Yohana 6 - Dilagano Disha ku Wanhu wose

Kwigutisa wanhu figulu fishano

¹ Hanyuma yakwe Yesu hakaloka umwambu we bahali ya Galilaya no ya Tibelia.

² Itewa ikulu dya wanhu howomwandamila, kosoko hawona amajumo gakwe gokuhonya watamu.

³ Yesu hoyokwila kwitunda, hoyokwikala hasi hamwedu na wefusa wakwe.

⁴ Na ugele we juwa dikulu dye Pasaka haduwa habehi.

⁵ Yesu hakenula meso hakalanga ako nako, hakona itewa dya wanhu wakumwijila, hakamusa Filipo, Chikudaha kugula hoki chadiya chakuwegusa awanhu wose wano?

⁶ Hakalonga neifo kumugesa Filipo; ichawelu iyecho imwecho hakamanya choyakwenda yagolose.

⁷ Filipo hakamubidula, Uleke chila munhu yapate chidodogi du ikunangigwa chuwe na mikate ya mapesa dinali magana meli nhafi.

⁸ Yumwedu wa wefusa wakwe, Andulea, munduguse wa Simon Petulo hoyogamba,

⁹ “Hena mwana bahano yene mikate mishano ye shaili na fisomba fili. Ninga chawelu fisikudaha kwigusa awanhu wose wano.”

¹⁰ Yesu hoyowagamba, “Walongeni awanhu wekale hasi. Hanhu baho hahowa na mbago nyingi.” Kosoko iyo awanhu wose howokwikala hasi, hawowa wanhu wafikile figulu fishano awagosi.

¹¹ Yesu hoyoilonda imikate, hoyomulumba Mulungu, howogawiligwa wanhu awekale baho. Hakalumba kosoko ya sisomba, na wose howokwiguta.

¹² Awanhu wose wakegute, hakawagamba awefusa wakwe Dondoleni ifibendu fyose ifisigale, chinghagilele hata chimwedu.

¹³ Hawamemesafikonghola fyose, howomemesa fisege ikumi na fili kulawa kumikate iya mishano ye shaili iyadiyigwe na wanhu.

¹⁴ Wakone dijumo dino doyagolose Yesu, awanhu weja wagamba howogamba Chawelu ayuno no Mugonesi yagambigwe yakwija muchilunga.

¹⁵ Yesu yakamanye fina wanhu wendewohananga weje wamukole uleke wamugolose kuwa Mundewa kwa ludole; hoyoleuka hoyoluta kwitunda kahi yemwene.

Yesu yakugenda muchanhya ya meji

¹⁶ Ikowe hegulo, awefusa wakwe hawadulika kubahali,

¹⁷ howokwingila mu ngalawa hawakonga kuloka ibahali kuluta Kapelanaumu. Hachuwa chisa chingile, na Yesu hakowa nghenati yeje kuwa hamwedu nawo.

¹⁸ Ameji hogokonga kutunhumuka kosoko imheho nghulu yapumunhage.

¹⁹ Awefusa wakwe hawakwega makasia utali wa maili ine au shano nafi howomona Yesu kukugenda mumeji, yakusegelela ingalawa, howokogoha.

²⁰ Yesu hoyowagamba, “Munghogohe, no niye!”

²¹ Kameyi kwa chinyemi howomwingisa mungalawa, na baho ingalawa hoifika muisi bahaya howalutage.

Wanhu wakumuhanga Yesu

²² Dijuwa dya keli yakwe amatewa ulwandi lwa keli lwe bahali hawamanya fina kwina ngalawa imwedu du ulwandi lowowowile. Hawamanya fina Yesu nghengile mungalawa iya hamwedu na wefusa wakwe, ninga hawaleuka awene du wenumwene.

²³ Minhumbwi imonga, kulawa Tibelia, haija mhwani habehi na bahaya ahene awanhu hawadiya imikate yongeseke yakamale kulumba Mundewa Yesu.

²⁴ Amatewa wawakone Yesu kahechaka, hamwedu na wefusa wakwe, howokwingila musingalawa, howoluta Kapelinaumu, wakumuhananga.

Yesu mukate wa uwumi

²⁵ Awanhu wakamone Yesu ulwandi lwa keli lwa bahali, hawamugamba, “Mwalimu kwija milaki kuno?”

²⁶ Yesu hoyowabidula yakugamba, “Nikumutamilani ichawelu; mukunihananga kosoko hamudia mikate muwecho fomwahanange, homukwiguta, sikosoko hamona amajumo gangu.

²⁷ Munghakiidase ne chakudiya ichene chikubanika; ninga mchigolosele milimo ichakudiya cha ugele wose ku uwumi wa majuwa gose. Achino no chakudiya ichene imwana we Munhu yakumwinghani, kosoko Mulungu, iBaba, kaguma chitangilo chakwe cha kumufumila.”

²⁸ Kosoko iyo wejawamusa, “Chitende choni noho chigolose imilimo ye Mulungu yoyakuhananga chigolose?”

²⁹ Yesu yawabidula, iMulungu choyakuchanga mugolose ni kumuhuwila ayuya yatumigwe ne mwene.

³⁰ Yesu kawagamba, “Nikuwafamilani chawelu. iMusa choyamwinghileni usowile mukate kulawa kulanga; iBabangu noyakumwinghani umukate we chawelu kulawa kulanga.

³¹ Awagono wetu hawadiya mana munyika, fina amatulumo fogakulonga, Hakawengha mukate kulawa kulanga wadiye.”

³² Yesu kawagamba, “Nikuwatamilani chawelu, iMusa choyamwinghileni usowile mukate kulawa kulanga; iBabangu no yakumwinghani umukate we chawelu kulawa kulanga.

³³ Kosoko umukate, iMulungu woyakulafa ni yuya yakudulika hasi kulawa kulanga na kuchigalila ichilunga uwumi.”

³⁴ Hawamutasa, “Mukulu, Chinghe aseye umukate wuwuno majuwa gose.”

³⁵ Yesu hoyowagamba, “Aniye no ni mukate wa uwumi; iyakwija ukwangu ifi nghakona njala; iyakunihuwila niye ifinghakona nghilu.

³⁶ Ninga nimutamilani fina munyona nanyi musikuhuwila.

³⁷ Wose woyakuningha iBaba wakwija ukwangu sikumutaga kunje ng'oo,

³⁸ kosoko nidulika muyisi kulawa kulanga, si kugolosa fina fonikwenda niye, ninga kwenda kwakwe ayuya iyanitumile;

³⁹ na kuno nokwenda kwake ayuya yanitumile, ninghamwagilise wowose mu waya woyaninghile, ninga nimwinule (muchilalu) dijuwa dye indumo.

⁴⁰ Akuno no kwenda kwake iBabangu, fina chila munhu iyakumona iMwana na kumuhuwila yowe na uwumi wa majuwa gose; nani nikwenda nimwinule dijuwa dye indumo.”

⁴¹ Awayahudi hawakonga kumung'ung'unikila, kosoko yagambile, Aniye no ni mukate ulawile kulanga.

⁴² Howogamba, “Ayuno si Yesu, mwana wa Yusufu, iBabakwe ne ing'ina si chiwamanya. Yakudaha nhani kugamba, ‘Hambiya nihulumuka kulawa kulanga?’”

⁴³ Yesu yawagamba Muleke kung'ung'ulika nyenye kwa nyenye.

⁴⁴ Hechaka munhu yekudaha kwija ukwangu honaga nghakwegigwe ne Baba yanitumile niye; nani nikanimwinula mudijuwa dye ndumo.

⁴⁵ Itulumigwa muchitabu cha wagonesi Na wose wakawawafusigwa ne Mulungu! Chila munhu yafusigwe na kuhulika kulawa kwa Baba yakwija ukwangu.

⁴⁶ Kwechaka munhu wowose yamonile Baba, ninga ayuya yalawile kwa Mulungu, noyamonile Baba.

⁴⁷ Chawelu, chawelu, nikuwatamilani, iyakuhuwila kwna uwumi wa majuwa gose.

⁴⁸ Aniye no ni mukate wa uwumi.

⁴⁹ Awababa senu hawadiya imana munyika, howokufa.

⁵⁰ Auno no mukate ukudulika kulawa kulanga, uleke imunhu yandiye yanghafe.

⁵¹ Aniye no ni mukate wo uwumi, mudulike kulawa kulanga, wowose iyakudiya mukate uno, nghakufa ng'oo; na mukate wonikulafa kosoko yo uwumi we chilunga ni umutufi wangu.

⁵² Awayahudi, baho, wejawakonga kuwanga awenyecho, wakugamba, “I munhu yuno kodaha nhani kuchingha aseye umutufi wakwe chidiye?”

⁵³ Kamei Yesu hoyowagamba, “Chawelu, chawelu nikuwatamila, Munghalekadiya umutufi we Mwana we munhu na kunywa isakame yakwe mwachaka uwumi kugati yenu.

⁵⁴ Ayuya imwene yakudiya umutufi wangu na kunywa isakame yangu kena uwumi wa majuwa gose. Nani nikwija nimwinula dijuwa dye ndumo.

⁵⁵ Kosoko umutufi wangu ni chakudiya cha chawelu, na isakame ni chinywaji chachawelu.

⁵⁶ Iyakudiya umutufi wangu na kunywa sakame yangu yakwikala umwangu ani nani umwakwe.

⁵⁷ Fina iBaba imumi foyanitumile niye, nani na mumi kosoko ya Baba. No neifo ayuya yakunidiya niya yakuwa mumi kosoko ya niye.

⁵⁸ Awuno no mukate wadulike kulawa kulanga, siyo fina yowadiyile waBaba senu hawakufa, ayuya yakudiya mukate uno yakwikala majuwa gose.”

⁵⁹ Hakalonga sino yowile mwisinagogi, ugele foyafundishage Kapelanaumu.

Isimbuli so uwumi wa majuwa gose

⁶⁰ Wengi wa wefusa wakwe, wakahulike nheifo, howogamba, “Aino mbuli nghugutu nani yakwenda yaihulike?”

⁶¹ Ninga Yesu yakamanye fina awefusa wakwe wakuing'ong'olekela inonga iyo, yawagamba, “Musuha kosoko ya ino?”

⁶² Togoleni yokuwa nhani munghamona Mwana we munhu yakukwila koyowile ugele nghenati yeje?

⁶³ iMunye noyakwingha uwumi, umutufu wechaka chinhu; simbuli sonilongile nanyi ni muhe kahi ni wumi.

⁶⁴ Ninga wamonga wenu wasikuhuwila. Kosoko Yesu hakamanya kulawa kunghonga awaya awene wasahuwile, chenani awakwenda wamusongese.

⁶⁵ Hoyowagamba, “Kosoko ino no chileka namutamileni kwechaka yakwija ukwangu nanga ayuya yekwihigwa udaha wokwija ne Babangu.”

⁶⁶ Kulawa baho wengi wa wefusa wakwe howokuya kunyuma wasamwandamile kahi.

⁶⁷ Yesu hoyowalonga awaya awefusa wakwe ikumi na weli, “Anye nanye molewuka?”

⁶⁸ Simoni Petulo hakamubidula, “Mukulu, chilute kwani? Agweye kwina simbuli sa uwumi wa majuwa gose;

⁶⁹ na chihuwila, na chifulusa kumanya, fina agweye no u Imusunhile yumwedu we Mulungu.”

⁷⁰ Yesu hakawabidula, “Sawasaguleni ikumi na weli, na yumwedu wenu ni luhoma?”

⁷¹ Hakalonga muchanhya ya Yuda imwana wa Simoni Isikalioti, kosoko, imwene yumwedu wa waya ikumi na weli, noyowile wo kumusongesa.