Amosi 4 - Deduamiti

¹ Ngac Samaria tikiu kecdae, ngeni Basanggac burumaka gbofong isoc ngeni kedzac kpema negenggec, ngac ngeni makpekpea nga kpe-kpedadanga meenti memati ayemmema ebic kuneng witinginau faima ewefocngina yeneac yofi deandae, “Dokuseria mehagec neni!”

² Kebu Kpembibiagocngo kpetiac nanangau namma deseriec: “Naso mong hamakecde, imohai ngeni ngabafocngina yeneac honacfu endacgec mengunuma kenggecde, ammanu medzihafocngina yeni ifingoc hawicfu endacgec kpedziyunu kenggecde.

³ Ngeni hocodaac titingasoc tembuc tembuc imohacsing ferecge kemema kemmagec Harmon tikiugeng kpefacngunugec kenggecde.” Kebungo ifi dekperagide.

Isracel yeni Anutuaru monggoc mi dzigenegec

⁴ “Isracel ngicngac ngeni Bet El kemma kopocsic meficgebisia, nga ngeni Gilgal kemma kopocsic engngoc torokpema ambisia. Amma asoacsoc sesegerecngina mehagec nga uameme harebec ammanu tenunac mocgungina faibisia.

⁵ Anu ngeni ubangerecac sese imoc icsogong yisagoc ohobisia, nga wosoefacnginaac sese imoc faima kpackuneng emema sebiengeng ambisia, Isracelareng, ngeni faka ifianoc ambesonga songo homac negengandae.” Kebu Kpembibiagocngo ifi dekperagide.

⁶ “Ni taong sasawa imohai herehomehome meficgengemmeai nga taongnginasoc icsogonggac bodi meficgeai. Ifi angemmeba hemmaguc ngeneng nearu monggoc mi dzigenegec.” Kebungo ifi dekperagide.

⁷ “Ni kpememe nasoac afo harebec femanungoc kia merandziai. Amma taong goau kia yemmeai nga taong goau kia merandziai. Amma heikpenec sobeng goango kiayagoc nga goango kiaya kpac anu gbanggeec.

⁸ Ngicngac yeneng dokuac gbanggema taonga taonga tidacma doku negec, ammanu imocngo ine mi hetucyunuec. Ifi angemmeba hemmaguc ngeneng nearu monggoc mi dzigenegec.” Kebungo ifi dekperagide.

⁹ “Ni naso homac firang gerea nga dundung sueba hama semeng uangina nga waing uangina memanganeu manganeec. Amma fig ic nga oliwa ic sasawa ipuango nedzonggedarec, ifi angemmeba hemmaguc nearu monggoc mi dzigenegec.” Kebungo ifi dekperagide.

¹⁰ “Ni Aigita yenearu hafei mangana seuyai ifi isoc ngenearu angemmebade. Nga sebigbori medacfocngina amma ngabafocngina yeneac becosi mema dzikacfu meyunuma kecgec, yeni wasaibeangngo kpebucyunuba hoac homung imocngo tebacngina sokoma samacngina nefonggeec. Ifi angemmeba hemmaguc ngeneng nearu monggoc mi dzigenegec.” Kebungo ifi dekperagide.

¹¹ “Ni Sodom nga Gomora taong memanganeyuruai, ifi isoc ngenearunac goa ifingoc memanganeyunuyai. Ngeni gerec tofeasac isoc dzesibesonga ammagec kucgoc kpedzingunuba hemmaguc ngeneng nearu monggoc mi dzigenegec.” Kebungo ifi dekperagide.

¹² Ifiac amma Isracel ngeni deduae isoc angemmebade nga ni ifi anggembadeac amma Anutunginagoc ewacemegecdeac efackpefac anggec.

¹³ Yennoc tiki deu fingecdacgec nga firang meficgeec amma yengena negen negengnga sufusufuya, imoc ngiha ngiha mekperagiyemmeande. Nga unung unung meragia imoc merennu kundung kpeande amma bangec buma buma sasawau kecdacande. Yeac kpara Kebu Anutu Kuctoa Mingina.