1 Timoteo 5 - Deduamiti

Anutuac kpebunnu kekec

¹ Ge ngic yada mong yoac edebesonga dema kucgoc nga gereagoc mi ammima ubea midima mangga yoac edeannec, ifi isoc yoac edebesena. Nga medacgbosing yeni dacmunafocga yeneac ubangina midima angannec, ifi isoc ayemmebesena.

² Amma ngac yada yeni nonggogaac angannec, siriha imocngoc ayemmebesena nga naroang yeni naingfocga yeneac angannec, siriha imocngoc herega kpetiac femanu ayemmebesena.

Ngachotsec

³ Ngachotsec ewefocngina homemea memeficngina kpac kecdae, kpebung ngeneng yeni eweheihei ayemmema meficyemmebisia.

⁴ Anu ngachotsec mong ewea homemea ye nambaracforagoc me esaforagoc kefudeu yenaoc ine warac warac nongoatangina henggareng ammigecdeac ua mebisia. Yeneng ifi amma nonggomangfocnginaac turung kpouyemmebisia. Faka imocngo Anutuac kicfu ngereeude.

⁵ Nga ngachotsec mongngo memefiha kpac tembuha kecma Anutungo meficmiudeac negenserima hadzing tofocnac numukefude.

⁶ Anu ngachotsec mong sebiac songo modacande, ye ine sebiugengsac kecde nga ubahereugeng ine homemea kecde.

⁷ Ngachotsec yeneac yoac imoc ngicngac seriangoc edeyununadeu yeneac ubakpekpe naric mi fingerude.

⁸ Ngic mong ye sactosofora yenenggareng mi angande nga yengena nonggomang nga dacmunafora ifingoc mi garengyunuudeu ye negen negensinga bic wama faka mangana amma bangec monnunac ngicngac Anutu mi negemmidae, yeni feracyunuma faka mangana anude.

Ua kpebung manau

⁹ Anu ngachotsec mong ye kifaya 60 bic ferahema ngic mocguac ngac kefec, yeac kpacsac ngachotsec yeneac kibiu arenggebesonga.

¹⁰ Amma angammemea gombunga feec nga fede, imoc ngicngac sasawango bic hennegeng angkecgec. Imoc yofi, ye nambaracfora gombunga yenenggareng angkefec nga ngicngac edoc bedoc ayemmekefec amma ngicngac kpetiac haningina dzuacyemmekefec. Ye ngicngac ebicfu kecgec meseriyunukefec amma ngicngac meficyunuudeac naso mong mi ukukefec.

¹¹ Ngachotsec afo engeng kecdaengoc ge yeneac kpac areng imohai mi ohobesena. Yeni Kristoac modzongina tiu ngicac songo monggoc negemma ngicfu kembeso anggecde.

¹² Yeni warac yoac dzegegec, imoc wama yoacfu makpema ebic meficgegecde.

¹³ Amma yeni oyong kecma amayuguc kengkecgecde. Nga imocsac kpac, yeni ifingoc yoac gubekisang amma kpounec nga yoac goa yeneac wiac me dedeacsoc mi ammanu imoc sifu degecde.

¹⁴ Imocac amma ngachotsec afo engeng kecdaengoc yeneac negemma areng yofi faiba modacbisia. Yeneng ngic monggoc mema sabac meficgema amangina garenggebisia. Yeni ifi anggec ngabafocnina kecdae, yeneng yoac mangana deyemmegecdeac sing naric mi meficgegecde.

¹⁵ Ngachotsec goa yeni sing bic segema Satang modacgec.

¹⁶ Nga negen negensinggoc ngac kecdae, yeneac amau ngachotsec goa kecdaeu yeneng heimefic ayemmegec kpebung yenearu ebic mi fingecbeso. Kpebung ngeneng ngachotsec makpekpea memeficngina kpac yombong kecdae, yeni ine heimefic ayemmebisia.

Uaac bung yemmebesonga

¹⁷ Ngicenara habu gombunga ngenenggareng angemmemma uangina meandae, yeni eweheihei ayemmema uaac bung yemmebesonga. Yeni yoac dekperagima edekpou angemmema uatoa mema kecdae, yeneacnoc negensibisia.

¹⁸ Mitikibingo imocac yofi dede, “Burumakango wit sebera kpetiudeac uatoa mema wit witiau tima yerecgeande, imocac dumbenga mi dzegebesena.” (Dser 25:4) nga “Uangic yeni uanginango uabungngina meficgebeso, imocngo ngereeude.” (Ruk 10:7; Sese 19:13)

¹⁹ Amma mongngo ngicenara mong yoacfu faibesonga negenudeu, ngeni yoac imoc hepuha kpac mi negembisia. Ngic yohockang me harebecngo yoac imocac hepuc angemegec, imohai yoac imoc negembisia.

²⁰ Yeni ngicngac yeneac kicfu kopocsic meficgegecdeu, geng ifingoc ngicngac yeneac kicfu demeting seria ayemmena ngicngac tosea yeni ifi hemma yenaoc kekecngina isinggegecde.

²¹ Anu ni Anutu nga Yesu Kristo amma angero meisingyunuyunuya, yeneac kicfu yoac imoc modacnadeac seria edeguduae. Ge ifingoc negeung yoac mi debesena me monde monde mi ambesena.

²² Nga mariga ngicngac yeneac witiu bic faima mi kenecyunubesena. Ngicngac yeneac kopocsicfu mi torokpebesena. Ge kpetiac kecbesena.

²³ Herekiki nga hafei homac anggengande, imocac doku tehecsac mi nebesena. Ge ine heregaac amma waing kapianec ifingoc nebesena.

Ngicngac fakanginango modacyunuude

²⁴ Ngic goa yeneac kopocsic didiu bic fede, yeni yoacfu bic enggecde. Nga goa yeneac kopocsic sufu sufuu fede, yeni yoacfu ngade enggecdengoc.

²⁵ Ifi isocngoc angammeme gombunga goa yaguc didiu fede. Nga angammeme gombunga goa yaguc didiu mi fede, imoc kecma sufu sufuu naric mi feude.