Amosi 1 - Deduamiti

Kebungo Amosi kpefinnu yoac edeec

¹ Kebungo Tekoa taonggac ramagareng yenearunac mong kpara Amosi ye kpefinnu Isracelac yoac edeec. Naso imohai Udziango Yehuda yeneac ngictau kefec nga Yehoasiac medac Yeroboamngo Isracel yeneac ngictau kefec, anu kifa yohockang wisickeu usoctoa meec.

Kebungo ngicngac memeting yemmeude

² Amosingo yofi deec, “Anu Kebungo Tsionnunac laionggac aro isoc arohoude nga Yerusalaimnunac parandanggeude. Anu rama yeneac kpindzingngo dzanggeu Kamere tiki bumaac ichasango ifingoc ururueude.”

KEBUNGO Siria bangecac ngicngac yoacfu faiyunuude

³ Kebungo yofi dede, “Damasko taonggac ngicngac yeni kopocsic faka naso homac meficgegec. Yeni Gilecadac bangec nobohaac ngicngac witinginau aiengenaragocngo tidzodzonggegecac amma mi onggongyunuubade.

⁴ Ni gerec sueba ngictau Hadzaelac amau maude, mama imocngo ngictau Benhadaac amagereha seria dzedarude.

⁵ Amma Ni Damasko taonggac oda naguya imoc kpembarackebade nga ngictau damocngo Awen tumeau kecde, amma ngictau Bet Edennu yasu kapongnga mekecde, imoc yeri meicyurubade. Nga Siria ngicngac yeni Kir bangec ihai witicuau kenggecde,” Kebungo ifi dede.

KEBUNGO Perestia bangecac ngicngac yoacfu faiyunuude

⁶ Kebungo monggoc yofi dede, “Gadza taongngo kopocsicfaka homac meficgema guruama sasawaac ngicngac Edom yenearu witicuau kecgecdeac sueyunugec, imocac ye mi onggonggebade.

⁷ Amma gerec sueba Gadza taonggac hocodau mama amagereha seria dzeu sobengasac feude.

⁸ Ni Asidoac ngictau nga Askeronnu ngic merang yasu kapong mekecde, ye memanganebade. Amma marina miacba Ekerong kpefahakecmanu Perestia yeneac ngic wisic wisickea yeneng homedacgecde.” Kebungo ifi dede.

KEBUNGO Tiro taonggac ngicngac yoacfu faiyunuude

⁹ Kebungo monggoc yofi dede, “Tirongo kopocsic homac meficgema ogotoso yenigoc gombung kekecac dedzege, imoc kpembarackema guruama sasawaac ngicngac Edomnu witicuau kecgecdeac sueyunuec, imocac amma ye mi onggonggebade.

¹⁰ Ni gerec faiba Tiro taonggac hocodau mama amagereha seria dzemusunggeude.”

KEBUNGO Edom bangecac ngicngac yoacfu faiyunuude

¹¹ Kebungo monggoc yofi dede, “Edomngo kopocsic homac meficgema sactosofocra Isracel yeneac ubamangangnga kpac wasaibeangngo yunukporac ayemmeec. Amma herebutoaya imocngo torokpeutorokpe fedeac amma ni mi onggonggebade.

¹² Ni gerec faiba Teman bangec nobohau maude amma imocngo Botsera taonggac amagereha seriaseria dzeu sobengasac feude.”

KEBUNGO Among bangecac ngicngac yoacfu faiyunuude

¹³ Kebungo monggoc yofi dede: “Amongngo kopocsic homac yombong meficgema yengena bangec kpetea meyadiudeac Gilecad ngac herenginagoc kecgec yeneac godongngina hepusuckecgec, imocac amma mi onggonggebade.

¹⁴ Imocac Neannaoc Rabaac hocodau gerec sueba amagereha seria dzemusunggeude, imoc dzikac nasoac horianggeandae nga imocngo firangtoa kucgoc kpeande, ifi isoc fingerude.

¹⁵ Anu ngictau nga enarafocngina, yeni bangec monnu witicuau kemma kecgecde.” Kebungo ifi dede.