Amosi 3 - Deduamiti

¹ Isracel ngicngac, Kebungo ngeni sasawa ngeneac turung kpoukpouac yoac dede, imoc kedzac kpema negenggec, Nennoc Aigitanac mengunu hayai.

² “Nga bangecfu ngicngac sasawa kecdae, yenearunac ngenisac meisingngunuyai, ifiac amma kopocsicngina sasawa imocac turunga ngunumengere angemmebade.”

Anutungo yoac profete edeyunuudeu, yeni imoc dekperagibisia

³ Ngic yohockang yereac denegengngira mi femanu yerahafoc naric sing kenecde me?

⁴ Laiongngo semenga kpacfu kate kpohoc manau dafi arohoude? Nga laiongmedahango wiac mong mi mema haricbengngau naric ngururuckeude me?

⁵ Nengngo kpedzikpedzia banggenu mi tacmanu dafi ururucke maude? Nga banggengngo wiac mong mi meudeu hadango banggenunac dafi eng fiticke yarude?

⁶ Nga dzikacac trampet udumengngo taonnu meficgeudeu ngicngac yeneac dzonongngina mi fedeude me? Amma taong monnu ebic kuneng fingerude, imoc Kebungomi negemmanu fingerude me?

⁷ Foracngoc, Kebu Kpembibiagocngo wiac mong sufusufuya enactofoc tofohofora profete yeni negengsufuya edeedzac mi ayemmema wiac mong ubeaac naric mi anude.

⁸ Anu laiongngo kunengngoc arohomanu merang kengeha kpac nanude? Nga Kebu Kpembibiagocngo ngic mong yoac edemanu ye profeteyoac imoc naric mi dekperagiude, me?

Samaria taong manganeudeac Amosingo deec

⁹ Ngeni yoac yomoc Asido taonnu nga Aigita bangecfu amagerecngina seriau kecdae yenearu dekperagibisia. “Ngeni Samaria tikiu kpedzucnedacma Isracel ngicngac yenearu yare nga faka mangana fede, imoc hennegeng ambisia.”

¹⁰ Kebungo monggoc yofi dekperagide, “Yeni faka dindingac angang mi negendae yeni yarefaka amma hamangecfunac wiac mema amagerecngina seriau atiha atiha heiengandae.”

¹¹ Ifiac amma Kebu Kpembibiagocngo yofi dede, “Ngaba yeneng amabangecngina sokodacma amabangecnginaac odaya seria imoc hembarackema amagerecngina seriau wiacngina senghamangecfu tigec enude.”

¹² Kebungo monggoc yofi dede: “Ramagarengngo laionggac enaraunac rama hanihoraac sira me kedzaha nobohabisic naric mesiude. Ifi isoc Isracelareng Samaria kecdae yeni kparicgang nga heitatacac kporuc sintaha imocgocsac naric mesiyuunubade.”

¹³ Kebu Anutu Kuctoa Mingina ye Kebunoc, yeng yofi dekperagide, “Ngeni yoac yomoc negemma Yacakowac esamedac yenearu hania dekperagigec.

¹⁴ Naso imohai Ni Isracel kopocsihaac turung kpoubadeu, Bet-El sesegerecac arata kpembarackeba arata sasawaac baic imocngo takema bangecfu makpedarude.

¹⁵ Ni kiafiranggac ama nga wenacnasoac ama yerahafoc kpedzameyurubade. Nga ama gombunga gombunga erefanggac ngirenggoc me-mengere angana, imoc memanganeyunubade amma amagerec kuneng kuneng kpedzacmedacbade.” Kebu yengenaoc ifi dekperagide.