Yohana 7 - Dilagano Disha ku Wanhu wose

Yesu na wanduguse

¹ Hanyuma yakwe Yesu hoyuluta ako nako Mufalilaya, nghadahile kugendagenda ako nako mu Uyahudi, kosoko Wayahudi wendewohananga kumukoma.

² Hambiya, isikukuu ya Wayahudi ye Fibanda hayuwa habehi.

³ Awanduguse howomugamba, “Leuka hano ulute Uyahudi, uleke awefusa wako wone imilimo yo ukugolosa.”

⁴ Hechaka munhu yakugolosa kwa chifiso hona yakuhananga yamanyike kwa wose. Hona ukugolosa simbuli sino kiyonese kuchilunga.

⁵ Kahi na awanduguse nawo wasamuhuwile.

⁶ Yesu hoyowagamba, “Ichigele changu chisinati chifike, ugele uwenu wabaha majuwa gose.

⁷ Ichilunga chisikudaha kuwasula nyeye, ninga chikunisula niye kosoko nichihomelela kuwa sinhenda sakwe sa wihi.

⁸ Luteni nyeye kusikukuu, aniye sikuluta kusikukuu, kosoko ugele wangu wokuluta usinati umemelekele.”

⁹ Yakalonge nheifo, hoyosigala Galilaya.

Yesu ku sikukuu ye fibanda

¹⁰ Awanduguse wakafuluse kuluta kusikukuu, kame naye hoyoluta, ninga si kwa konigwa na wanhu nanga kwa chinyele.

¹¹ Awayahudi wende womuhananga hasikukuu, wakugamba, “Kowahi?”

¹² Hakuwa na mang'ung'uliko mengi muwanhu kosoko yakwe ugele wamonga wakugamba, “Ni munhu muswamu,” wamonga wakugamba, “Hata, yakwagilisa wanhu.”

¹³ Ninga kosoko yo kuwogoha Wayahudi hechaka munhu yadahile kulonga achawelu muchanhya yakwe nonga kufumbafumba.

¹⁴ Mugatigati ya majuwa ge sikukuu Yesu hoyokwingila mudihekalu na kufusa.

¹⁵ Awayahudi howokisina, wakugamba, “Yanhani, imunhu yuno kena umanyi, naye nghapatile mafuso?”

¹⁶ Yesu hoyawabidula, amafuso gangu si gangu niye, ninga gakwe iyanitumile;

¹⁷ inghowa inyenda ye munhu ni kugolosa inyenda yakwe, yakwenda yamanye fina mafuso gano gakulawa kwa Mulungu hegu nikulonga kwa udaha wangu nimwecho.

¹⁸ Iyakulanga mu udaha wakwe imwecho yakuhananga kutunyigwa imwene, ninga ayuya iyakuhananga ditunyo dya yuya yamutumile, mugati yakwe mwechaka udasi.

¹⁹ iMusa nghamwinghileni Malagiso? Hata nheifo hechaka yakugakola. Nhani mukuhananga kunikoma?

²⁰ Awanhu hawamubidula, Kwina ipepo! Nani yakuhananga kuukoma?

²¹ Yesu hayawabidula Nigolosa nhenda imwedu, mose mukisina kosoko ya iyo.

²² Musa hakamwing'hani dikumbi (si kugamba dilawa kwa Musa ninga kulawa kuwa Baba senu) nanyi mukwigala munhu kikumbi dijuwa dye sabato.

²³ Hona dijuwa dye sabato imunhu yakwigaligwa kikumbi, uleke dilagiso dya Musa dinghabenigwe, musuha na niye kosoko yo mumuhonya munhu umutufi wakwe wose kuwa mumi mudijuwa dye sabato?

²⁴ Munghalamule kugaya gomukulanga na meso, ninga mulamule kwa kuliganisa ha kwa chawelu.

Ayuno no Kilisito

²⁵ Wanhu wamonga wa Yelusalemu wejawagamba, “Ayuno so imunhu wowakuhanga kukoma?

²⁶ Ayuno hano, yakulonga chila munhu yakutuhulika, na wasikulonga dyodyose ukwakwe, ikudaha kuwa fina awakulu wamanya chawelu fina yuno no Kilisito?

²⁷ Ninga ichimanya ayuno koyalawile; ninga; iKilisito ma yakwija yakoneka kwechaka munhu yakiyomanya woyalawile.”

²⁸ Kwa nheifo Yesu hayalonga, ugele foyendeyofundisha mudihekalu, Aniye munimanya, na mumanya konikulawa? Aniye sijile kwa kusagula kwangu nimwecho; iyanitumile ni wachawelu, naye musimumanyile.

²⁹ Aniye nimumanya, kosoko nilawa ukwake, na noyanitumile.

³⁰ Hawahananga kumukola, ninga hachaka munhu yagolole mikono yakwe kumukola; kosoko ichigele chakwe hachuwa chisinati chifike.

³¹ Ninga wengi wa wanhu howomwihuwila, howogamba, “Hona Kilisito yakayokoneka, kogolosa majumo mengi kusuma goyagolose imunhu yuno?”

Wasilikali watumigwa kumukola Yesu

³² Mafalisayo wakahulike amatewa gakulongalonga muchanhya yakwe, awatambiki wakulu na Mafalisayo, howotuma wasilikali wamukole,

³³ Yesu, baho yagamba, “Nikwenda nuwe nayi chipisi chitali chidodogi, kameyi nikuluta kwa yuya iyatumile;

³⁴ monihananga ninga musinyona, honuwile musikudaha kwija.”

³⁵ Imunhu yuno yakula hoki uko kochisikudaha kumona? Yakuhananga yalute kumugawanyiko wa Wayunani mugatigati ya Wayunani na kuwafusa Wayunani?

³⁶ Kena mana yaki ma yakugamba, “Monihananga ninga musinyona, na, Honyuwile niye musikudaha kwija?”

³⁷ Dijuwa diya dye indumiliso dye isikukuu, dijuwa dikulu, iYesu hakema na kutula chowe yakugamba, “Imunhu yanghona nghilu yeje ukwangu

³⁸ Iyakunihuwila aniye fina amatulumo fogakulonga, sisanda sa meji ga uwumi sikwende sidulike kulawa mumoyo wakwe.”

³⁹ Hambiya hakalonga sino muchanhya ya Muhe, imwene awaya awakumuhuwila wakuhokela; kosoko Muhe hakowa nghenati yalafigwa kwa fiya Yesu hakowa nghenati yatunyigwe.

Awanhu kukitemanuka

⁴⁰ Wakahulike simbuli siso, wanhu wamonga wakugamba, “Ayuno chawelu no mugonesi.”

⁴¹ Wamonga wagamba, “Ayuno no Kilisito!” Ninga wamonga wakugamba, “iKilisito yakulawa Galilaya?”

⁴² Togoleni matulumo gasigambile fina fina iKilisito yakulawa mulukolo lwa Daudi, na kulawa Betelehemu, ikaya oyowile Daudi?

⁴³ Kosoko iyo hokukuwa na mutemanuko mugati ya wanhu muchanhya yakwe.

⁴⁴ Wamonga hawahananga kumukola ninga hechaka yagolole mikono yakwe yamukole.

Kuleka kuhuwila kwa wakulu wa Wayahudi

⁴⁵ Awasilikali howokuya kuwakulu wa makuhani na Mafalisayo awawagambile, Nhani musijile naye?

⁴⁶ Awasilikali howobidula, Nghenati yalonge munhu fina yuno foyakulonga.

⁴⁷ Mafalisayo howawabidula, Anye nanye mwagilila nheifia?

⁴⁸ Kwina wowose mu filongosi na Mafalisayo yakumuhuwila?

⁴⁹ Ninga ditewa dino dya wanhu awasimanyile amalagiso, waligitigwa.

⁵⁰ Nikodemo, iyamulutile ugele ulokile, yowile yumwedu wawo, hoyowagamba,

⁵¹ “Togoleni, dilagiso dyetu, dikuchituma chimulamule munhu ugele chisinati chimuhulike na kifusa goni goyakugosa?”

⁵² Wejawabidula, “Agwe nagwe kulawa Galilaya? Hananga ulange mumatulumo ukwenda wowe fina mwichaka mugonesi yakwenda yalawe Galilaya.”

⁵³ Chila munhu hakaluta ukaya ukwakwe.