Yohana 8 - Dilagano Disha ku Wanhu wose

Imwanamuke yakoligwe ugoni

¹ Ninga Yesu hoyoluta kwitunda dya Miseituni.

² Kukoche nhosikusiku hoyokwija kahi kudihekalu; wanhu wose hawamwijila hakakonga kuwafusa.

³ Awatulumi na Mafalisayo hawekwigala mwanamuke yafikililigwe muchitendo cha ugoni, hawamwika muchiligati.

⁴ Hawamugamba, “Mwalimu, imwanamuke yuno kakoligwa ugoni.”

⁵ Mumalagiso Musa kachigamba munhu wa fina yuno yatowigwe mawe, ukugambaki agweye muchanhya yakwe?

⁶ Hawalonga imbuli yo kumugesa, uleke wapate mbuli ya kumusongesela, Yesu hakafunama hakandika hasi ne chidole.

⁷ Fowagendelele kumusa maswali, hakenuka na kuwagamba, “Mugati yenu, ayuya yechaka wihi no yakonge kumukubitila diwe.”

⁸ Hakafunama kahi na kwandika hasi.

⁹ Ninga wakahulike, hawaleuka, yumweyumwe, kukongela imukulu kusuma wose, Yesu hoyosigala yemwene nayuya imwanamuke yemile kumwande yakwe.

¹⁰ Yesu yenula meso yamugamba, “Mwanamuke, wahoki, hachaka yakulamule?”

¹¹ Hakagamba, “Hachaka mukulu.” Na Yesu yagamba, “Ani nani sikukulamula; luta, na unghagolose wihi kahi.”

Yesu no ujelu we chilunga

¹² Yesu hakalonga nawo kahi yakugamba Aniye no no ujelu we chilunga, wowose yanyandamila yakuwa na ujelu wo uwumi na nghakwenda yagende muchisa kahi.

¹³ Mafalisayo yamugamba, “Hambiya ukihomelela gomwecho; go ukulonga si chawelu.”

¹⁴ Hata, Yesu hoyobidula, Aniye nikihomelela nimwecho, uhomelesi wangu ni wa chawelu, kosoko nimanya konilawile na nimanya konikuluta ninga anyeye musimanyile kunilawile kahi konikuluta.

¹⁵ Mukulamula kwa kwandamila umutufi, aniye sikulamula munhu wowose.

¹⁶ Aniye ninghalamula, ulamusi wangu ni wachawelu, kosoko siniye nimwene nikulamula, ninga aniye na yuya yanitumile.

¹⁷ Mu malagiso genu itulumigwa, uhomelesi wa wanhu weli ni chawelu;

¹⁸ Aniye nikihomelela nimwecho, na iBaba yanitumile yakunihomelela.

¹⁹ Kameyi hawamugamba, “Aniye musinimanyile na Baba musimumanyile, nanga mwanimanyile niye, hamuwa mukumumanya ne Baba naye.”

²⁰ Simbuli sino hakasilonge yowile mu chumba cho wakwika ifilafywa mudihekalu, ugele foyendeyofusa, hechaka munhu yamukolile, kosoko ugele wakwe hauwa ukali.

Konikuluta musikudaha kwija

²¹ Kahi Yesu hoyowagamba, “Nikuleuka; monihananga, ninga mukufa mu uwihi wenu. Musikudaha kwija konikuluta niye.”

²² Kameyi Wayahudi hoyogamba Togoleni kokikoma, kosoko yakugamba, “Konikuluta musikudaha kwija?”

²³ Hoyowagamba, “Anyeye mulawa hasi, aniyenilawa kuchanhya, anye ni we chilunga chino, aniye si chilunga chino.

²⁴ Nimutamilani fina mukufa mu uwihi wenu, kosoko mukufa mu uwihi wenu munghaleka kuhuwila fina aniye no yeye.”

²⁵ Howomugamba, “Agwe no nani?” Yesu hoyowagamba, “Nheifia fonimutamileni kulawa kunghonga.”

²⁶ Nina mengi ga kulonga muchanhya yenu na mengi gakulamula, ninga ayuya yanitumile no wachawelu, na nikutamila kuchilunga asiya sonihulike ukwakwe.

²⁷ Wasamanyile fina yakulonga nawo muchanhya ya Baba.

²⁸ Baho Yesu yagamba, “Fomukwija mumwinula Mwana we munhu, noho mukamutanga fina noniye, na kahi sikugolosa mbuli yoyose kwa kwenda kwangu aniye nimwecho ninga ifene iBaba foyakufusa nofonikulonga.

²⁹ Na imwene yanitumile kahamwedu nani; nghanilekile nimwene, kosoko majuwa gose nikugolosa agakumwendesa.”

³⁰ Foyalongile nheifo wengi hawamuhuwila.

Ichawelu yowalekelela

³¹ Kameyi Yesu hoyowalonga awaya Awayahudi awamuhuila, Munghekala mumbuli yangu, mukuwa wefusa wangu chelu,

³² mukwenda muimanye ichawelu nayo ikumwikani kuwa walekeligwe.

³³ Hawamubidula, Aseye cha cheleko cha Ibulahimu, chisinati chuwe watumwa kwa munhu wowose. Ukagamba, “Nhani gweye fina mukwende mukuwa walekeleligwe?”

³⁴ Yesu yawagamba, “Chawelu, chawelu, nikumutamilani chila munhu yakugolosa uwihi ni mutumwa wa wihi.

³⁵ Mutumwa nghakwikala munyumba majuwa gose; imwana yakwikala majuwa gose.

³⁶ Kwa nheifo imwana yanghakulekelela, ukuwa kulekeleligwa chawelu.

³⁷ Nimanye fina anyeye mwa cheleko cha Ibulahimu; ninga mukuhananga kunikoma, kosoko simbuli sonikulonga sachaka luneka mugati yenu.

³⁸ Nikulonga fonyonile kwa Baba, anye nanye mukugolosa fina fomuhulike kwi Baba yenu.”

³⁹ Howomubidula, Ibulahimu no Baba yetu. Yesu hoyowagamba, “Nanga mu wana wa Ibulahimu, hamuwa mukugolosa foyagolose Ibulahimu,

⁴⁰ ninga niwatamileni ichawelu chonihulike kwa Baba, achino sochonghagolose Ibulahimu.

⁴¹ Anye mukugolosa foyagose iBaba yenu.” Howomugamba, “Aseye chiselekigwa kwa ihabwa; china Baba yumwedu, naye ni Mulungu.”

⁴² Yesu yawagamba, “Mulungu nanga ni Baba yenu, hamuwa mukunyenda niye, kosoko nilawa uko na kwija kuno kulawa kwa Mulungu; sijile kwa kwenda kwangu nimwecho, ninga hakanituma.

⁴³ Nhani musikumanya sonikulonga? Kosoko musikudaha kutegelesa na kuhokela imbuli yangu.

⁴⁴ Anyeye ni we Baba yenu luhoma, na kwenda kwenu ni kugolosa fina foyakwenda imwene. Hakowa mukomaji kulwa kung'honga, kachaka chawelu, kosoko umwakwe mwachaka chawelu. Mayakudanha yakulonga fina foyowile imwene imwecho, kosoko imwene mudasi na Baba wa udasi.

⁴⁵ Ninga, aniye kosoko nikulonga ichawelu, musikunihuwila.

⁴⁶ No nani muchiligati yenu yekudaha konesa fina ni wihi? Hona nikulonga ichawelu nhani musikunihuwila?

⁴⁷ Ayuya imwene wa Mulungu yakuhulika simbuli sa Mulungu; isoko ikuleka anyeye musikuhulika ni kosoko anyeye musi wa Mulungu.”

Yesu na Ibulahimu

⁴⁸ Wayahudi howomubidula, Togola chisikulonga sawa ma chigumba fina agweye kwa Musamalia kahi kwina mhepo?

⁴⁹ Yesu hoyowabidula, Nachaka mhepo; nikumogoha Baba anyeye musikunyogoha niye.

⁵⁰ Aniye sikuhananga itunyo dyangu nimwecho, kwina yumwedu iyakudihananga, noyakuwa imulamusi.

⁵¹ Chawelu, chawelu, nikuwatamilani, imunhu yanghaikola imbuli yangu, nghakwenda yone difa.

⁵² Kameyi Awayahudi howomugamba, “Hambiya chimanya fina kwina ipepo. Ibulahimu kafa, na wagonesi, nagwe ukugamba Imunhu yanghaikola imbuli yangu, ngahakwenda yanomole difa.

⁵³ Agweye kwa mukulu kusuma iBaba yetu Ibulahimu, iyafa? Na wagonesi wafile! Ukugamba gweye fina no nani?”

⁵⁴ Yesu yabidula, Ninghakifuna nimwecho kitunya kwangu, kwechaka dyodyose; iBabangu noyakunitunya, womukugamba fina Mulungu wenu.

⁵⁵ Ninga musimumanyile; aniye nimumanya. Nanganigambile, simumanyile, hanuwa nikuwa mudasi fina nyeye; ninga niye nimumanya na niikola imbuli yakwe.

⁵⁶ iBaba yenu Ibulahimu hakasekelela kosoko yokudyona dijuwa dyangu; hakadyona hoyosekelela.

⁵⁷ Awayahudi hawamugamba, “Nghwinati ufike minyaka makumi mashano, kumona Ibulahimu?”

⁵⁸ Yesu yawagamba, “Chawelu, chawelu, nikuwatamilani, ugele Ibulahimu nghenatiyowe, ani noniye.”

⁵⁹ Hawadondola mawe mamukubitile; ninga Yesu hoyokifisa, hoyolawa kunje ye dihekalu.