Yohana 9 - Dilagano Disha ku Wanhu wose

Yesu yakuhonya munhu yelekigwe mudula

¹ Foyagendage, hoyomona munhu mudula kulawa kwelekigwa kwakwe.

² Awefusa wakwe howomusa, Mwalimu, yatendile uwihi nani, imunhu yuno hegu awamweleke, ilekile yakwelekigwa mudula?

³ Yesu yawabidula, Si kosoko imunhu yuno kagola wihi, kahi si awamweleke, ninga imilimo ya Mulungu na udaha wa Mulungu woneke umwakwe.

⁴ Ichagila chigolosa imilimo yakwe iyanitumile, ugele kukali misi; ichilo chikwija, ugole uwene hachaka yakudaha kugolosa milimo.

⁵ Ugele uno wonuwile muchilunga, aniye no ujelu we chilunga.

⁶ Yakalonge nheifo hakotwa mate hasi, hakagolosa itope dya mate na kumubaka imunhu yuya mumeso na ditope,

⁷ na kumugamba, “Luta kanawe mwibwawa dya Siloamu” (nong'amba yatumigwe). Hakaluta, hakanawa hakoya yakona.

⁸ Awanhu wa habahi behi, na waya awamonage yakutasa, hawagamba, “Ayuno so munhu yakalage haya na kutasa?”

⁹ Wamonga hawagamba, “No yeye.” Wamonga hawagamba, “Hata, ninga kakifana ne imwene.” Yawagamba, “No niye.”

¹⁰ Hawamusa, “Ameso gako gakumukakumuka nhani?”

¹¹ Yawabidula, “Imunhu yakugambigwa Yesu kagolosa itope na kunibaka mumeso na kunigamba, ‘Luta Siloamu na ukanawe.’ Ninga imunhu yuno, honiluta, honinawa honikonga kona.”

¹² Howomugamba, “Kahoki Hoyogamba Ani simanyile.”

Mafalisayo wakuhananga kumanya ichipofu foyahonyigwe

¹³ Howomwigala Kumafalisayo imunhu yowile mudula.

¹⁴ Hadyuwa ijuwa dya Sabato Yesu doyagolose ditope na kumugubula meso gakwe.

¹⁵ Mafalisayo howomusa kahi ifyene foyadahile kona. Yawagamba, “Kaguma itope mumeso gangu, kamei honinawa, na nikona.”

¹⁶ Wamonga wa Mafalisayo hawagamba, “I munhu yuno nghalawile kwa Mulungu, kosoko nghakolile Isabato.” Ninga wamonga hawagamba, “Ikudahika nhani imunhu yakugolosa wihi yagolose ijumo fina dino?” Hokuwa mutemanuko mugati yawo.

¹⁷ Baho Amafalisayo hawamusa kahi imunhu yuya, “Ukugambaki kosoko kakuhonya udula?” Ni mugonesi.

¹⁸ Awayahudi wasafumile kuwa hakowa chipofu na kuwa hakadaha kona, mpaka fowawenanga awamweleke yuya yowile mudula hambiya yakona,

¹⁹ na kuwosa, Ayuno ni mwana wenu, womukugamba hakelekigwa mudula? Yanhani kuwa yakona hambiya?

²⁰ Awaya wamweleke hawagamba, “Chimanya seye, ayuno ni mwana wetu na fina hakelekigwa chipofu,

²¹ ninga foyakona hambiya hata seye chisimanyile, no nani yamugubule meso. Mudeni mwecho; imwene ni mukulu mugima, kokilongela imwecho.”

²² Awamweleke wajawalonga nheifo kosoko wejawawogoha Wayahudi, kosoko Wayahudi hawakifumilisa fina munhu yanghamufimila fina Kilisito yekuleusigwa mudisinagogi.

²³ Kosoko iyo awaya wemeleke hawagamba, “Imwene ni mukulu mugima musene mwecho.”

²⁴ Hawamwinanga kahi lwakeli ayuya imunhu yahonyigwe upofu, hawamugamba, “Mwinghe Mulungu ditunyo; ase chimanya imunhu yuno kena wihi.”

²⁵ Hakabidula, “Hona yena wihi, ani simanyile, chinhu chimwedu chonimanyile, aniye hanuwa chipofu ninga hambiya nikona.”

²⁶ Hawamugamba, “Hakakutendela nhani Hakagubula nhani ameso gako?”

²⁷ Hoyowabidula, “Nifulusa kuwatamilani, musendile kutegelesa, Nhani mukuhananga kuhulika kahi? Anye nanyi mukuhananga kuwa wefusa wakwe?”

²⁸ Howomuliga wakugamba, “Agwe no umwifusa wakwe, aseye cha wefusa wa Musa.

²⁹ Chimany fina Mulungu kalonga na Musa, ninga yuno chisimanyile kayalawile!”

³⁰ Imunhu hakabidula, “Nhani, Adino ni ijumo! Anyesi musimanyile koyalawile naye kanigubula meso gangu.

³¹ Chimanya fina Mulungu nghekuwahulika awena uwihi ninga imunhu iyakumwenda na kumufuga Mulungu na kugolosa foyakwenda Mulungu, Mulungu yakumuhuwila.

³² Hata nheifo kulawa ichilunga fochanga ilihulikigwa fina munhu wowose kagubula ameso ge munhu yelekigwe chipofu.

³³ Hona imunhu yuno nghalawile kwa Mulungu, nghowile yakudaha chochose.”

³⁴ Howomubidula, “Agwe kwelekigwa muwihi muhala, ukudaha kuchifusa seye?” Howomulafa kunje.

Udula we fidoga

³⁵ Yesu yakahulike fina wamulafa kunje, na yakamone yagamba, “Togola ukumuhuwila Mwana we munhu?”

³⁶ Yabidula, “Naye no nani, Mukulu, uleke nimuhuwile?”

³⁷ Yesu yamugamba, “Kumona, noniye nikulonga nagwe.”

³⁸ Hoyogamba, “Mundewa nikuhuwila, hoyomufuga.”

³⁹ Yesu yagamba, “Kosoko ya kulamula hija kuchilungu chino awaya awasikona wone na awa awakona wowe fipofu.”

⁴⁰ Wamonga wa Mafalisayo wowile habehi hawamuhulika howomugamba, “Ase nase chafidula?”

⁴¹ Yesu hakawagamba, “Nanga mowile mudula musowile mukuwa na wihi;” ninga hambiya mukugamba, “Chikona uwihi wenu ukwikala.”