ngic mangana wayunugec yeneng hiedzo ngemmema kererengunuandae. Anu desidesingic ngeneng makpekpea yeneac yoac gombunga mi desigec yoacfu makpeandae.

¹³ Ifiac amma naso mangana yofinenggac, negen negengtegehagocngo waickema kefude.

Amosingo faka gombunga anggecdeac deec

¹⁴ Amma ngeni faka mangana mi modacbisia, faka gombunga amma naso herea kecgecde. Ifi ammagec Kebu Anutu Kuctoa Minginango ngenigoc kecde deande, yeng ngenigoc kecfude.

¹⁵ Nga faka mangana ngadehema faka gombungaac songo negengyombonggebisia amma yoacfu yoac dindingacsac debisia. Ngeni ifi ammagec gedang Kebu Anutu Kuctoa Minginango Yosefac arennunac ngic tosea kecgec, yeni ubamangang ayemmeude.

Isracel yeni kiacubahodung anggecde

¹⁶ Imocac amma Kebu ye Kebu Anutu Kuctoa Minginango yofi dede, “Naso imohai sintoaac sing bisicfu kpabetoreng fingerude nga yaimmainggac kiac udumengngo kpekpeturang amau feude. Ifi anu heihomec ngic kiac ubahodunggac heitaiyunugecde nga songgonggac ngicngo kpabetorenggoc hagecde.

¹⁷ Anu Neng ngeneac botucnginau ferecgema kemba waing uangina sasawau kpabetoreng fingerude.” Kebungo ifi dede.

Kebuac nasotoa

¹⁸ Ubahodung kuneng ngicngac damocngo Kebuac naso imocac tomai kecdae! Ngeni noc haniaac Kebuac nasotoaac tomai kecdae? Uameme imoc kperagiaac naso kpac kundungtoaac naso anude.

¹⁹ Naso imohai yofi fingerude, ngic mong ye laionggac kengec woraduae dema beaaru heiude nga mong ye nedzima ameau emma mariango merandzima nannegenduae, demanu boidzocngo kiude.

²⁰ Kebuac naso imocngo kperagia kpac kundungngagoc fingerude amma kundungdzapac fingeru kperagiaac iroroya hofocgecde.

²¹ Kebungo yofi dede, “Ni kpekpeturang nasotoangina imoc ubango wayombonggema ngadeheanduae nga miti negen negenggac adzoc adzorohongina imocngo asenga mangacmanganea.

²² Ngeni hosuc heiheiac sese me wit nga baliac sese menenggecdeu, ni mi negengngemmebade amma yang gbofoma ubangerecac sesegerec ohonenggecdeu, neng imoc hafoangoc mi hoanggebade.

²³ Yegec udumengnginagoc meickegec. Ni gita udumengngina gombunga imoc negembesonga mi anende.

²⁴ Imocac ngeni wagec desidesiac yoacforango ine doku isoc nedzibeso nga dindingac kekecngo doku sike sikea isoc febeso.”

²⁵ “Isracel ngicngac ngeni kifa fotiac manau bangeckisiu yamberecac sese me semenggac sese mong heinenggec me?

²⁶ Ngeni ngictaungina Sakut kpabanggegec nga Kaiwang asomenggac kebu, nemu ongangina imoc ngenaoc maringinango mema afehegec.

²⁷ Imocac amma ni Damasko ferahama tihereema witicuau faingunubade.” Imoc Kebu kpara Anutu Kuctoa Mingina, yeng ifi dede.