Yohana 5 - Dilagano Disha ku Wanhu wose

Yesu yakuhonya Munhu helamba

¹ Hanyuma yakwe kweja kowa ihuwa ikulu dye Wayahudi. Yesu hakakwila Yelusalemu.

² Uko Yelusalemu habehi na dilango dya Singholo hahowa ne ilamba dikwinangwa munonga ye Chiyebulaniya Betisasa, dina deha shano.

³ Mugati ya siso sideha mwina awesikidaha, mudula, fiwete na watamu wokuholola, wakugojela ameji gatibuke;

⁴ (kosoko imalaika we Mundewa yendeyohumuluka ugele umonga na kwingila mwilamba, na kugatibula ameji; iyekukonga kwingila mwilamba, ameji ghonagatibuke yakuhona utamu wakwe wowose woyowile nawo.)

⁵ Munhu yumonga hakowa baho, yowile mutamu kwa minyaka makumi madatu na munane.

⁶ Yesu yakamone na kukumanya hakowa na utamu na kugona bahaya kwa ugele mwingi hoyomugamba, “Ukuhananga kuhonywa?”

⁷ Imunhu mutamu yuya hoyomubidula, Mukulu; nachaka munhu wa kuniguma mwilamba ameji fogakutibuligwa, ghona nikugesa kuluta munhu yungi yakulongola kwilamba kumwande yangu.

⁸ Yesu hoyomugamba, “Inuka, kitwike disasi dyako, na ugende.”

⁹ Chimwande imunhu yuya hakonywa, hoyolonda disasi dyakwe na kugenda. Dijuwa didyo hadyuwa ijuwa dye sabato,

¹⁰ awakulu wa Wayahudi howomulonga imunhu yahonyigwe, Diyelo ni sabato sifiswamu agweye kwinula disasi dyako.

¹¹ Ninga hoyobidula, munhu iyanihonyile kanigamba, “Inula disasi dyako, ulute!”

¹² Howomusa, Imunhu yakugambile ukitwike disasi dyako ulute nani?

¹³ Hambiya imunhu yuya yahonyigwe nghamumanyile Yesu, kosoko Yesu hakaleuka anhu baya, kosoko hahowa itewa dya wanhu ahanhu baho.

¹⁴ Hanyuma yakwe Yesu hoyomufika kwihekalu hoyomugamba, “Hulika, kwa mumi mambiya; unghagolose wihi kahi; dinghakwijile dihile lugano kusuma dino.”

¹⁵ Imunhu yuya hoyoluta kuwatamila aWayahudi fina Yesu noyonihonyile.

¹⁶ Aino nochileka Awayahudi wamwidasage Yesu, kosoko yagolose didyodijuwa dye sabato.

¹⁷ Yesu hoyowabidula, iBabangu yakugolosa milimo ugele wose, aniye nani inyagila nigolose.

¹⁸ Aino haiwagolosa Wayahudi wagendelele kuhananga kumukoma, si kosoko yo kubana isabato du, kahi na kumwinanga Mulungu fina Babakwe, yakigolosa fina kaligana ne Mulungu.

Udaha we Mwana we Mulungu

¹⁹ Yesu hakawagamba nikumutamilani ichawelu; iMwana nghakudaha kugolosa chochose yemwene; yakugolosa agaya do goyakona iBabakwe yakugolosa. Goyakugolosa iBaamunhu, iMwana naye nogoyakugolosa.

²⁰ Kosoko iBaba yakumwenda iMwana na yakumonesa gose agene goyakugolosa imwene, yakumonesa na milimo mikulu kusuma aino, nanye mose mukwenda mukisine.

²¹ Fina iBaba foyakuwenula wafile na kuwengha uwumi, no nheifo iMwana naye yakuwengha uwumi awaya woyakwenda kuwengha.

²² Kahi iBaba nghakulamula munhu wowose, kamwingha iMwana udaha wose wo kulamul.

²³ Wose wamogohe iMwana, fina fowakumogoha iBabamunhu. Wowose inghakumogoha iMwana nghakumogoha Baba iyamwigale.

²⁴ Nikumutamilani ichawelu; imunhu wowose iyakuhulika simbuli sangu na kumuhuwila yanitumile kena uwumi wa majuwa gose; nghakwingila kukulamuligwa, ninga kaloka kulawa kudifa na kwingila kuuwumi.

²⁵ Chawelu, chawelu, nikumutamilani, ichigele chikwija, na hambiya chabaha, ugele uwene awafile wakuhulika dijwi dye iMwana we Mulungu na awaya awakuhulika wakwenda wenuke mudifa.

²⁶ Kosoko fina iBaba foyena uwumi mugati yakwe no nheifo kamwingha iMwana naye kuwa na uwumi mugati yakwe,

²⁷ na kamwingha udaha wokogolosa ulamusi, kosoko ni Mwana we munhu.

²⁸ Munghakisine kosoko yadino, ichigele chikwija awene wose wowile mufilalo wakawohulika dijwi dyakwe

²⁹ na kulawa kunje, awagolose maswanu kukwinukila mu uwumi, awagolose gehile kukwinukila mukulamulwa.

Wahomelesi wa Yesu

³⁰ Sikudaha kugolosa chinhu chochose kwa udaha wangu nimwecho; fonikuhulika, nofonikulamula; na ulamusi wangu uliganila, kosoko sikuhananga kugolosa fonikwenda niye, ninga kwenda kwakwe iyanitumile.

³¹ Hona nikihomelela nimwenecho uhomelesi wangu si wachawelu;

³² kwina yungi iyakuhomelela muchanhya yangu na nimanya fina uhomelesi wakwe woyakuhomelela muchanhya yangi ni wachawelu.

³³ Hamutuma wanhu kwa Yohana, na hoyolafa uhomelesi kuchawelu.

³⁴ Si kosoko niye nikuhokela uhomelesi ukulawa kuwanhu; ninga nikulonga sino uleke mohone.

³⁵ Hakowa taa ikwaka na kumulika, nanye hamudaha kusekelela kwa chipisi chiguhi mu ujelu wakwe.

³⁶ Ninga uhomelesi wo ninawo ni mukulu kusuma awuya wa Yohana; kosoko imilimo iBaba yoyagambile niigose na kumale, imilimo iyino yonikugolosa, ikunihomela fina iBaba kanituma.

³⁷ Ne Baba imwecho yanitumile kalafa uhomelesi muchanhya yangu. Dijwi dyakwe musinati mudihulike, ifuta yakwe musinati muyone;

³⁸ na mwachaka imbuli yakwe ikwikala kugati yenu, kosoko mudikumuhuwila ayuya iyagaligwe ne mwene.

³⁹ Mukugahena hena matulumo kosoko mukudoga fina mugati yakwe mwina uwumi wa majuwa gose, nogo agene ga kuhomelela;

⁴⁰ ninga mukulema kwija ukwangu uleke muwe na uwumi.

⁴¹ Aniye sikuhokela ditunyo kulawa kuwanhu.

⁴² Ninga nimanya anyeye mwechaka uwendo wao kumwenda Mulungu mufidoga fyenu.

⁴³ Aniye nija mwisina dye iBabangu; anyeye musikuhihokela, ninga, yumonga yangheja kwa disina dyakwe imwecho, mukwenda mumuhokele.

⁴⁴ Mohuwila nhani anyeye mukihokelesa ditunyo muwecho kwa wecho, ninga musikuhananga ditunyo dikulawa kwe Mulungu?

⁴⁵ Munghagambe fina nikwenda niwasongese kwa Baba, iMusa noyakuwasongesa, imwene womumwikile dihuwi dyenu.

⁴⁶ Nanga mwamuhuwile Musa hamuwa mukunihuwila na niye kosoko hakatuluma muchanya yangu.

⁴⁷ Ninga ghonanga musikuhuwila goyatulume, mohuwila nhani sonikulonga?